Mariko 15
15
Yesu Emberi wa Pilato
(Mat. 27.1-2,11-14; Lk. 23.1-5; Yoh. 18.28-38)
1Nga asibuyi yola avakuhani vakhongo, avasakhulu, avekesi vamalako, nende esikhaso siosi vawolana, vawoa Yesu, vamuyira khu Pilato. 2Pilato kamucheva, “Niwe omwami wa, Avayahudi?” Naye Kamuchipa, “Owoye ochio.” 3Navakuhani vakhongo vamusitaka khuvinju evingi. 4Pilato nundi kamucheva, “Owumakho echipu liokhuana? Wona amakoso kano kosi aka vakhusitakire.” 5Nausa Yesu sikachipa nundi tawe, kho Pilato kawuka.
Yesu Akhalakirwa Okhufwa
(Mat. 27.15-26; Lk. 23.13-25; Yoh. 18.39—19.16)
6Mwisao kavalekhuliranga omuwoe mulala oyu venya. 7Mulala khu vawoe musiwoo sikhayi, owali nikecha avanju musisayumba, kaliwo umusacha owalangwa Baraba. 8Mana esituma siacha nundi okhucheva Pilato avakholere nga kavanasa. 9Ne kavachipa, “Mwenya ese valekhulire Omwami wa Avayahudi?” 10Sikira kawona mbo yachulana nekhinda avakuhani vakhongo okhumulecha khuniye. 11Nausa avakuhani vakhongo vaseketia esituma siavanju avalekhulire Baraba. 12Pilato nundi kavacheva, “Khanu khole njie omusacha eyimulanga Omwami wa Avayahudi?” 13Navo vayula nundi, “Muvambe.” 14Pilato kavawolera, “Esikira sina, sivi sina esiakholire?” Navo khovameta okhwayula, “Muvambe.” 15Kho Pilato, khulwokhwenya okhusimisa esituma, kavalekhulira Baraba, ne nikakhachapa Yesu, kamuana vamuvambe.
Avamahe Vakholera Yesu Esienyaenye
(Mat. 27.27; Yoh. 19.2-3)
16Avamahe vamuchusa munju yomuchuki, ne valanga alala omukanda kwavamahe omulamba. 17Vamufwala ekanju erangi yesambarau, valukha engacha yamawa vamucha khumuchwe. 18Vanja okhumukhesa, “Mulembe Omwami wa Avayahudi!” 19Vamukhupa khumuchwe kukwe nekhindu, vamufuchakho, nivasikama emberi wuwe okhumuwa oluyali. 20Olu vali nivakhamukholera enjekheresi, vamufwalula ekanju yesambarau, vamukoosakho enguo chichie. Mana vamuyira erwanyi okhumuvamba.
Yesu Avambwa
(Mat. 27.32-44; Lk. 23.26-43; Yoh. 19.17-27)
21Vayinga owali nikevichira wusa, Simoni wa Kurene, owali nachula mulukongo olwo, simwana ya Aleksanda nende Rufo, okhukinga omusalaba. 22Vamulecha awunju alangwa Gologotha (Eliwola mbo awunju wesianga). 23Vamuwa edivai niyituvanisiywemo manemane, kalova okhunywa. 24Vamuvamba, mana vakavana enguo chichie akachi wawe, nivachikhupira ekura, vanyole njanu owukula sina. 25Yali esa yakhatachu, olu vamuvamba. 26Eandiko liokhumusitaka nilisoma, “Omwami wa Avayahudi.” 27Alala naye vavamba avanuli vaviri, mulala khumukhono mulungi, owundi khumukota. [28Ao kosereswa amaandiko machwenufu akawola, “vamucha alala navavi.”] 29Avavichangao vamucharianga, nivasukusa emichwe kiawe, nivawola, “Yee! Ewe onyala okhusakula Etemperi nokhuliombakha munyinga chitachu, 30yewoniakho wamwene, yikha khumusalaba okwo!” 31Kho ata avakuhani vakhongo vamukholera enjekheresi nivawolana nende avekesi vamalako nivawola, “Kawonia avandi, ne sianyala okhwiwonia omwene ta. 32Lekha Kristo, Omwami wa Israeli, kekhe khanu okhuchula khumusalaba, mbo khuwone mana khusuvire.” Navo avavambwa alala naye vosi vamutukha.
Okhufwa khwa Yesu
(Mat. 27.45-56; Lk. 23.44-49; Yoh. 19.28-30)
33Olu esa sita chiola, esirima siatira esialo siosi okhwola esa tisa. 34Esa tisa Yesu kalira nomwoyo kwamukulu, “Eloi, eloi, lama sabachthani?” Akawola, “Nyasaye wange, Nyasaye wange, esikira sina niwundekhire?” 35Valala khuvali nivemireo olu vawulira vawola, “Wona, alanga Elia.” 36Mulala katima mana kenikha esiangu mudivai enyangu kamuwa anywe, nawola, “Linda, khakhuwone niva Elia alikhwicha amwise.” 37Yesu kakhupa oluwungu, kakwisa omwoyo. 38Epasia mu Etemperi yosukhamo evitonye viviri okhuchula amukulu okhwola aasi. 39Olu omukhongo wavamahe, owali nikemire namulengeye, kawona mbo kali kakhakwisa omwoyo, kawola, “Ng'ali omusacha ono avaye Omwana wa Nyasaye.”
40Khwaliwo nundi navakhasi nivalengerera aleyi, munivo kali Maria Magadalena, nende Maria ng'ina ya Yakopo omutiti nende Yose nende Salome, 41ava olu kali Galilaya vamulondakho, vamukhalavanikhira, ne nundi navakhasi vandi avangi avacha ninaye Yerusalemu.
Yesu Asikhwa
(Mat. 27.57-61; Lk. 23.50-56; Yoh. 19.38-42)
42Olu engolove yola, sikira yali enyinga yokhwicheresa, niluli, olutalo olu Sabato yilonda, 43Yosefu owa Arimathaya, mulala khuvoluyali musikhaso, owali yesi nanatakhatakhanga Owami wa Nyasaye, kekasa kachia khu Pilato, kacheva vamuwe omuviri kwa Yesu. 44Pilato kawuka niva afwiye khale. Kalanga omukali wavamahe, kamucheva niva afwiye khale. 45Olu kamanya okhuchula khumukali wavamahe mbo afwiye, kaana omuviri khu Yosefu. 46Yosefu kakula esanda, ne nikakhamwisa, kamuwoya musanda, kamwalisia musirindwa sivali nivayavire mukina, kakomongomia ekina aamuliango kwesirindwa. 47Maria Magdalena nende Maria ng'ina ya Yose vawona aavali nivamuchaye.
Àwon tá yàn lọ́wọ́lọ́wọ́ báyìí:
Mariko 15: LNTPP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©The Bible Society of Kenya, 2024
