Jeelim 11
11
Isarele tiina pompona kam
1Nɔɔna bam déem na nɛ cham dwi dwi to, mo ba yɔɔre ba poone ye Baŋa Wɛ ni ba pompona kam. O na nigi to, o bane ma zaŋe de-ba ye o pa se mini di ba na chwi ba vwoa yam mɛ daa dedoa to nia yam. 2Nɔɔna bam ma lwoori Moses se o woli-ba. O de ma lwoori Wɛ, ye mini dem dwei. 3Ba ma bwoŋi jei sem yere we ‘Tabera’. #11:3 Tabera kuri mo ye zwɛɛm Ko maa ye Baŋa Wɛ na pɛ se mini zwɛ ba vwoa yam to ŋwaane mo.
4Nɔn-wo-korro déem tɔge ba wo Isarele tiina bam wone pa ba via. Banto fera ma tiini ya zo wodiiru tedwonna. Isarele tiina bam de ma bobo se ba ŋwaana ba we, “Dé ya ná nɛ nɔna se dé done, ko ba gare tento na? 5Dé déem na wo Ejipti wone to, dé nae ywona dé di zɛɛra. Dé ta di nyambɔla, de gaana, de gaburu dwi dwi, de gaaliki, ne dé boboŋa na lage tei to mo. 6Nam nii! Dé yera chɛ mo. Wodiu kolo yerane dé na yɔɔre dé nae to ye Manna kanto mo!”
7Manna déem nye dedaane nyansaŋa bia mo. Ko maa ye napwoŋo ne sabare-keira maaro tei. 8-9Manna yam déem yeini ya tɔge de nyɔnɔ mo ya toe tete ne. Nɔɔna bam maa yeini ba nwoŋi ba pɛ-ya ba cho, naa ba zɔ-ya, ye ba laam saŋe muni dem ba ke nenɛɛne pɛɛla dwoŋi tei. Ba déem ná di-ya, ya nye de bworobworo mo ba na wɔge de nuga.
10Diga maama de ka nɔɔna déem wo ba vwoa yam ni ne mo ba poona, ye Moses ni ba pompona kam. Baŋa Wɛ bane ma tiini de zaŋe pa se Moses wo chɔge ko ŋwaane. 11O ma lwoori Baŋa Wɛ ye o we, “Amo Tu Wɛ, bɛ mo ke ye n kwei cham dento n pa-ne? Bɛ mo a ke a chɔge n yiga, ye n pa se nɔɔna banto jege-ne ba daana? 12Ko dae amo mo naane-ba, a nam wo loge-ba. Nmo ta wó pa se a ke-ba a ja-kukworo ne, a daare a ja-ba se dé vo dé yi tega kalo nmo na gwoni ni de dé nabaara se n kwei n pa-ba to na? 13Ba nam na tiini ba poone nɔna ŋwaane konto to, amo lage a na-ya yein-seeni mo a pa-ba? 14Totoŋe dem n na kwei n pa-ne to tiini de dwoi a jaanem. Amo yerane ware nɔɔna bam a ja. 15Ko ná ye tento mo n kuri se ko taa ye amo yera ne, se n duri amo yibwona n daare n le a ŋwea lela se a sii de yaara yanto!”
Nakwa fuserepɛ
16 Baŋa Wɛ déem ma ta de Moses o we:
“Nam kuri Isarele nakwa fuserepɛ balo nmo na yei we ba ye yiga tiina ye nɔɔna nege-ba lanyerane to. Pa se ba tɔge de nmo ba ba wara-jei sem se á maama zege amo yiga ne. 17Amo wó tu a ba a ŋɔɔne dede‑m dáane ye ba zege ba nia. Amo laam maa wó pwori jworo kolo n na jege n toŋe n totoŋa yam to wone a ke banto de yera ne. Konto mo wó pa se ba de wane ba da ba woli‑m se n ta‑n nii nɔɔna bam baŋa ne, ye ko daa bá taa ye nmo yerane mo wó taa jege-ba n nia.
