Jeelim 12
12
Miriam de Aron nwoŋi Moses kwaga ne
1Miriam de Aron déem maa jege Moses ba lwɛa, o na di Kusi tiina bukɔ o ma ke o kaane to ŋwaane. 2Ba maa we, “Moses yerane mo Baŋa Wɛ yeini o tɔge o baŋa o ŋɔɔne de o nɔɔna bam na? O ba tɔge debam de baŋa o ŋɔɔne de-ba na?” Baŋa Wɛ ma ni ba ŋwaana yam. 3Ko nam ná ye Moses, o déem tiini o tu o tete tega ne mo se ko dwoni logo baŋa nɔɔna maama.
4 Baŋa Wɛ ma pɔpɔ o ta de Moses, de Aron, de Miriam o we, “Zaŋe-na á ba wara-jei sem ne se á maama zege amo yiga ne.” Ba ma seene ba vo ba zege da. 5Baŋa Wɛ laam ma chu o ba o zege wara-vwei ni dem ne, ye kunkwoŋo na zege deiki to kwoli‑o. O ma bwoŋi Aron de Miriam se ba fɔɔre ba yi o tei. Banto balei bam ma ke konto. 6Baŋa Wɛ ma ta-ba o we:
“Nam fɔge á cheigi-na amo taane dento!
Amo Baŋa Wɛ ná yeini a pa se a ni-jwoŋinu wo abam tetare ne,
a wó veere wonnu a bere‑o,
ye a daare a ŋɔɔne ded‑o dendwea wone mo.
7Ko nam ná ye a tontoŋeno Moses,
amo ba ke konto dwoŋi ded‑o.
Amo yɔɔre a kwei a nɔɔna bam
a ke wonto jeŋa ne mo se o taa nii-ba.#Hiburu 3:2
8A maa yeini a pa se dé jeeri daane yibia de yibia,
se a ŋɔɔne ded‑o jaja,
ye ko dae de dende mo a maa bere‑o wonnu.
Wonto mo yɔɔre o nii o nae amo nyenyego.#Nia Gulim 34:10
Konto to, bɛ mo ye á ba fona se á ta‑á jege amo tontoŋeno Moses á ŋwaana?”
9 Baŋa Wɛ bane ma tiini de zaŋe de Aron de Miriam ye o zaŋe o kɛ o daare-ba.
10Kunkwoŋo kom ma gɔ ko tete wara-vwei dem baŋa ne. Sento nɛ sem ni ne mo Miriam yera tiini ya peere dedaane naywaane jaweo kom.#Nwoŋim 4:6 Aron ma pipiri o nii o na kolo na ke Miriam yera ne to. 11O ma tiini o lwoori Moses o we, “Dé kwo, jan ja! Dé lwoori‑m se n yé waare debam dé tusim dento ŋwaane. Debam tiini dé toŋe jworim mo. 12Nii ko baŋa ne se Miriam yé taa nye de bu-too wolo yera na moore to!”
13Moses de ma kaase o jare Baŋa Wɛ ye o we, “Amo tu Wɛ, jan ja! Pa se o na yazura.”
14 Baŋa Wɛ ma leiri Moses o we, “Miriam kwo ya ná twe lileeru o ke o yibia ne, ko ya wó pa se o di chaveera se ko yi da yarepɛ mo. Konto ŋwaane, pa-na se o nwoŋi dáa Isarele tiina bam wone, se á daare á pe‑o da yarepɛ. Ko kwaga ne se á pa‑o chwoŋa se o jwoori o taa zoore ba wone.” 15Ba ma seene ba ke konto. Isarele tiina bam déem ma maŋe jei sem konto ne se ko yi da yarepɛ. Miriam ma jwoori o zo ba wone, ye ba zaŋe ba kɛ.
16Konto kwaga ne mo ba zaŋe Hazerofa ne ye ba laam vo ba yi Paran kagoa kam. Ba ma chwi ba vwoa dáane.
Àwon tá yàn lọ́wọ́lọ́wọ́ báyìí:
Jeelim 12: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)