Ufaru 1
1
A̱sula̱ a yuwan ta̱ uvaɗi
1A̱tsuma̱ o ufaru, A̱sula̱ a yuwan ta̱ zuva ni iɗa. 2Kpasa kpasa ɗa uvaɗi u da̱na̱i, u shi ni ili shi. Irumbu i ɗa yi palai urewesu wu uvaɗi. A̱vu Ruhu va̱ A̱sula̱ da̱na̱ e ilama zuva mini. 3A̱vu A̱sula̱ a damma, <<Ekan o o'wo.>> Ɗaɗa ekan o o'woi. 4Reve A̱sula̱ e ene eka'an ulobonu, ɗaɗa wu kasai ekan ni irumbu. 5A̱sula̱ e ɗe ta̱ eka'an <<urana,>> irumbu waru u ɗe yi <<ayin.>> A̱vu wo o'wo ulivu nu usana, urana wa nyan.
6Reve A̱sula̱ a damma, <<Lyawa agalaci o o'wo e memere, adama wu kasa mini na̱ mini.>> 7A̱sula̱ waru a yuwan ta̱ agalaci, a̱vu wu kasa mini ma na ma̱ ri pe e iɗa na̱ za va zuva, ne ɗa wo o'woi. 8A̱vu A̱sula̱ e ɗe agalaci'i <<zuva.>> A̱vu wo o'wo ulivu nu usana, urana we ire.
9A̱vu A̱sula̱ a damma, <<Lyawa mini ma na ma̱ ri za̱la̱ ve eleshe mo ɓoloto uba̱ta̱ u ta̱, tsa̱ra̱ u lyawa iɗa yu u'yewu.>> Ne ɗa wo o'woi. 10Reve A̱sula̱ e ɗe upasu wu u'yewu'u <<iɗa>>, mini ma na mo ɓolotoi uba̱ta̱ u ta̱, u ɗe yi ta̱ <<mala.>> A̱vu A̱sula̱ e ene u lobono ta̱. 11A̱vu A̱sula̱ a damma, <<Lyawa iɗa yu uta̱a̱ anlya ni ili yi ca̱'a̱n na̱ ɗanga na vaa matsan muwun, suru nle ni icu'un i na aa matsan.>> Ne ɗa wo o'woi. 12Ne ɗa iɗa yu uta̱yi anlya ni ili yi ca̱'a̱n na̱ ɗanga na vaa matsan muwun, suru nle ni icu'un i na aa matsan. Ne ɗa u yuwan nle icu'un icu'un. A̱vu A̱sula̱ e ene u lobono ta̱. 13A̱vu wo o'wo ulivu nu usana, urana wa ta'atsu. 14A̱vu A̱sula̱ a damma, <<Lyawa ili ye ekan yu uta̱ a agalaci a zuva a kakasa urana na ayin. Wo o'wo ili i na yoo roco tsu mantsa, na̱ rana na a'wan. 15O o'wo ekan ɗe zuva, a ca uvaɗi ekan.>> Ne ɗa wo o'woi. 16A̱sula̱ a yuwan ta̱ ekan a gbain e re, za gbain yuwan tsugbain tsu urana, za wa'a yuwan tsugbain tsa ayin. Reve waru u yuwan italyo'o. 17Reve A̱sula̱ a zuwa le adama a na aa ca uvaɗi ekan. 18A yuwan tsugbain tsu urana na ayin, a kakasa ekan ni irumbu waru. A̱vu A̱sula̱ e ene u lobono ta̱. 19A̱vu wo o'wo ulivu nu usana, urana wa̱ na̱shi.
20A̱vu A̱sula̱ a damma, <<Lyawa ɗolu shiwan ni ili i wuma, a̱vu waru nnunu mu 'yawan zuva icu'un icu'un.>> 21A̱vu A̱sula̱ a yuwan ili i gbagbain a mala, ni ili i wuma a̱ ma̱zungwa̱, aza a na a matsain a̱ mini pere icu'un icu'un, nnunu n tsu'yan waru icu'un icu'un. A̱vu A̱sula̱ e ene u lobono ta̱. 22A̱vu A̱sula̱ a zuwaa le aba'un, adansa, <<I yuwan a̱bunda̱ lon, i shiton mala. Nnunu waru, i shiton uvaɗi.>> 23A̱vu wo o'wo ulivu nu usana, urana wa tawun. 24Reve A̱sula̱ a damma, <<Lyawa iɗa yu uta̱a̱ ni ili i wuma, suru nle no oroci e le: inama yu u'wa, ni inama yu una, ni inama yi ika̱ta̱pu.>> Ne ɗa wo o'woi. 25Ne ɗa A̱sula̱ a yuwain inama yu u'wa ni inama yu una ni icu'un i le. Waru u yuwan a̱za̱ e ika̱ta̱pu ni icu'un i le. A̱vu A̱sula̱ e ene u lobono ta̱.
26A̱vu A̱sula̱ a damma, <<Lyawa tsu yuwan vuma oroci a̱ tsu, o o'wo ngono e ekere a mugula, ni ili i na i ri pe a̱tsuma̱ a mala na̱ nnunu ma zuva, ni inama yu u'wa, ni ili i na i ri wuma a̱tsuma̱ o uvaɗi, ni ili i na i ri e ika̱ta̱pu e iɗa.>> 27Oroci a̱ A̱sula̱ a ɗa A̱sula̱ a yuwain vuma. Vali na̱ ka ɗa u yuwan nle. 28A̱vu A̱sula̱ a zuwaa le aba'un, u damma, <<I matsan a̱bunda̱, i shiton uvaɗi.>> U zuwa le ta̱ a yuwan tsugbain tse ili i na u yuwain: mugula na̱ nnunu, ni ili i na i tsu wala e iɗa suru. 29Reve A̱sula̱ a damma, <<Nlo n yuwaan ɗu ili yi ca̱'a̱n na̱ ɗanga na aa matsan muwun icu'un icu'un a̱tsuma̱ o uvaɗi suru adama i lyuwa. 30Adama a̱ nnunu ni inama, nlo anlya na̱ ɗanga va̱ a̱vu'un suru adama a na aa lyuwa.>> 31Ana A̱sula̱ a̱ ka̱lyuwa̱i ili i na u yuwain, reve we ene u lobono ta̱ lon. A̱vu wo o'wo ulivu nu usana, urana wa̱ ta̱li.
Àwon tá yàn lọ́wọ́lọ́wọ́ báyìí:
Ufaru 1: TSW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©️2025 Language Development and Translation Initiative (LDTI)