Romains 11
11
Unimbɔti kaa dū Isirayeel yab ki fá
1Mimmee, Unimbɔti fá Isirayeel yab naaa? Aayee, kpataaa! Kun puee man m-ba sá Isirayeel ní, ki sá Abraam naantiiu, ní ki sá Beenjameen naakookun#11.1 Dūú ŋmàntī nì Fiil 3.5.. 2Unimbɔti kaa fá u-nikitil din pu u pée nyí dooooyee#11.2 Dūú ŋmàntī nì Ilan 94.14.. Naa kalin nyí Unimbɔti gbɔŋku nín sòon̄ pu dijandi din sòoǹ Eelii nín nìn bíi kɔ́kɔĺ Isirayeel yab Unimbɔti nimbiin pueeee? U bí yii: 3«Ti-Dindaan, bi kūū a-bɔnaatiliibi ki wīī a-saraafaŋyi, an pée kíǹ man baba ní, ní bi nyàab̀ kí kpɔ̀ ma mun!» 4Unimbɔti nìn kíí-u yii ba ní? U nìn bí yii: «M kpáafì binib kutukub biluli, bi sá m-yab. Bidambi tabiŋyiliŋ kaa gbāaǹ diwaal Baal nimbiin#11.4 B. 3-4: 1 Bib 19.10,18..» 5Míǹ mbaantiim, ti-yuntiŋu nee, an kíǹ binib fiii bin Unimbɔti ŋá tiŋan ki lútì-bee. 6U ŋá bidambi tiŋan ní ki lútì-bi, an kaa sá bi-tunnyaaŋku pu. An yaan sá bi-tunnyaaŋku puee, mimmee Unimbɔti kaa ti ŋá-bi tiŋan dee.
7Tibɔti nee taapu sá yii ba dee? Isirayeel yab nín nyàab̀ kuŋyee, baa ká kudɔŋu, see bin Unimbɔti lútèe baba di ká kudɔŋu, ní u yāntì bin kíǹee kaa ŋūǹ kí gbìl̄ taapu, 8kii an nín ŋmàn̄ puee yii: «Unimbɔti tātì bi-lammi, ki yāntì bi-nimbiliŋ kaa wāĺ, bi-tafaliŋ kpáá, áli ki dāa sāā díǹ.» 9Daafiidi mun lī yii:
«Bi-jinti ń kpántí-bi kutaliŋŋu,
kí nīn sá-bi kulaaŋŋu,
bí lítí ikpitin kí ká ditafadaaldi din máaǹee,
10bi-nimbiliŋ ń jɔ̀b̄ kí taa nín̄ wāĺ!
Yàntī bí nīn pée bōō baabadal#11.10 B. 8: kpèè Ditee 29.3, Yees 6.10, 29.10. - B. 9-10: Ilan 69.23-24..»
11Ḿ bàlifì tibɔti nee: Mimmee, Juuda yab nín gbéetèe, bi lítì kɔkɔɔɔ? Aayee, kpataaa! Ama bi-lítitamee di yāntì atimbun ŋin kɔkɔ kíǹee ká difiil, án nín làá ŋá pu bi yaa ká bin béeyee, bi mun ń nyàab̀ee. 12Bi-yìntitam yaa cáań kitiŋ kɔkɔ nib tiwammɔntiilee, ní bi nín wáŋkì puee yaa cáań bin kaa sá Juuda yabee tiwammɔntiilee, kin Juuda yab kɔkɔ yaa fātìń Unimbɔti ceeyee, kun an làá cáańee làá nīn bí mana dee?
Bin kaa sá Juuda yabee fiil
13Kɔŋkɔnnee, m sòoǹ nì nimbi bin kaa sá Juuda yabee ní. Man sá Yeesu kpambal din u tú bin kaa sá Juuda yabee ceeyee ní, ní an mɔ̄ǹ-mi ditundi din u tīī-mee pu. 14M-landɔkɔŋu sá yii ḿ téé m-nabiyaamu Juuda yab bí nyàab̀ kí ká kun bin béeyee cááyee, ḿ ŋmā kí fīī bi-kansikin biba. 15Unimbɔti nín yíì Juuda yab bí taa nín̄ gíti sá u-yabee di ŋáŋkì binib bin kɔkɔ kíǹee nì Unimbɔti kansikin. Mimmee, u yaa láa fātìi fōō Juuda yabee, án làá dāá nīn bí mana dee? An dāa sá bin nìn kpíìyee dimaŋfal ní.
