Mariko 14
14
Etolondo Yokhwicha Yesu
(Mat. 26.1-5; Lk. 22.1-2; Yoh. 11.45-53)
1Khanu chiali endalo chiviri Pasaka nende esao liemikati kiwumamo emera nivisiri. Avakuhani vakhongo nende avekesi vamalako muwekisi vali vatakha nga vamutira vamwiche, 2sikira vawola, “Khuchamutira esao nilichiririra tawe, namwe khulikhuva nokhuyokera khwavanju.”
Yesu Avakhwa Amarashi Bethania
(Mat. 26.6-13; Yoh. 12.1-8)
3Nolu kali Bethania munju ya Simoni owamakere, nga kali nikekhaye aamesa, omukhasi kali nechupa ya alabasta eyali namarashi ka nardo, akowukusi, kafunukhula echupa ne kachukha amarashi ako khumuchwe kwa Yesu. 4Nausa valio valala aveng'ulung'unya nokhusinyikha, “Sikira sina nikonona amarashi kano? 5Sikira amarashi kano kakhakusiswe khulwa edinari emia chitachu, vawerese avamanani.” Vafuchira omukhasi oyo. 6Nausa Yesu kawola “Lekhe omukhasi ono ave, mumunyasira sina? Kakholeye esinju esilayi. 7Esikira avamanani mulikhuva navo wuli lwosi, munyala okhuvakholera amalayi nga mwenya, nausa simunavenge nange wuli lwosi tawe. 8Akholire esi anyala, avakhire omuviri kwange nikuchasikhwa. 9Ng'ali vawolera, awunju wosi aa Injili yino yichia okhwirwachwa musialo siosi, ekhuwa eliakholire lino lichia okhuwolwa khulwa okhumukhewulira.”
Yudasi Keyama Okhuchama Yesu
(Mat. 26.14-16; Lk. 22.3-6)
10Kho Yudasi Iskarioti owali mulala khwavo ekhumi navaviri, kachia khuvakuhani vakhongo nikenya mbo amuchame khunivo. 11Olu vawulira vasangala, valaka okhumuwa esende. Ne katakha owiyango wokhumuchama.
Yesu Alia Esiokhulia sia Pasaka Navalondi Vave
(Mat. 26.17-25; Lk. 22.7-13,21-23; Yoh. 13.21-30)
12Olutalo lwamberi olwa esao lia Emikati kiwumamo Emera, olu vatisa ememe ya Pasaka, avalondi vave vamucheva, “Wenya khuchie ena khukhucheresere aolira Pasaka?” 13Kachuma vaviri khuvalondi vave, kavawolera, “Chie mwitookho, mulikhuwukanana nomusacha nakingire esongo yamachi, mulondekho. 14Aakengira, wolere mwenenju eyo, ‘Omwekesi acheva, yiri ena enju yavakeni, aandi okhulira Pasaka navalondi vange?’ 15Alikhuvekesa esikoro esikali amukulu esivacheresise khale, ao chulombere.” 16Avalondi vachekukha vachia mwitookho, vanyola kali wusa nga kali navawoleye; ne vacheresa Pasaka. 17Olu engolove yola kacha nende avo ekhumi navaviri. 18Vali khumesa nivalia, Yesu kawola, “Ng'ali, vawolera, mulala khwinywe alikhunjama, mulala onalianga nase.” 19Vanja okhuverera, nokhumucheva mulala siamulala, “Nise?” 20Kavawolera, “Ali mulala khu ekhumi navaviri, mulala onachonganga omukati mupakuli ninange. 21Sikira Omwana womunju achiakhuva nga kaandikirwa, nausa akhoo khuyo ochama Omwana womunju! Wakhavaye wulayi omunju oyo akhaywa okhwiwulwa.”
Esao Liomwami
(Mat. 26.26-30; Lk. 22.14-20; 1 Avk. 11.23-25)
22Nga vali nivalia, kawukula omukati, kakutakasa, kakumekula, kavaweresa, nawola, “Wukule, kuno njomuviri kwange.” 23Kawukula esikombe nolu kali nikakhakhupa ochio kavaweresa vosi vanywa. 24Kavawolera, “Kano njamalasire kange akendakaano, akachukhirwe khulwavangi. 25Ng'ali, vawolera, sinjia khunywakho nundi khutunda liomusabibu ta, okhwola olutalo olunjia okhuyinywa owuyakha muwami wa Nyasaye.” 26Nivakhemba olwembo, vachula vachia khusikulu sia Miseituni.
Yesu Achusa Owunabi mbo Petero ali Okhumwekana
(Mat. 26.31-35; Lk. 22.31-34; Yoh. 13.36-38)
27Yesu kavawolera, “Enywe mwesi muchia okhunjulakho, sikira liaandikwa,
‘Ndikhukhupa omwayi
namakondi kali okhusalana.’
28Nausa ninakhasisimuswa, njia okhuvachangirira Galilaya.” 29Petero kamuwolera, “Ata lekha vosi vakhuchulekho, ese ta.” 30Yesu kamuwolera, “Ng'ali, ekhuwolera esiro sino, etaywa niyichakholiokha khaviri, oli khunjekana khatachu.” 31Naye kawola namaani, “Niva mbo okhwola efwe ninawe, sinjia okhukhwikana ta.” Ne vosi vawola vachio.
