Nlb 34
34
Minné mi si ya Kanaan
(Yas 15:1-4; Ez 47:13-21; Yas 13:1-8)
1Ane Nti a nga kobô Môze na: 2Va'a bone b'Israél abendé di a jô be na: Éyoñe mia ye nyiine si ya Kanaan, abime si da ye bo énjenan nde di: Si ya Kanaan a minné na: 3Efase ya nké, ja ye taté e *nkôte si ya sin bebé a Edom. Ajô te, nné wônan ya nké a ye taté aku'u ya mañ me bili nku, e mfa'a jôp da tôô. 4Nné wônan a ye lôt, a beté Akrabim mfa'a ya nké, éyoñe te a ye lôt e sin, a ke kui e Kadés-Barnéa, mfa'a ya nké; nné ate a ye ke ôsu mfa'a Asar-Adar, a lôte e Asmôn; 5Ataté Asmôn, a ye lôt a kui ôtôñ y'Ejipte, éyoñe te a su'ulane vame mañ. 6Mfa'a jôp da dim, nné wônan: 7mfa'a y'akôé, nné wônan a ye bo avale di: ataté e beta mañ, mia ye kañe na a kui nkôle Or; 8ataté nkôle Or, mia ye kañe nné anyiine Amat, nalé a ye ke kui e Sedad; 9zifrôn nye a ye kee nné ôsu a kui Asar-Enan: nné wônan y'akôé nye le. 10E mfa'a jôp da tôô, mia ye tyi'i e nné wônan ataté Asar-Enan a kui Sefam. 11Nné a ye sis, a taté Sefam a kele e mfa'a ya Ribla, Ayin mfa'a jôp da tôô; nné a ye beta sis a nnambe nsa'a mañ ya Kinérét, e mfa'a jôp da tôô; 12A ye beta sis e mfa'a ya Yordan a ke vam e mañ me bili nku. Si jenan, a minné mié mbôma'an, nje le.
13Ane Môze a nga kalan abendé di e be bone b'Israél a jô na: E si mia ye kaban a mboon *asimba, nje le a nje Nti a nga bendé na, a ye ve *meyoñ ébul a étun. 14Amu ayoñe bone be Ruben, ane mebume map me né a ayoñe bone be Gad, ane mebume map me né, me nga nyoñ e ngabe jap; éfas ayoñe Manasé é nga nyoñe fe e ngabe jap. 15Meyoñ mete mebaé a étun, me nga nyoñ e ngabe jap e Yordane yat, zôsôôô a Yérikô, mfa'a jôp da tôô.
Nkabane si
(Yas 14; Nlb 13:1-16)
16Ane Nti a nga kobô Môze na: 17Biyôlé ya bôt ba ye kabe mia si mbie bi: *ntuni Eléazar a Yasua e mone Nun. 18Mia ye beta nyoñ évete ya ayoñ ése asu ya kabe si. 19Biyôlé bi bôte bete mbie bi:
ayoñe Yuda: Kaléb e mone Yefuné.
20Ayoñe bone be Siméoñ: Samuel e mone Amihud;
21Ayoñe bone be Bényamin: Delidad, e mone Kislôn;
22Ayoñe bone be Dan: Buki évet, e mone Yôgli;
23E mvoñe Yôsep: ayoñe Manasé: Aniél évet a too e mone Efôd
24Asu ayoñ Efrayim: Kemuél évet, a too e mone Siftan.
25Asu ayoñe bone be Zabuloñ: Elisafan évet, a too e mone Parnak;
26Asu ayoñe bone b'Isakar: Paltiél évet, a too e mone Azar.
27Asu ayoñe bone b'azer: Ahihud évet, a too e mone Selômi.
28Asu ayoñe bone be Néftali: Pédahel évet, a too e mone Amihud. 29E bôte ba mbe Nti a nga ve abendé ya kabe si ya Kanaan e be bone b'Israél.
Àwon tá yàn lọ́wọ́lọ́wọ́ báyìí:
Nlb 34: BDCB
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible en langue Bulu © L'Alliance Biblique du Cameroun, 2007, 2015.