Ufaru 3
3
Unusu u vuma
1A̱tsuma̱ e inama yu una i na Mogono ma̱ A̱sulazuva ma yuwain suru, yo ɗa la'ai ugbozu. A̱vu we ece ka'a, <<Ko Mogono ma̱ A̱sulazuva ma damma ɗu ta̱, she i lyuwa ko uɗanga u ta̱ a̱ a̱a̱rumbu'u wan?>>
2Reve ka'a u usu yi, <<Tsu ta gura lyuwa pe a limatan vu ɗanga va̱ a̱a̱rumbu'u. 3Amma A̱sula̱ a damma tsu ta̱, <Yaa lyuwa pe a limatan vu uɗanga u na u ri pe e memere ma̱ a̱a̱rumbu'u waru ya̱a̱ ju'wa̱n shi adama i kuwa̱ wan.> >>
4Reve yo'o u usu ka'a, <<Amayun a ɗa na ya̱a̱ kuwa̱ shi. 5A̱sula̱ a damma ta̱ ne, adama a na u revei urana u na i lyuwa niyi, esu a̱ ɗu a̱ ta̱ kpa̱tu'wa̱ reve yo o'wo cine u ri.#3:5 E elentsu a aza a Yahuda, tsu reve ko urevu, <<I to o'wo cine A̱sula̱ a̱ ri>> ko <<I to o'wo cine musula̱ n ri ɗa shi.>> Urevu wa̱ yi wu uta̱ a alanga eteshe shi. I te reve isa'ani ni iwuya.>>
6A̱vu ka'a we ene cine uɗanga'a u ri ulobonu wa̱ a̱ka̱nla̱, nu cine muwun mu uɗanga n ri ulobonu adama a alya, a̱vu u jiyan u to lobono vuma da̱na̱ nu ugbozu lon. Reve u taɓa muwun mu uɗanga'a, a̱vu u lyuwa. A̱vu u cashi vali va̱ yi, a̱vu fo vali va̱ yi u lyuwa. 7Ɗaɗa gba esu e le a̱ kpa̱tu'wa̱i, a̱vu e reve a na ataɓu a ɗa a̱ ri. A̱vu a zami a̱vu'un o ubiri a̱ zula̱a̱ aciyele nkuru.
8Nu ulivu u ndolo, a̱vu a uwwa ilama i Mogono ma̱ A̱sulazuva pe a̱ a̱a̱rumbu'u a agara. A̱vu vali na̱ ka'a a pa'an yi pe a ɗanga va̱ a̱a̱rumbu'u. 9Reve u ɗe vuma'a, <<Te vu ri?>>
10A̱vu u usu, <<Mu uwwa ta̱ ilama ya̱ wu a̱ a̱a̱rumbu'u, a̱mu gba mu uwwa ta̱ wovon, adama a na aataɓu a ɗa n ri. Ɗaɗa m pa'ain.>>
11A̱vu Mogono ma̱ A̱sulazuva ma damma, <<Zane ɗa damma nuwu aataɓu a ɗa vu ri? Vu lyuwa ta̱ muwun mu uɗanga u na n damma nuwu she vu lyuwa wan?>>
12Reve vali'i u usu, <<Ka na vu ca numu, a̱yi ɗa u ca numu muwun mu uɗanga'a, ɗaɗa gba a̱mu n lyuwai.>>
13Reve Mogono ma̱ A̱sulazuva me ece ka'a, <<Nye i zuwai vu yuwain cu'un ndolo?>>
A̱vu u usu, <<Yo ɗa luluma̱ numu, ɗaɗa gba n lyuwai.>>
A̱sula̱ a yuwan ta̱ adanshi adama o uge'etosu
14A̱vu Mogono ma̱ A̱sulazuva ma damma yo'o, <<Ana vu yuwain cu'un vu ulinga u nda, n yuwaan wu ta̱ una̱ a̱tsuma̱ e inama yu u'wa ni inama yu una. A̱vu a̱ nde'en ɗa una̱ u ndolo woo toni. Diga gogo, na̱ a̱a̱tsuma̱ a ɗa vaa walaa. Ma̱buta̱ ma ɗa va̱a̱ muɗa̱ hali vu kuwa̱. 15N ta zuwa a̱vu na̱ ka'a i 'yuwunlai. Limatan va̱ wu na̱ limatan va̱ yi a ta 'yuwunlai hali hali hali. Limatan va̱ yi to koɗo aaci a̱ wu, a̱vu waru vu ta ka̱ɗa̱ a̱civa̱ a̱ yi.>>
16Reve u damma ka'a, <<N ta zuwa wu vu sowo a̱tsuma̱lima̱ a̱ a̱bunda̱ na̱ a̱a̱tsuma̱, na̱ a̱tsuma̱lima̱ a ɗa vaa matsan muwun. Majiyan ma̱ wu ma̱ ta̱ ka̱mba̱ uba̱ta̱ u vali va̱ wu, a̱yi ɗa woo o'wo zagbain va̱ wu.>>
17Reve waru u damma Ada̱mu, #3:17 E elentsu a aza a Yahuda, aala <<Ada̱mu>> urevu wa̱ yi u ɗa <<vaɗilima̱.>> a̱ <<Ana vu zuwai atsuvu a̱ wu a adanshi a ka va̱ wu, hali vu lyuwa o uɗanga u na m putsa nuwu na alya, adama a̱ wu a yuwaan ta̱ iɗa una̱. Nu usa̱n u ɗa vaa lyuwa, hali urana u na va̱a̱ kuwa̱. 18Awanda na̱ ma̱lyo ma ɗa moo uta̱ o uɗuma̱ wa̱ wu. Waru vu ta tama a̱vu'un a atsusa. 19She na̱ melen o urewesu wa̱ wu u ɗa vaa lyuwa ilyalya, hali urana u na va̱a̱ ka̱mba̱ e iɗa, adama a na pe ɗa o uta̱a̱ nuwu. A̱vu ma̱buta̱ ma ɗa, waru ma̱buta̱ ma ɗa va̱a̱ ka̱mba̱.>>
20A̱vu Ada̱mu ca ka va̱ yi aala Hawa adama a na a̱yi ɗa woo o'wo mma va aza a wuma suru. 21Reve Mogono ma̱ A̱sulazuva ma yuwaan vuma'a na̱ ka va̱ yi itana na̱ kwan vi inama. 22Reve u damma, <<Ana wo o'woi vuma o'wo ta̱ tsa̱ tsu, nu urevu wi isa'ani ni iwuya; u ta̱ gura canana ukere wa̱ yi waru reve u taɓa umatsun wu uɗanga u na u tsu ca wuma a̱vu u lyuwa, reve u da̱na̱ wuma babu ukotu.>>
23Reve wu uta̱a̱ yi pe a̱tsuma̱ a̱ A̱a̱rumbu a Adini'i, a̱vu u zuwa yi u cimba ma̱bula̱ ma na a yuwan niyi na̱ a̱yi. 24Ana wu uta̱i vuma'a, reve u zuwa kerubin asana a̱ A̱a̱rumbu a Adini'i, na̱ matsun me pe'eni a madala ma akina a̱ ka̱nda̱ruwusa̱ adama e geshe ure a rawa uba̱ta̱ wu uɗanga u na u tsu ca wuma'a.
Àwon tá yàn lọ́wọ́lọ́wọ́ báyìí:
Ufaru 3: TSW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©️2025 Language Development and Translation Initiative (LDTI)