Esaburi 40
40
Olwembo Lwefuma
Khu omwembesi. Esaburi ya Daudi.
1Nalinda OMWAMI mukhwefwira;
kanjekeresa mana kawulira amaliro kange.
2Kanjusa mulina liowutinyu,
kanjusa mulutende,
mana kanjengekha khulwanda,
nokhucheresa ekenda liange.
3Kanjekesa olwembo luyakha,
olwembo lwefuma khu Nyasaye wefwe.
Avangi vachia khuwona mana varie,
mana vasuvire OMWAMI.
4Ali nekhavi omunju osuvira mu OMWAMI,
ochalondanga avokhwewona,
avo avakochera mukhulonda evifwananie!
5Ewe wachukholeye evingi, Ewe OMWAMI, Nyasaye wange,
evikholwa vivio vilayi nende amaparo malayi khwifwe;
sialikhoo onyala kekerania khwiwe ta!
Kava mbo nakhanyalire okhuwolakho khukenako,
kakhavaye amangi akachavalikha.
6Ewe siwekomba evitiso nevianwa ta,
nausa ewe wanjekeresise.
Ewe siwenyirekho esianwa siokhuchiinwa namwe esiowoni ta.
7Mana nawola, “Wone, nise ono;
amalakiriso kako khwise kaandikwa musitau;
8Simanga okhukhola akawenya Ewe Nyasaye wange;
amalako kako kali mumwoyo kwange.”
9Nawoye amakhuwa malayi akowunanuli musituma esikali;
Wona, sinalekhirekho okhuwola ta, ngomanyire, Ewe OMWAMI.
10Sinakisise owuyeti wuwo owowuwonia mumwoyo kwange ta,
nawoye akowusuvirwa wuwo nende owuwonia wuwo;
Sinakisakho owusimi wuwo wa wuli lwosi nende owusuvirwa wuwo khusituma sikali ta.
11Ochangisa esisa sisio tawe, Ewe OMWAMI.
Lekha owusimi wuwo owa wuli lwosi nende owusuvirwa wuwo vininde wuli lwosi!
Esala Liowuyeti
(Esab. 70)
12Sikira owuvi wambotokhanire owuchavalikha;
Embi chiange chiambichiriye okhwola sinyala okhuwona ta;
wuvichire efwiri liomuchwe kwange
nafwiye omwoyo.
13Sima, Ewe OMWAMI, wunanule!
Ewe OMWAMI, khola lwangulwangu wunjete!
14Lekha vaambwe esoni nokhutondovana,
avenya okhuwukula owulamu wange.
Lekha vakomokhe nivawechekhereye,
avekomba mbo ese mbumiye!
15Lekha vatokane khulwesoni chiawe,
avo avanjekherera nivawola, “Aha, Aha!”
16Nausa avovosi avakhutakhatakha vekhoye nokhusangalira mwiwe.
Lekha avovosi avasima owuwonia wuwo vawole nivakooleramo, “OMWAMI nje omukhongo”
17Esendi mumanani nundi omutakha;
nausa Omwami kambaranga.
Ewe niwe omuyeti wange nundi omunanuli wange;
Ochacherewa ta, Ewe Nyasaye wange!
Àwon tá yàn lọ́wọ́lọ́wọ́ báyìí:
Esaburi 40: LNTPP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©The Bible Society of Kenya, 2024