Jeelim 10
10
Lu-nyenno nabwanno de te wum
1 Baŋa Wɛ ma ta de Moses o we:
2“Nam pa se ba kwei lu-nyenno ba mage-te se ba ma ba ke nabwanno telei. Nmo laam ma‑n wó yeini n pa se ba kwei-te ba ma ba bwoŋi nɔɔna bam ba ke daane, naa se ba gɔ ba vwoa ba vo jei sedwoŋi. 3Ba ná yeini ba wu nabwanno telei tem titwon-twono, se nɔɔna bam maama da ba jeeri‑m wara-jei sem ni ne. 4Se ba ná wugi nabɔnɔ dedoa yerane, ko ye sɔ-yuni yiga tiina bam mo wó ba ba jeeri‑m.
5Ba ná yeini ba wu nabwanno tem ba kɔe, ko bere we Isarele dwia yalo na jei wara-vwei dem wɛ-puli seeni to mo jege se ba gɔ ba vwoa ba nwoŋi ba kɛ. 6Ba daa ná wugi-te ba ke belei tu, se dwia yalo na jei vwei dem tega-kuri seeni to de gɔ ba vwoa. Ba ná wugi nabwanno tem ba kɔ, ko wó bere nɔɔna bam we maŋa kam yia se ba nwoŋi ba kɛ. 7Ko nam ná yeini ko ye se nɔɔna bam maama jeeri daane, se ba wu nabwanno tem ba leiri te kwori.
8Aron bia bam na ye kaanem tiina to mo jege se ba taa wui nabwanno tem. Amo ni dem konto wó taa wora taa wuu mo ko pa abam de á kwaga kam maama. 9Á ná nwoŋi se á kwaare jara de á dona balo na tu se ba chɔge á tega kam to, se á pa se ba wu nabwanno tem ba kɔ tigura ŋwaane. Ko ná ke konto, abam Tu Baŋa Wɛ wom wó ni ko ŋwa, se o jwoŋi abam o yage á dona bam jeŋa ne. 10Abam nam ta na yeini á di ywoni da yalo wone to, se á wu nabwanno tem. Ko ná ye á lage á di chan-doŋa kuri naa kuri dedwoŋi, se á wu-te, se ko bere we á jege á zwɛɛm pɛɛra de á yazura pɛɛra mo á beene se á ke kaanem á pa Wɛ. Nabwanno tem wó pa se abam Tu Wɛ wom nii á baŋa ne. Amo mo ye abam Tu Baŋa Wɛ wom.”
Isarele tiina bam yage Sinayi jei sem
11Dento bene dem chane selei chana kam da finlei dɛ dem ne mo kunkwoŋo kom ya na dɔge wara-vwei dem baŋa ne to zaŋe. 12Ko ma pa se Isarele tiina bam de gɔ ba vwoa ba yage Sinayi kagoa kam ye ba tole ba via. Kunkwoŋo kom déem ma vo ko yi Paran kagoa kam ko maŋe dáane ko zege. 13Ba na bobo ba zaŋe se ba vo jeiga kadwoŋi konto to, ko ye Baŋa Wɛ na tɔge Moses baŋa o pa-ba ni se ba ke tei to mo.
14Judah dwi dem de ba kwaga kam déem ma bobo se ba nwoŋi ba kɛ, ye ba zei ba gwɛɛm yere dem. Aminadabi bu Naason déem nam mo wo ba kɔgɔ kom maama yiga ne. 15Zuwara bu Netaneli maa wo Isakara dwi dem yiga ne. 16Helon bu Eliabi maa wo Zebulun dwi dem yiga ne.
17Ba laam ma kore wara-vwei dem, se Gereson tiina de Merari tiina bam zeŋe de zela yam ba taa vei ba tɔge Judah kɔgɔ kom kwaga.
18Ruben dwi dem de ba kwaga kam déem ma saŋe se ba nwoŋi ba kɛ, ye ba zei ba gwɛɛm yere dem. Sedura bu Elizura déem nam mo wo ba kɔgɔ kom maama yiga ne. 19Zurisadayi bu Selumeli maa wo Simeon dwi dem yiga ne. 20Deweli bu Eliasafe maa wo Isakara dwi dem yiga ne.
