Mariko 13
13
Yesu Awola Okhulondana Nokhusakula Etemperi
(Mat. 24.1-2; Lk. 21.5-6)
1Nolu kali nachula mu Etemperi mulala khuvalondi vave kamuwolera, “Omwekesi, lengera, amakina kano simalayi, wonakho amombakho kano!” 2Yesu kamuwolera, “Owona amombakho makali kano? Sikhuchia khutong'a ata ekina elala khulindi, eli vachachia khusakula ta.”
Embi Neminyakho
(Mat. 24.3-14; Lk. 21.7-19)
3Olu kali nikekhaye khu Esikulu sia Miseituni nalengeye Etemperi, Petero, Yakopo, Yohana nende Anderea vamucheva muwekisi, 4“Chuwolere, evinju vino vichia khwikholekha lina, siosi esichia okhuva esimanyiro oluvinju vino vichia okhwikholekha?” 5Yesu kachanikha okhuvawolera, “Muve meso, omunju achacha kavatimia tawe. 6Avangi valicha mulicha liange nivawola, ‘nise niye!’ Nevachia okhutimia avangi. 7Nimuwulira amahe nende eviwuchiriso viamahe, muchesindukha ta. Kano okhwola kekholekhe, nausa esiakamo sisiri. 8Eanga lichia okhusecha eanga lindi, nowuchuki khuwuchuki wundi. Khuchia okhuva nesialo okhuchenga awunju aangi, khuchiakhuva nenjala. Vino viriwusa nga okhwanja khwomukhasi okhulumwa.
9“Nausa mulengere wulayi, sikira vachia okhuvayira muvikhaso, nemuchia okhukhupwa mumasinagogi. Muchia okhwema emberi wavagavana nende avachuki esikira yange, okhuana owuloli emberi wawe. 10Namakhuwa malayi okhwola kalandaaswe khumaanga kosi. 11Nivavalecha muviyalo mana vavaane, muchava neenda mwoyo khuka muchia okhuwola ta, nausa muwole akamuli okhuwereswa esechio, sikira sininywe avalomaloma ta, nachali Roho Muchwenufu. 12Omunju achiakhuana wandaye okhwichwa, papa achiakhuana omwana wuwe, navana vachiokhusandia avewusi vawe nende okhuvaana vechwe. 13Avanju vosi vachia okhuvaviyira okhuvera elicha liange, nausa oyo ochia okhwesimirisa okhwola okhumalirikha, achia okhunyola owuwonia.
Owutinyu Owukali
(Mat. 24.15-28; Lk. 21.20-24)
14“Olu muwona esifwavi siesienyaenye nivemia aasichenyekha okhuva (lekha osoma amanye), lekha avo avali Yudea verukhire muvikulu. 15Naye oyo oli khusisuli sienju achekha namwe kengire munju yiye, okhuwukula siosisiosi ta. 16Lekha oyo oli mumukunda alove okhukoola okhuwukula oluvaala lulwe ta. 17Ne akhoo khwavo avali navana nende avo avanunia endalo echio! 18Sale mbo kano kachekholekha munyinga chiomunyichi ta. 19Sikira munyinga echio khuchiakhuva nokhunyakhana nga khusiri khuvakhoo okhuchula mukhwanja khwokhulonga khwevinju evi Nyasaye kalonga okhwola evise vino, ne sikhulivawo nundi ta. 20Niva Omwami sikakutuasa endalo echio, awumao omunju owakhawonire, nausa khulwa yavachoole vave, kakutuasa enyinga echio. 21Niva omunju yesiyesi achia okhuvawolera, ‘Lengere, Kristo ngwono ano!’ Namwe ‘Lengere, ngwoyo ao!’ Muchasuvira ta. 22Kristo vowuveyi nende avanabii vowuveyi vachia khwewukha mana vekese evimanyiro nende amangayimwa, okhutimia, ata nikanyalikha, avachoole va Nyasaye. 23Nausa yefwire, evawoleye evinju viosi nivisiri okhwekholekha ta.
Okhwicha Khwa Omwana womunju
(Mat. 24.29-31; Lk. 21.25-28)
24“Nausa mundalo echio, omunyakhano nikwakhawa, enyanga yichia okhumaliya, omwesi sikuchia okhuana owulafu ta, 25eng'eniesi chichia okhukwa okhuchula mwikulu, neviamaani mwikulu vichia okhuchenjesiwa. 26Valikhuwona Omwana womunju nikacha mumaleesi namaani amangi noluyali. 27Ali khuchuma engelosi, vawungerese avachoole vave okhuchula mumbeka chine, okhuchula khusiakamo siesialo okhwola khusiakamo siekulu.
Olukaato lwa Omukhuyu
(Mat. 24.32-35; Lk. 21.29-33)
28“Okhuchula khumukhuyu yeke esifune sino. Nga amasaka kakwo kokoyala kachunune amasafu, mumanyanga mbo esiminyu siri aambi. 29Kho nga muwona evinju vino nivikholekha, mumanye mbo ali aambi, ao aamuliango. 30Ng'ali yene, vawolera, olwiwulo luno siluchia okhuvicha okhwola evinju vino viosi vikholekhe tawe. 31Ekulu nelova vichia khuvicha, nausa amakhuwa kange sikachia khuvicha ta.
Awumao Omanyire Olutalo namwe Evise
(Mat. 24.36-41)
32“Nausa olutalo olwo namwe esa eyo awumao omanyire, ata engelosi mwikulu, namwe Omwana, nausa Papa yeng'ene. 33Chekerese, muve meso, sikira simumanyire oluvise virikhwola ta. 34Yiri ngomunju ochia khulukendo, olu achula engo nalekhera oweyangu wuwe omukhalavani wuwe, wuli siamulala nende emilimo kikie, nalakirisa omulengeresi okhuva meso. 35Ve meso nonu, sikira simumanyire olu mukali wenju alikhukoola, angolove, namwe akachi wesiro namwe engokho nichikholiokha namwe asibuyi 36namwe kache wusa lwangu navanyole nimukona tawe. 37Esivawolera enywe, mbolera vosi, muve meso.”
Àwon tá yàn lọ́wọ́lọ́wọ́ báyìí:
Mariko 13: LNTPP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©The Bible Society of Kenya, 2024
