Ufaru 2
2
1Ne ɗa u kotoi mayan ma zuva ni iɗa ni ili i na i ri pe suru. 2Ana A̱sula̱ o kotoi ulinga u na u yuwusain, a̱vu wi ivuwan o urana we cindere a̱tsuma̱ o ulinga u na u yuwain. 3Reve A̱sula̱ a zuwaa urana wa̱ cindere'e aba'un, a̱vu wo o'woto yi urana u na u ɗangwai, adama a na o urana u ɗaɗa wi ivuwain a̱tsuma̱ a linga na u yuwain.
Ada̱mu na̱ Hawa
4A̱yi nda a̱yi ɗa alabari cine A̱sula̱ a yuwain zuva ni iɗa a mantsa ma na u yuwan nle. A mantsa ma na Mogono ma̱ A̱sulazuva ma yuwain iɗa na̱ zuva, 5koto ototopi a atsusa a̱ shi o uvaɗi shi waru koto a̱vu'un a̱ shi o uta̱ e iɗa shi. Mogono ma̱ A̱sulazuva koto ma̱ shi ma zuwa iro'i o uvaɗi shi, waru za lo na waa cimba iɗa shi, 6amma mini ma̱ shi ta̱ ma̱ tsu uta̱ reve u re'weto iɗa suru. 7Na̱ ma̱buta̱ me iɗa ma ɗa Mogono ma̱ A̱sulazuva ma rumai vuma,#2:7 E elentsu a aza a Yahuda, <<vuma>> ni <<iɗa>> ɗewu le o rotsuloi ta̱. a̱vu wi ivula̱a̱ yi wivuwun u wuma a̱ vunu va̱ yi, a̱vu vuma'a wo o'wo ili i wuma. 8A̱vu u yuwan a̱a̱rumbu pe a Adini ɗe a asana, ɗe ɗa u zuwai vuma na u rumai'i. 9Ɗanga na da̱na̱i ili i maluwa ma̱ a̱ka̱nla̱ suru, aza a sa'ani adama a alya, u zuwa le ta̱ o uta̱ e iɗa. Uɗanga u na u tsu ca wuma nu uɗanga u na waa zuwa mereve me isa'ani ni iwuya waru o uta̱ e memere ma̱ a̱a̱rumbu'u. 10Uɗolu u yeneshe ta̱ diga Adini reve u tsun a̱a̱rumbu'u mini, lo ɗa waru wu kasai wo o'woi aci o ɗolu na̱shi. 11Aala o uɗolu wa nyan Pishon ɗa, a̱yi ɗa wee yeneshe a̱ ka̱nda̱ruwa̱ iɗa ya Havila suru, uba̱ta̱ u na zinariya ri. 12Zinariya vi iɗa'a u ta̱ ulobonu lon waru atali o ulobonu e ikebe a̱ ta̱ pe e iɗa'a. 13Aala o uɗolu we ire a̱yi ɗa Gihon, a̱yi ɗa wee yeneshe a̱ ka̱nda̱ruwa̱ iɗa ya Kush#2:13 Kush A̱yi ɗa Itofiya vo gogo. suru. 14Aala o uɗolu wa ta'atsu a̱yi ɗa Tigiris, za na ee yeneshe na asana a Asiriya. Uɗolu wa̱ na̱shi gba a̱yi ɗa Yufireti.
15Reve Mogono ma̱ A̱sulazuva ma tara vuma'a, a̱vu u zuwa yi pe a̱ a̱a̱rumbu'u, tsa̱ra̱ u ka̱lyuwusa̱ yi, waru tsa̱ra̱ u linga yi. 16Waru u zuwaa ta̱ vuma'a wila̱ u damma, <<A lyawa wu ta̱ vu lyuwa a̱tsuma̱ a ɗanga na ri pe a̱tsuma̱ a̱ a̱a̱rumbu'u pere. 17Amma uɗanga u na waa zuwa wu vu reve isa'ani ni iwuya a lyawa wu vu lyuwa yi shi. She vu lyuwa muwun mu uɗanga u ndolo wan, adama a na urana u na vu lyuwa niyi suru, ili i ro yi lo shi vu ta̱ kuwa̱.>>
18Reve Mogono ma̱ A̱sulazuva ma damma, <<U ri ulobonu vuma'a u da̱nu a̱yi a̱ nde'en shi. N ta yuwaan yi kambi na vaa ntsaa yi.>>
19A̱vu u ruma inama na̱ nnunu suru na̱ ma̱bula̱ me iɗa. Reve u tara le a̱ ta̱wa̱ uba̱ta̱ u vuma'a, tsa̱ra̱ u ɗangwa ala a na waa ca le. Reve gba aala a na vuma'a u ɗeyi ili i wuma suru, a̱yi ɗa wo o'woi aala a̱ yi. 20Reve vuma'a u ca inama yu u'wa ni inama yu una na̱ nnunu'u ala suru.
Agba a̱ tsura̱ kambi na vu ntsaa niyi shi. 21Ɗaɗa Mogono ma̱ A̱sulazuva ma zuwai vuma'a u lantsai kwin. A̱yi a̱tsuma̱ a nlavu, a̱vu u tara eetele a̱ ta̱ a makambu ma vuma'a, a̱vu u to uba̱ta̱'a̱ na̱ nama. 22A̱vu u yuwan ka na̱ makambu ma na wu uta̱yi a vuma'a, a̱vu u ta̱wa̱a̱ yi na̱ yi.
23A̱vu vuma'a u damma, <<A̱ tyo o ukosu, apa eetele a na a tarai e etele a̱ va̱, na̱ lipu na a tarai a̱ lipu va. E te ɗe yi <Ka> o una̱ u na a tara niyi a̱tsuma̱ a vali.>>#2:23 E elentsu a aza a Yahuda, <<vali>> na̱ <<ka>> e ɗewu le o rotsuloi ta̱. 24Adama o ndolo a ɗa vali aa lyawa dada na̱ mma va̱ yi, reve u suraa ka va̱ yi, ele ra oo o'wo ili i ta̱.
25Vali na̱ ka ele ra ataɓu a ɗa a̱ da̱na̱i, agba a uwwa wono shi.
Àwon tá yàn lọ́wọ́lọ́wọ́ báyìí:
Ufaru 2: TSW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©️2025 Language Development and Translation Initiative (LDTI)