21Kohafe tiina de ma zeŋe wara-jei wo-zela yalo na tiini ya ye wose to ba vei ba tɔge-ba. Ba ná yeini ba yi mɛ ba daa na wó jeini to, dedaane nɔɔna badwonna maŋe ba chwi wara-jei sem ko jei ne.
22Efrayim dwi dem de ba kwaga kam déem ma saŋe se ba nwoŋi ba kɛ, ye ba zei ba gwɛɛm yere dem. Amihuda bu Elisama déem nam mo wo ba kɔgɔ kom maama yiga ne. 23Pedazura bu Gamaleli maa wo Manasɛ dwi dem yiga ne. 24Gideoni bu Abidan maa wo Benjamin dwi dem yiga ne.
25Dan dwi dem de ba kwaga kam déem ma kweeli se ba nwoŋi ba kɛ, ye ba zei ba gwɛɛm yere dem. Amisadayi bu Ahiyezera déem nam mo wo ba kɔgɔ kom maama yiga ne. 26Ocharan bu Pageli maa wo Asere dwi dem yiga ne. 27Enan bu Ahira maa wo Nafitali dwi dem yiga ne.
28Isarele tiina kɔ-fɔrɔ kom maama ná yeini ba zaŋe se ba nwoŋi ba vo jeiga kalo, ko ye chwoŋa kam konto seeni mo ba tɔga ye ba vei ba maa kɛa.
29Midian tu Reweli bu Hobabi de déem tɔge o wo ba tei ne. Reweli maa ye Moses tembaaro. Moses ma ta de Hobabi o we, “Ko laam yi se debam zaŋe dé vo jei selo Baŋa Wɛ na gwoni ni se o kwei o pa debam to. O nam pɛ se dé lɔre we dé ná yi da, ko wó taa lana ko pae debam. Nmo de nam ba se dé maama kɛ, se dé wó nii nmo baŋa ne ye n tɔge n na wo-laaro.” 30Hobabi ma leiri‑o o we, “Aawo! Amo de lage se a jwoori a tete teo mo, se a taa zoore a nɔɔna tei ne.”
31Moses daa ma ta o we, “Ja! Pa se dé maama kɛ, se nmo wó ta‑n bere debam chwoŋa kam, nmo na yei kagoa kam jei sem lanyerane to ŋwaane. 32Ko kwaga ne, n ná dɛ dé kwaga se dé yi da, dé wó chɛ wo-laaro telo maama Baŋa Wɛ na wó pa debam to, se nmo de da n na te wone.”
33Nɔɔna bam maama déem ma yage Sinayi peo kom#10:33 Sinayi peo kom: Hiburu = Baŋa Wɛ peo kom jei sem ye ba vei taa, da yatɔ. Ba na maa vei to, Baŋa Wɛ ni-gwonim dakaa kam maa wo ba yiga ne, se ka bere-ba jei se ba jeini da. 34Ba ná zaŋe se ba nwoŋi dɛ delo maama wone, Baŋa Wɛ kunkwoŋo kom maa yeini ko wo ba tei ne ye ba via.
35Ba déem ná yeini ba zeŋe Baŋa Wɛ ni-gwonim dakaa kam se ba nwoŋi, Moses mo yeini o lwoori Wɛ ye o we,
“Dé Tu Baŋa Wɛ, zaŋe se n zeili n dona bam,
se n pa ba duri ba jage nmo yiga ne!”
36Ba nam ná yeini ba zege ye ba zoore dakaa kam, o daa wó lwoori Wɛ mo o we,
“Dé Tu Baŋa Wɛ, ba n jeini n twɛ de Isarele kɔ-fɔrɔ kom,
se n ta‑n nii debam maama baŋa ne,
se dé ye kɔgɔ de kɔgɔ, kuni moro mo.”
Àwon tá yàn lọ́wọ́lọ́wọ́ báyìí:
Jeelim 10: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)