Yesu Asala Gethsemane
(Mat. 26.35-46; Lk. 22.39-46)
32Vachia awunju alangwa Gethsemane. Yesu kawolera avalondi vave, “Yikhale ano, nase nisala.” 33Kawukula Petero, Yakopo nende Yohana, mana kanja okhuverera olukali nokhunyakhana. 34Kavawolera, “Omwoyo kwange kuvereye, ata eviokhufwa, tong'e ano, nemuve meso.” 35Kasutakho amberi atiti, kakwa aasi ne kasala mbo, kava kanyalikha, evise evio siviakhamuvayekho ta. 36Kawola, “Papa wange, wulisinju sinyalikha ninawe, chusa esikombe sino khwise. Nichali, lichava elienya liange ta, nausa live elienya lilio.” 37Kakoola kavanyola nivakona, kawolera Petero, “Simoni onakonanga? Siwakhavaye meso ata esa ndala ta? 38Ve meso, musale kho mukhaywe okhukwa mumatemo ta. Omwoyo kwenya nausa omuviri kuweye amaani.” 39Nundi kachia kasala, nawola amakhuwa ako wusa. 40Nundi kakoola kanyola nivakona, sikira emoni chiawe chiali chisitoyire, sivamanya esi vamuchipa ta. 41Kacha olwa khatachu, kavawolera, “Musikona nokhuluwuukha? Kanyalire, esa chiolire, Omwana womunju aanwe mumakhono kavoni. 42Yinyokhe khuchie, wone, owokhunjama kolire.”
Okhutirwa khwa Yesu
(Mat. 26.47-56; Lk. 22.47-53; Yoh. 18.3-12)
43Aenao nasilomaloma, Yudasi kacha, mulala khu ekhumi navaviri, ninaye kali nesituma neng'esi nende evikong'o, okhuchula khuvakuhani vakhongo, avekesi vamalako nende avasakhulu. 44Khanu owokhumuchama kali avekesise esimanyiro, navawoleye, “Oyu njia okhususuna nje niye. Mutire muchie naye nalindirwe.” 45Olu kacha, kachia okhwola khuniye lwangu, kawola, “Omukali!” Mana kamususuna. 46Mana vamukwakho vamutira. 47Mulala khunivo owali nikemireo kachusa olung'esi lulwe kachema okhuchwi khwomukhalavani womukuhani mukhongo. 48Yesu kavawolera, “Mwichire ngavenya okhutira omunuli neng'esi, nesimbo okhundira? 49Wulinyinga nakhava ninanywe mu Etemperi ninekesa, simwandirakho ta. Nausa lekhe endakaano yosereswe nga yaandikwa.” 50Vosi vamuchulakho verukha.
51Omuwukha mulala kamulondakho, nawuma esinju khumuviri nichali olusuuka, vatema okhumutira, 52nausa kefuvachula kalekha olusuka ne kerukha sichula.
Yesu Emberi Wesina
(Mat. 26.57-68; Lk. 22.54-55,63-71; Yoh. 18.13-14,19-24)
53Vayira Yesu khu Omukuhani mukhongo, nende avakuhani vakhongo vosi nende avasakhulu nende avekesi vamalako vakhung'ana. 54Petero kali alondirekho esinao, okhwola kengira mulwanyi lwa omukuhani mukhongo, kali kekhaye navamahe nikocha omuliro. 55Khanu avakuhani vakhongo nende avesikhaso vosi vatakhatakha owuloli khu Yesu kho vamwiche, ne vakhaywa. 56Sikira avangi vachusa owuloli wowuveyi khuniye, owuloli wawe siwafwanana ta. 57Avandi venyokha vachusa owuloli wowuveyi nivawola, 58“Khwawulira nawola, ‘Ndi khusakula Etemperi lino elialombwa namakhono, ne munyinga chitachu nombakhe elindi, elichalombwa namakhono.’ ” 59Ata olwenolwo owuloli wawe siwafwanana ta. 60Omukuhani mukhongo kenyokha akachi wawe, kacheva Yesu, “Owuma eliokhuchipa? Wuloli sina wuno owuvanju vawola khwiwe?” 61Nausa niye kawulera sikachipa ta. Nundi omukuhani mukhongo kamucheva, “Niwe Kristo, Omwana wowekhavi?” 62Ne Yesu kawola, “Nise, mulikhuwona Omwana womunju nikekhaye omukhono mulungi kwamaani, nikacha namaleesi komwikulu.” 63Ne omukuhani mukhongo kosula enguo chichie, kawola, “Khwenyera sina avaveri vandi? 64Mwakhawulira esienyaenye sisie. Muvisia muchie?” Nevosi vamukhalakira mbo kolire okhufwa. 65Valala vanja okhumufuchakho amache, vamutimbia emoni, vamukhupa, nivamuwolera, “Chusa owunabii!” Navalindi vamwakanira nevifusi.
Petero kekana Yesu
(Mat. 26.69-75; Lk. 22.56-62; Yoh. 18.15-18,25-27)
66Petero olu kali nasiri mulwanyi aasi, mulala khuvakhalavani vomukuhani mukhongo kacha. 67Olu kamuwona niketundumia, kamulengera, mana kawola, “Ewe wesi ovaye nende Omunasareti, Yesu.” 68Nausa kekana, nawola, “Simanyire namwe okhung'amula akowola ta.” Ne kachia musiriwa. 69Omukhalavani kamuwona, ne kachanikha nundi okhuwolera avali nivemireo, “Omusacha ono nje mulala khunivo.” 70Nausa nundi kekana. Nevise vititi owali nikemireo kawolera Petero, “Mung'ali oli mulala khunivo, sikira oli wa Galilaya.” 71Nausa kachanikha okhwelaama nende okhwechuva, “Simanyire omusacha oyu munalomalomangakho ono ta.” 72Aenao etaywa yakholiokha olwakhaviri. Ne Petero kechulira nga Yesu kali namuwoleye, “Etaywa niyichakholiokha khaviri, ochia okhunjekana khatachu.” Ne kaverera mana kalira.
Àwon tá yàn lọ́wọ́lọ́wọ́ báyìí:
Mariko 14: LNTPP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©The Bible Society of Kenya, 2024
