Nlb 35
35
Bitisone bone be Lévi
(Yas 21; Dt 12:19)
1Ane Nti a nga kobô Môze e minje'ese ya Môab, bebé a Yordan, zôsôôô a Yérikô. 2Nde a nga jô na: Bendé'é bone b'Israél na, be ve bone be Lévi bitison be ne nguleya tabe, bi so'o e ngap be bili été. Mia ye fe ve bone be Lévi, mevôm ma bômane bitison bite. 3Ba ye bi bitisone ya tabe; a mbôma'an y'été a ye bo asu mimbame miap, akume dap a betite bap bese. 4Mevôm ma bômane bitison mia ye ve bone be Lévi, ma ye bi menyi'i me mo toyini mbôma'ane ataté vôme mfine ya tison ô né. 5Mia ye vek, e tison atan, menyi'i me mo toyini ébaé e mfa'a jôp da tôô, menyi'i me mo toyini ébaé, e mfa'a ya nké, menyi'i me mo toyini ébaé e mfa'a jôp da dim a menyi'i me mo toyini ébaé e mfa'a ya akôé. Tison ja ye bo ézezañ. Mbôma'an ya bitisone biap a ye bo avale te. 6E bitison mia ye ve bone be Lévi, bisaman y'été bia ye bo bitisone ya sobô, e vôme ñwôé bôt a ne nguleya tup; ô laté a bitisone bife mewôm menyin a bibaé. 7Bitison bise mia ye ve bone b'Israél bia ye bo mewôm menyin a muam, ô laté a mevôm ma bômane bie. 8Bitison mia ye ve bi so'o e mengabe ya bone b'Israél été, bia ye dañe veban bi so'o e be bôt be bili bie abui, mia ye nyoñe tyôtyôé e be ba be bili tyôtyoé; môt ase a ye ve ngab éziñe ya bitisone bié e be bone be Lévi abim ane ngabe jé é né.
Bitisone ya sobô nkune metyi
(Dt 4:41–43:19:1–13; Yas 20)
9Ane Nti a nga kobô Môze a jô na: 10Kobô'ô bone b'Israél, a wo ye jô be na: Éyoñ mi dañeya Yordan a nyiin e si ya Kanaan, 11mia ye top a telé bitison bia ye bo bi ya sobô e mfa'a wônan, e vôme môt a nga wôé môt e mfu'an a ne ke sobô. 12Bitisone bite bia ye volô mia mi sobô nkune metyi, nalé ñwôé môt a ye bo te wôéban te na a tebe ôsu ya ékôane bôte na be tyi'i nye ajô. 13E bitison mia ye ve, bisaman y'été bia ye bo bitisone ya sobô e mfa'a wônan. 14Mia ye ve bitisone bilaa e Yordane yat, a ve fe bilaa e si ya Kanaan: bia ye bo bitisone ya sobô. 15Bitisone bisaman bite, bia ye bo asoé mfa'a bone b'Israél, mfa'a *ntabe, a môt a bôô meyôa ézezañe jenan: môt ase a wôéya môt e fu'an a ye bo nguleya tup a ke sobô wé.
16Nge môt a bibi môte mbok a évôl étyé, a môt ba te bibi a wôé, môt a te bibi a lobane ñwôé bôt: ñwôé bôt ate a ye wôéban. 17Nge a bibi nye, a bili akok e ne nguleya wôé e mo, a môt ba te bibi a wôé, môt a te bibi a ne ñwôé bôt: nye fe a ye wôéban. 18Nge a bibi nye a évôl élé é ne nguleya wôé, a môt ba te bibi a wôlé fo'o, môt a te bibi a ne ñwôé bôt: nye fe a ye wôéban. 19Nkune metyi a ye wôé ñwôé bôt; éyoñe a ye koone nye, a ye wôé nye. 20Nge môt a sô'ôlô nyô mbok nsô'ôlane ziñ, nge wua nye jôm éziñ éyoñ a maneya kômesane bo nalé, nge môt ba bo nalé a wôé, 21a nge a bibi nye a wo wé mbibane ziñ, éyoñe te môt ba te bibi a wu, môt a te bibi a ye wôéban amu a ne ñwôé bôt: nkune metyi a ye wôé ñwôé bôt éyoñ a kooneya nye.
22Ve nge môt a sô'ôlô môte mbok teke nsisime ziñ, nge wua nye jôm te na a taté kômesane de, 23nge wua nye ako'o e ne wôé atemetem, ng'awu da so, te na môt a te wua akok a ne nye nsiñ, nge jeñe nye *abé, 24metiñe ya tôñ mme ékôane bôt ja ye belan mfa'a ya tyi'i ajô e zañe môt a nga wôé a nkune metyi: 25ékôane bôt ja ye nyii ñwôé bôt e mo me nkune metyi. Ekôane bôt ja ye bulane nye e tisone ya sobô a nga tub'été. A ye tabe été akekui awu ya *ntuni ôsu be nga wo'o mfufube mbon. 26Nge ñwôé bôt a kui atane minné ya tisone ya solé émien a nga ke sobô, 27a nge nkune metyi a tôbane nye atane ya tisone ya sobô, a nkune metyi a wôé ñwôé bôt ate, nkune metyi a ye bo te lañeban ane ñwôé bôt. 28Amu ñwôé bôt a yiane tabe e tisone ya sobô jé akekui éyoñe *ntuni ôsu a wuya; éyoñ a wuya, nje ñwôé bôt a ne nguleya bulan e vôme wé.
29Avale mia ye wulu ntyi'ane mejô e miaé mienan mise a mevôm mese mia ye tabe nde le. 30Ajô ese ya mewôé me bôt, ñwôé bôt a ye wôéban nge bengaa be n'abui. Ngaa wua a ne tyôtyoé.
31Mia ye bo te kañese moné asu ya nyii ñwôé bôt a yian awu: a yiane wu. 32Nalé fe na mia ye bo te nyoñe moné asu ya suu môt a tup a ke sobô e tisone ya sobô, a su'ulane bulane ke tabe e mesi mé été te na Ntuni ôsu a wu. 33Mia ye bo te ve si mia ye tabe mvin: amu mewôé me bôt ma ve si mvin a be ne nguleya sôbe si mfa'a ya metyi me nga kui, ve a metyi me môt a nga kulu me. 34Ajô te mia ye tabe ntyele ya ve si mia ye tabe mvin, amu mia yeme na, mamien ma ye tabe été ézezañe jenan. Yaa, ma Nti, me too ézezañe bone b'Israél.
Àwon tá yàn lọ́wọ́lọ́wọ́ báyìí:
Nlb 35: BDCB
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible en langue Bulu © L'Alliance Biblique du Cameroun, 2007, 2015.