Romains 13
13
Unil ń nīn tɔ́ biyidambi
1Báà ŋma ń nīn tɔ́ biyidambi bin cáá mpɔn ki kpòotī kitiŋee, kun puee uyidaan ubɔ kaa bí Unimbɔti kaa kāaǹ-u. Unimbɔti di yāntì ní biyidambi kɔkɔ bí. 2Míǹ puee, un yaa yíì biyidambee jáaǹ mara un Unimbɔti yóoǹee dee. Bin yíití biyidambee dátiń ditafadaaldi ki tòó bi-ba pu ní. 3Di sá yii bin bin ŋáań tiŋanee kaa fàŋkí biyidambi, bin ŋáań tikpitilee di fàŋkí-bi. A yaa là biyidambi ń taa nín̄ cáá-si tifaandee, nín̄ ŋáań tiŋan, bi làá pàkà-si. 4Bi bíi tūǹ Unimbɔti tundi ní, ki téekí-si á ŋá tiŋan. Ama a yaa ŋá digaŋgam, see á fàŋkì, kun puee an kaa sá fám ní bi cáá mpɔn ki dátí binib tafal. Bi yaa bíi dátí ubɔ tafalee, bi bíi tūǹ Unimbɔti tundi ki dàkà u-ŋuul din u cáá digaŋgam dambi puee dee. 5Míǹ pu ní an máaǹ yii tí nīn tɔ́ biyidambi. Tí taa fàŋkì ditafadaaldi ŋmaniŋma pu, tí nīn nyímaan yii míǹ di ŋān̄.
6An pu ní ni pà lampoobee, bí ŋmā kí tɔ̄ ditundi gbanti mbaamɔmin, kun puee bi sá Unimbɔti tɔntɔnliibi ní. 7Pàmaan un sá kamaa kun ni máaǹ kí pà-uee: pàmaan lampoo kí tīī un an sá ní pà lampoo kí tīīyee, kí tīī bin gífí patanti bi pèe bi-nimbiliŋ, kí fàŋkì bin bin sá ní fàŋkèe, kí nīn tɔ́ bin bin sá ní nīn tɔ́ee#13.7 B. 6-7: dūú ŋmàntī nì Maat 22.21, Maar 12.17, Luuki 20.25..
Tí nīn néeḿmaan ti-jutiibi
8Ní taa nín̄ jīǹ báà ubɔ nì ubɔ apɔɔn. Dipɔndi din ni cááyee di sá ní nīn néeń tɔb. Sii un néeń a-jutiibee, sii ŋá min mara lèe kɔkɔ dee. 9Di sá yii marab bin lì yii: «Á taa ŋá tilaakpaal, á taa kpɔ̀ unil, á taa yɔ̀, á taa nín̄ cáá nnimbitaataamee» nì marab bin kíǹee kɔkɔ taapu sá marabaanti nee ní yii: «Á nīn néeń a-juti kii sii a-bee#13.9 Kpèè Disa 20.13-17, Ditee 5.17-21, Akoo 19.18..» 10A yaa néeń a-jutee, aa ŋáań-u tikpitil. A yaa néeń binibee, a bíi ŋáań min mara lēe kɔkɔ dee.
Tí bɔ́ntí kí cīití Yeesu gítintam
11Míǹ puee, ní nīn néeḿmaan tɔb míǹ, kun puee ni nyí ŋyunti ŋun poon ti bí nee nín sá ŋuŋyee. Ŋyunti ŋun ti máaǹ kí fìntī ŋgeeminee bāań, di sá yii Yeesu gítintam sútì ki pìlīń-ti ki jítiǹ min min ti nìn péé péé ki fōō ki kííyee. 12Kunyeeu mɔ́ ki síitì, kutaa tóob́ diwuntil. Mimmee, tí fá dibɔmbɔndi poon tuuŋŋi ní kí dū ŋwalifin janjawanti kí pèen̄. 13Tí còom̀maan min kítèe, kii bi nín còom̄ ŋwiimpu puee, kí taa jī kí lákatí ti-ba pu, kí taa gbí ndaam, kí taa ŋá tilaakpaal, kí taa ŋá tijɔkɔndi, kí taa nín̄ jáà, kí taa nín̄ cáá tɔb pu kudɔ̀ŋu. 14Ní dūmaan ti-Dindaan Yeesu Kriisitoo bimbim kí pèen̄ kii tijanjawanee, kí taa fàtīí tɔ̄ ni-bimbikpitim kí ŋá mì nín là puee.
Àwon tá yàn lọ́wọ́lọ́wọ́ báyìí:
Romains 13: BASSARDC
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
BIBLE EN N'TCHAM (Bassar) © Alliance Biblique du Togo, 2013.