18Se ko ná ye nɔɔna bam, se n ta de-ba we: ‘Kwɛ-na á tete se á jwa wó na nɔna se á done. Baŋa Wɛ seene o ni á pompona kam de á na tage á we, á fera zo nɔna donem, ye á Ejipti ŋwea kam ya gare á leile ŋwea kam to. Tɔ. Baŋa Wɛ wó pa abam nɔna ye á jege se á done-ya mo. 19Á nam na wó done nɔna yam tei to, ko dae dɛ dedwe, naa da yalei, naa da yanu, naa da fuga, naa da finlei wone. 20Se chana wone, á wó done nɔna mo dɛ maama taa se ya ba ya taa lwoi á momwa ne. Á lage á leere-ya mo. Kokuri to, á ve Baŋa Wɛ wolo na wo á tetare ne to mo, ye á poone o yiga ne we ko ya dae se á nwoŋi Ejipti teo wone.’ ”
21Moses ma leiri Baŋa Wɛ o we, “Baara bam na wo amo tei ne ye ba vei tega ne to ye morro bia yaredo (600,000) mo. Nmo laam nam tage we n wó pa ba maama nɔna se ba taa done dɛ dɛ se ko yi chana mo na? 22Dé ná lage dé go dé naane dem maama, de dé vare-balwa bam maama, ko ta bá yi ba dim. Dé ná gɔɔne naneo wo ywona yam maama dé pa-ba, ko bere ko bá yi-ba!” 23Baŋa Wɛ ma bwei‑o we, “Amo dam dem muri mo na? Cheigi fee se n ma‑n lɔre we kolo a na tage to lage ko ke mo.”
24Moses ma nwoŋi o vo o ta de nɔɔna bam kolo Baŋa Wɛ na tage to. O ma kuri Isarele nakwa fuserepɛ, ye o daare o pa ba zege ba kaare wara-jei sem. 25Baŋa Wɛ ma tu wara-vwei dem ne ye kunkwoŋo kom kwoli‑o. O ma ŋɔɔne de Moses, ye o daare o pwori jworo kolo Moses na jege o ma o toŋe to wone o pa nakwa fuserepɛ bam dedoa dedoa. Jworo kom na tu ba baŋa ne konto to, mo ba bobo se ba taa pworisa. Ba nam daa wo pworisi ba woli da maŋa kadwoŋi ne.
26Eledadi de Medadi de déem wo nakwa fuserepɛ bam wone mo. Ba ma maŋe ba vwoa yam seeni, ye ba wo tɔge ba zo wara-jei sem ne. Ba na wora konto to, mo jworo kom tu ba baŋa. Ba de ma bobo se ba taa pworisa. 27Nɔn-doŋo kodwoŋi ma duri o vo o yi Moses tei, ye o ta o bere‑o o we, Eledadi de Medadi wora ba pworisa ba vwoa yam seeni. 28Nun bu Josua nam déem maŋe o zege o nɔn-donne maŋa ne mo o toŋe o woli Moses. O ma ta de Moses o we, “Dé kwo, che-ba de ba keim dem konto!”
29Moses ma leiri‑o o we, “Ko ye amo ŋwaane mo n jege boboŋa konto dwoŋi na? Nam yage! Amo tei ne, Baŋa Wɛ ya ná pɛ se o nɔɔna bam maama su de o jworo pa se ba pworisi nenɛɛne Wɛ ni-jwoŋina bam na yeini ba ke tei to, ko ya gara.” 30Moses dedaane nakwa fuserepɛ bam maama laam ma jwoori nɔɔna bam na chwi ba vwoa jei selo ne to.
Baŋa Wɛ toŋe lwi pa se nɔɔna pɛ-se
31 Baŋa Wɛ déem ma pa se vo-dɛɔ tiini ko dole. Vio kom ma kale lwi pa se se nwoŋi naneo kom seeni, ye se laam ba se kaare nɔɔna bam na chwi ba vwoa mɛ to seeni.#Nwoŋim 16:13 Se déem na jaane wɛɛne tei to zaŋe ko yi jatwogo maŋem kuni belei mo de tega kam. Se ma faare tega kam maama se ko vo ko yi dɛ dedwe veiŋa mo jei maama ne. 32Da yalei puna puna mo nɔɔna bam déem kwei, wea de tete maama, ba ma ba jaane lwi sem. Ba na lage-se ba tiŋi to nɔɔno maama lwi sem dunni déem wo muri kuriwaa bia bi. Ba déem ma jare-se ba tiŋi jei sem maama ne. 33Lwi sem nɔna yam ta na wo nɔɔna bam nia ne ye ba ta wo di ba ti to, mo Baŋa Wɛ bane zaŋe de-ba. O ma pa se jawe-chɛɛro to ba tetare ne. 34Ba déem ma kwei nɔɔna bam dedɛ ba suli, jaweero tem na go-ba to ŋwaane. Ba ma bwoŋi jei sem konto we ‘Kiberof-Hataava’#11:34 Kiberof-Hataava kuri mo ye Fera Yibeela, kokuri to ba suli balo fera na zo nɔna wone to jei sem konto ne mo.
35Isarele tiina bam laam ma zaŋe Kiberof-Hataava ne ba vo ba yi Hazerofa. Ba déem ma chwi ba vwoa dáane.
Àwon tá yàn lọ́wọ́lọ́wọ́ báyìí:
Jeelim 11: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)