Mariko 16
16
Okhusisimukha khwa Yesu
(Mat. 28.1-8; Lk. 24.1-12; Yoh. 20.1-10)
1Olu esabato yali yakhavicha, Maria Magdalena, nende Maria ng'ina wa Yakopo nende Salome, vakula amafucha kesing'ari, mbo vachie vavakhe omuviri kukwe. 2Mumaweriweri olutalo lwokhuchangira olwechuma vachia enasirindwa enyanga niyisiri okhuchula. 3Vali vanawolananga, “Onachuchusireyo ekina aamuliango kwesirindwa njanu?” 4Nolu valengera amukulu, vawona mbo ekina liali lichusiweyo (liali ekali muno). 5Mana vengira musirindwa, vawona omuwukha nikekhaye khumukhono mulungi, nafwaye enguo endafu, mana vawuka. 6Omuwukha kavawolera, “Muchawuka tawe, mutakhatakha Yesu wa Nazareti, owavambirwe! Asisimukhire, siali ano tawe, wone awunju aavamwalisisie ngano. 7Nausa chie, muwolere avalondi vave nende Petero mbo anavachangiriranga okhuchia Galilaya, eweneyo muchia okhumuwona, nga kavawolera.”
Yesu Awonekhanira Maria Magdalena
(Mat. 28.9-10; Yoh. 20.11-18)
8Kho vachula erwanyi vatima okhuchula musirindwa, nivali nokhuchenga nokhwisindukha. Mana sivawolera khumunju esinju siosi ta, sikira vali variye.
[9Khanu olu venyokha asibuyi olutalo lwokhuchangira olwechuma, kawonekhanira olwamberi khu Maria Magdalena, oyu kali kachusamo evisieno saba.] 10Kachula erwanyi ne kawolera avo avalingi ninaye, nga vali nivalira nokhuverera. 11Nausa olu vawulira mbo asisimukhire nekali awonekhanire khuniye, sivasuvira tawe.
Yesu Awonekhera Avalondi Vaviri
(Lk. 24.13-35)
12Kano nikakhawa, kawonekha mwiva lindi khu vaviri, ngavali nivakenda nivachia mulukongo. 13Vakoola vawolera avandi, nausa sivavasuvira tawe.
Yesu Awonekhera Avalondi Ekhumi na Mulala
(Mat. 28.16-20; Lk. 24.36-49; Yoh. 20.19-23; Evikh. 1.6-8)
14Olundi kawonekha khu ekhumi na mulala avene nga vali nivekhaye khumesa, kavafuchira khulwokhukhaywa esuvira nende owomu wemioyo kiawe, sikira sivasuvira avali nivamuwene nikakhasisimukha ta. 15Kho kavawolera, “Chie musialo siosi mana mwirwache amakhuwa malayi khuvilonge viosi. 16Oyo osuvira navatiswa alikhuwoniwa, naye oyo ochasuvira alikhalakirwa. 17Evimanyiro vino vichia okhulonda avo avasuvira: mulicha liange vachia khutimania evisieno, valikhulomaloma munimi embiakha. 18Valikhutoola enjukha, ne nivanywa esinju sivi, sisichia okhuvawumisa ta. Vachia okhucha amakhono kawe khuvalwaye navalwaye vachia okhusosa.”
Yesu Akulukha Mwikulu
(Lk. 24.50-53; Evikh. 1.9-11)
19Kho nonu Omwami Yesu, nikakhavawolera, kawukulwa okhuchia mwikulu ne kekhala omukhono mulungi okwa Nyasaye. 20Avalondi vachula vachia ne verwacha wuli awunju, naye Omwami kali ninavo nakhola emilimo, kekesa mbo okhwirwacha okhwo khwali khwang'ali okhulondekhana nende evimanyiro vialondana nakhwo. Amina.
Àwon tá yàn lọ́wọ́lọ́wọ́ báyìí:
Mariko 16: LNTPP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©The Bible Society of Kenya, 2024
