Jeelim 9
9
Atɔgebabaŋa kuri dem
Nwoŋim 12:1-14; Chullu 23:5-8; Nia Gulim 16:1-8
1Isarele tiina bam déem na nwoŋi Ejipti teo kom ne ye bene dedoa kɛ se ko vo ko yi bena yalei bene dem boboa chana kam to, mo Baŋa Wɛ ŋɔɔne de Moses Sinayi kagoa kam ne ye o we, 2“Pa se Isarele tiina bam di Atɔgebabaŋa kuri dem ka maŋa kam ne. 3Chana kanto da fuga-yana dɛ dem ná yia, se ba di kuri dem wɛ-zoore maŋa ne se ko taa via. Ba nam jege se ba di-de se ko maŋe de de dim chwoŋa kam mo.”#Nwoŋim 12:1-13
4-5Moses ma ta de nɔɔna bam ye ba de seene ba di Atɔgebabaŋa kuri dem Sinayi kagoa kam ne konto. Ko déem ye boboa chana kam da fuga-yana dɛ dem wɛ-zoore maŋa ne mo ba di-de. Isarele tiina bam déem ke nenɛɛne Baŋa Wɛ na pɛ Moses ni se ba ke tei to mo.
6Nɔɔna badwonna déem wo maŋe de chullu tem, pa se chwoŋa wo peini ka pa-ba se ba tɔge ba di kuri dem de dɛ dem ne. Ko maa ye ba déem na dwei too ŋwaane to mo. Dɛ dem konto ne ba ma vo Moses de Aron tei, 7ye ba ta ba we, “Debam seene dé dwei too pa se dé wo maŋe de chullu tem. Konto nam wó che se dé yé tɔge de Isarele tiina kɔ-fɔrɔ kom dé kwei dé pɛɛra dé pa Baŋa Wɛ ka maŋa kam ne na?” 8Moses ma leiri-ba o we, “Zuri-na á yera se a bwei Baŋa Wɛ se dé lɔre dé na wó ke tei abam ŋwaane to.”
9 Baŋa Wɛ de ma ta de Moses o we:
10“Ta n bere Isarele tiina bam we: Abam de á kwaga kam balo maama ná dwei too pa se ba wo maŋe de chullu tem, naa ba ná vei chwoŋa mo yiga yiga, ba de wó taa jege chwoŋa se ba di Atɔgebabaŋa kuri dem. 11Ba nam jege se ba cheigi se chane selei chana kam da fuga-yana dɛ dem ná yia se ba di-ko wɛ-zoore maŋa ne se ko taa via. Ba wó di pipeila kam nɔna mo, ye ba di bworobworo-memene selo sabɔle na tere ko wone to, dedaane dwoa vɔɔ-chɛɛro ba woli da. 12Ba yé pa se wodiu kom konto zege ko poore tega, naa se ba bwori varem wom kwi de dedoa de. Ba ná lage ba di Atɔgebabaŋa kuri dem, ba jege se ba ke ba tɔge de dim chwoŋa kam maama mo. 13Wolo nam ná maŋe de chullu tem, ye o ná wo vei chwo-dɔrɔ, kotu ná ve se o di Atɔgebabaŋa kuri dem, o nam daa bá tɔge o woli Isarele dwi dem wone, o na wo jaane o pɛɛra o ba amo yiga ne ka maŋa kam ne to ŋwaane. O tusim dem konto wó taa wo o yuu ne ye o maŋe se o na waarem mo.
14Ko ta ná ye veiru wolo ná zoore abam tei ne ye o lage se o di Atɔgebabaŋa kuri dem, kotu de jege se o di-de se ko maŋe de de dim chwoŋa kam mo. Chwoŋa dedoa mo wora ko pae tembia de veira.”
Kunkwoŋo na kwoli wara-vwei dem tei to
Nwoŋim 40:34-38
15Dɛ delo wone ba déem na chwi wara-jei sem to, mo kunkwoŋo chugi ko kwoli wara-vwei dem mɛ Wɛ ni-gwonim kandwa yam na tigi to maama. Ko na zege wɛ-zoore maŋa ne se ko yi te-pora to, kunkwoŋo kom déem nye de mini mo.#Nwoŋim 13:21-22 16Ko nam yeini ko ke konto mo dɛ maama wone. Kunkwoŋo mo yeini ko kwoli wara-vwei dem, ye tete ne ko nye de mini. 17Kunkwoŋo kom ná yeini ko zaŋe wara-vwei dem baŋa ne ye ko via, Isarele tiina bam de wó zaŋe ba vei ba tɔge-ko mo. Ko ná yi mɛ ye ko zege, Isarele tiina bam de wó chwi ba vwoa ba jeini dáane mo. 18Baŋa Wɛ déem yeini o tɔge konto baŋa ne mo o bere Isarele tiina bam maŋa kalo ba na wó gɔ ba vwoa yam ba kɛ to, de ba na wó chwi ba vwoa yam ba jeini jei selo ne to. Kunkwoŋo kom ná yeini ko maŋe wara-vwei dem baŋa ne, Isarele tiina bam de wó maŋe jei sem konto ne mo. 19Ko ná maŋe da taa, ye ko ba zaŋa, Isarele tiina bam de wó maŋe jei sem konto ne mo, ne Baŋa Wɛ na bere-ba se ba ke tei to. 20Kunkwoŋo kom déem wae ko maŋe vwei dem baŋa ne da fenfee. Isarele tiina bam nam sɛ ba tɔge Baŋa Wɛ ni dem mo. Ba ma yeini ba chwi ba vwoa ba maŋe jeiga kam ne, naa ba gɔe ba vwoa yam se ba nwoŋi ba kɛ, nenɛɛne Baŋa Wɛ na bere-ba se ba ke tei maama to. 21Kunkwoŋo kom bere ko wae ko maŋe vwei dem baŋa ne se ko zege wɛ-zoore maŋa ne ko yi te-pora, se ko laam zaŋe ko kɛ. Tega ná poore ye kunkwoŋo kom ná gɔga, nɔɔna bam de wó gɔ mo. Maŋa kalo maama kunkwoŋo kom ná zaŋe, ko ná ye wea ne naa tete ne mo de, ba de wó zaŋe mo ba kɛ. 22Kunkwoŋo kom déem ná ke da yalei, naa chana, naa bene, ye ko ná yɔɔre ko maŋe wara-vwei dem baŋa ne, Isarele tiina bam de wó maŋe jei sem konto ne mo. Ko ná zaŋe ko vei maŋa kalo ne, ba de wó zaŋe ba tɔge ko kwaga mo ba via. 23Ba déem yeini ba chwi ba vwoa ba jeini, naa ba gɔ ba vwoa yam se ba nwoŋi ba kɛ, nenɛɛne Baŋa Wɛ na pɛ-ba ni se ba ke tei maama to mo. Nɔɔna bam déem sɛ ba tɔge Baŋa Wɛ na tɔge Moses baŋa o pa-ba ni se ba ke kolo maama to mo.
Àwon tá yàn lọ́wọ́lọ́wọ́ báyìí:
Jeelim 9: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)