Esaburi 41
41
Esala Muwulwaye
Khu omwembesi. Esaburi ya Daudi.
1Ali nekhavi omunju oenderanga avamanani!
OMWAMI amunanulanga mulutalo lwowutinyu.
2OMWAMI amulindanga nokhumuwa owulamu.
Achia okhulangwa owekhavi musialo.
Ewe sumulekhanga akwa muliekomba liavasiku vave ta.
3OMWAMI amulindanga nalwala,
muwulwaye wuwe, awonianga amalwaye kake kosi.
4Ese khulwange nawola, “Ewe OMWAMI, kholere esisa.
Mbonie, sikira nakhola owoni emberi wuwo!”
5Avasiku vange vanomalomakho muwuvi nivawola,
“Alifwa lina, elicha lilie lisikhe?”
6Ne mulala khunivo nikacha okhumbona, alomaloma akawusa,
ne mumwoyo awungeresa amavi okhulondana nange;
nachia erwanyi, akasalania muvanju.
7Avambiyira vosi vawewechananga okhulondana nange;
vambarira amavi kanjekholekhekho.
8Vawola, “Esinju simuandirekho esichia khumwicha;
siachia khwinyokha aakonire nundi ta.”
9Ata omusale wange wokhumwoyo oyu nasuvira,
oyukhwalia naye, kangalukhanire.
10Nausa ewe, Ewe OMWAMI, mbonere esisa,
mana wumbonie, nange njiakhuvachunga!
11Khulwa kano manyire mbo wasimiswa nange,
khulwokhuva mbo avasiku vange sivaminyire ta.
12Nausa ewe waninda, sikira owulungi wange,
mana wanyemesa emberi wuwo enyinga chiosi.
13OMWAMI, Nyasaye wa Israeli, afumwe,
khulwemiaka nemiaka!
Amina! Amina!
Àwon tá yàn lọ́wọ́lọ́wọ́ báyìí:
Esaburi 41: LNTPP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©The Bible Society of Kenya, 2024