Romains 12
12
Dimaŋfapɔndi din ti cáá Unimbɔtinee
1Nnabiyaamu, kii Unimbɔti nín dàkā-ti u-saasɔl puee, m mèé-ni yii ní dū ni-wunti kí tīī Unimbɔti kii saraa un bí circir kaa kpíì, ki fáatì-uee. An di làá nīn sá-ni dinimbɔtinoobaamɔndi din máaǹ ní nóóyee. 2Taa dūmaan ni-ba kí nántíǹ waanee bimbim#12.2 Dūú ŋmàntī nì 1 Peet 1.14., ama ní yàntī Unimbɔti ń pɔ̄-ni ilandɔkɔpɔɔn kí kpántí ni-bimbim. Míǹ ní ni ŋūǹ kí béé min ní Unimbɔti lèe, min ŋān̄ ki fáatì-u ki sá mmɔntiimee.
3Diyimɔɔl din Unimbɔti pú-mee puee ní m ŋūǹ kí tùkù ni-kɔkɔ yii ní taa nín̄ yòontí ni-ba yilpu min kaa máaǹee, ama nín̄ cáámaan ilandɔkɔ in kítì ki nóó nì fookii un Unimbɔti yākatì ki pú báà ŋmee. 4Kii tiwun nín sá tibaantiil ki cáá ajan tikpil, ŋi-tuuŋŋi kaa pēē puee, 5míǹ mbaantiim, ti nín wīikí min nee, Kriisitoo di kpáfì-ti tiwumbaantiil, ní báà ŋma túkú u-laŋki u-laŋki. 6Unimbɔti pú-ti diyimɔɔl ki yākatì báà ŋma u-pɔl, tí nīn cáa tūǹ atuun ŋin bí aba abee. Míǹ puee, sii un u-Fam tìì tibɔti a nàatēe, nín̄ nàatī án nīn nóó nì u nín tīī-si fookii uŋyee. 7Sii un u yaa tīī á nīn sá bin kíǹee tɔntɔnliuee, á nīn tūǹ ki tìì-bi. Sii un dàkèe, á dū a-ba kí tīī a-dàkatam. 8Sii un tìì binib kunyannyaauee, a mun ń dū a-ba kí tīiǹ kunyannyaau ditiil. Sii un pūǹ tiwanee, á nīn pūǹ nì dipɔbil diba. Sii un kpòotēe, á nīn kpòotī nì difaŋgiil. Sii un tútúǹ bifalaadambee, á tūtuǹ-bi nì dipɔɔpindi#12.8 Dū B. 4-8 kí ŋmàntī nì 1 Kɔra 12.4-12..
9Ni-neendi ń taa nín̄ cáá mpoonnyoon. Ní nīn ná ikpiti, kí dū ni-ba kí nákáǹ tiŋan mmɔntiim. 10Nín̄ néeḿmaan tɔb tiŋan kii nnabiyaamu nín néeń tɔb puee, kí nīn sá bipeekaabi ki tɔ́ bin kíǹee. 11Ní nīn tūm̀maan ditundi nì difaŋgiil kí taa nín̄ sá biwutijoodambi, kí nīn pɔ̄ɔntí ki tūm̀maan ti-Dindaan tundi nì ni-pɔbiliŋ kɔkɔ. 12Án nīn mɔ̄ǹ-ni dimákal din ni cááyee pu, kí jīmaan kimɔtii falaa poon, kí nīn mèé múlmul. 13Tūtum̀maan biwɔfib bin nóó Unimbɔtee, kí nīn fòol̄ binicambi bin kóò ni-puee nì mmɔn.
14Mèèmaan yii Unimbɔti ń ŋá bin sàantí-nee tiŋan, ní nīn nyàab̀ bi-ŋanti kí taa nín̄ nyàab̀-bi tikpitil#12.14 Dūú ŋmàntī nì Maat 5.44, Luuki 6.28.. 15Bin yaa bí dipɔɔpindinee, ní kūtì bi-pu, ni-kɔkɔ ń fàal̀maan. Bin yaa tí bíi sūǹee, ní kūtì bi mun pu, ni-kɔkɔ ń sɔ̄. 16Nín̄ mɔ̄maan tɔb cee. Ní taa nín̄ sá bin néeń timɔnee. Nín̄ sìntīmaan ni-ba taapu, kí taa dàkafìmaan yii ni sá biciŋfitiibi#12.16 Dūú ŋmàntī nì Yees 5.21..
17Ubɔ yaa ŋá-ni tikpitilee, ní taa dū tikpitil kí téeǹ-u. Pɔ́ɔm̀maan kí ŋá min kítèe binib kɔkɔ nimbiin. 18Ni yaa ŋūǹee, ní yàntī ŋgbansɔŋfi ń nīn bí ni nì báà ŋma kansikin, tiba ń taa nyānní ni-cee. 19M-nabineeŋkaamu, ní taa tɔ̀maan ni-ba ipɔntoon. Yàntīmaan Unimbɔti ŋuul ń tɔ̄ di-tundi, kun puee an ŋmàn̄ yii: «Ti-Dindaan bí yii: Man di làá dāá tɔ̀ ipɔntoon, man di làá dāá pà bi-tuuŋŋi paati. 20Ama, ŋkùm yaa cáá a-nannanliu, á tīī-u tijin ú jī. Nnyinnyoo yaa tí cáá-u, á tīī-u nnyim ú nyɔ̀. A yaa bíi ŋáań mimmee, an bí kii amɔsiŋkoon ní a cáa pāantí u-yil puee#12.20 B. 19: Ditee 32.35. - B. 20: Alaŋ 25.21-22..» 21Ní taa yàntī tikpitil ń pɔ̄ɔkiǹ-ni, nimbi dūmaan tiŋan kí pɔ̄ɔkiǹ tikpitil.
Àwon tá yàn lọ́wọ́lọ́wọ́ báyìí:
Romains 12: BASSARDC
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
BIBLE EN N'TCHAM (Bassar) © Alliance Biblique du Togo, 2013.