16Bi yaa nìn cáań tijincɔ̀fikaal ki tīī Unimbɔtee, tin kíǹee muee, úǹ di yì. Unimbɔti di yaa yì busubu nyaaŋyee, úǹ di yì asupan mun#11.16 Dūú ŋmàntī nì Dikà 15.19-21.. 17Bi yaa gāā ɔliifi bumɔŋkisubu#11.17 bumɔŋkisubu: Bumɔŋkisubu dàkà Isirayeel yab bin sá Unimbɔti nikitilee, ní kumooun subu sá bin kaa sá Isirayeel yab ki dátiǹ Unimbɔtee. paŋŋi aba ní ki gāań sii kumooun subu pandi ki cáań ki túkuǹ ŋin béeyee paaŋyi pu, ní a kíǹ ki fòol̄ busumɔntiibuee nyaaŋyi kpiimee, 18sii ń taa nín̄ lámintí ki dàkà apan ŋin bi gāā ki fée. A yaa bíi lámintée, á béé yii an kaa sá sii di tú inyaan, inyaan di tú sii.
19A ŋūǹ kí lì yii: «Bi gāā apanee ki fá ní ki cáań man ki túkuǹ.» 20Tiŋman bi lafun gāā-ŋi ki fá, kun puee baa cáá fookii ní sii fookiiu puee ní a túkú niin. Míǹ puee, á fàŋkì kí taa nín̄ lámintí. 21Di sá yii Unimbɔti yaa kaa tāaǹ bumɔŋkisubu paŋŋee, á nīn nyí yii waa làá dāá tàan̄ si mun. 22Nín̄ nyí Unimbɔti ŋanti nì u-tafadaaldi pu! U dáaĺ bin bin lítèe tafal, ní ki ŋá sii tiŋan. Á nīn gbíntìi bí u-ŋanti gbantin, an yaa kaa sá míǹ, see ú dāá gāā-si kí fá. 23Bíǹ yaa kpántì bi-bimbim ki fōō Yeesu ki kííyee, u ŋūǹ kí fàtīí gíiǹní-bi kí túkuń laakin u nìn gāā-bee. Di sá yii Unimbɔti cáá mpɔn kí gíiǹ-bi kí túkuń mpɔm. 24Kpèè, sii kumooun supandi din bi gāāyee, bi cáań-si ki túkuǹ bumɔŋkisubu bun kaa sá a-suyilee pu. Mimmee, an kaa pɔ̄ɔ̄ bí gíiǹní asupan ŋin bi gāāyee kí túkuń disuyil din pu ŋi nìn bí, bi gāā-ŋee.
Isirayeel yab kɔkɔ làá ká difiil
25M-nabiyaamu, m là ní béé ibaamɔn iba i bí dibalin, án nín làá ŋá pu ní taa nín̄ yíì ni-ba yii biciŋfitiibee. Di sá yii Isirayeel yab dijandi kaa ŋūǹ kí gbìl̄ tibɔti nee taapu, kí dāá sāā ŋyunti ŋun ntimu mun kɔkɔ kíǹee yab ń dāá kɔ́ difiilinee. 26Min ní Isirayeel yab kɔkɔ làá ká difiilee dee, kii an nín pée ŋmàn̄ puee yii:
«Ufiil làá nyānní Siiyɔn
ní kí lēē ikpiti in bí Jaakɔb yab kansikinee kí fá.
27Man Unimbɔti yaa láa lēē bi-kpitii ki fée,
an di dāa sá dipoondi din m pōoǹ-bee#11.27 26-27: Yees 59.20-21 nì 27.9..»
28A yaa kpēē bi nín fá Tibɔmɔntiil puee, bi kpántì Unimbɔti nannanliibi nimbi ń ká difiil. A yaa kpēē Unimbɔti nín lútì-bi puee, bi sá bin u néeńee bi-naanjab pu. 29Di sá yii Unimbɔti yaa pú ubɔ diyimɔɔl diba, àá u yaa tí yíiń ubɔee, waa kpántí u-landɔkɔŋu. 30Dooooyee, naa nìn tɔ́ Unimbɔti, ama, Juuda yab nín nìn yíì, kaa fōō u-bɔti puee ní u súń ni-saai kɔŋkɔnnee ki fīī-ni. 31Míǹ mbaantiim, Juuda yab kaa tɔ́ Unimbɔti kɔŋkɔnnee ní Unimbɔti súń ni-saai, ama an sá bi mun ń ŋmā kí ká kɔŋkɔnnee Unimbɔti saasɔl ní. 32Mimmee, Unimbɔti yāntì binib kɔkɔ gbíntì bi-yìntitam poon, ú ŋmā kí dàkà bi-kɔkɔ u nín sūǹ binib saai puee dee.
Pɔɔl pàkà Unimbɔti ciiŋyi
33Óo, Unimbɔti ciiŋyi nì u-nyítam nì u-ŋanti wīikéeee, an kaa cáá bi lì! U nín ŋáań u-bɔti miŋyee, unil kaa ŋūǹ kí béé, ní min min u lēē ki làá ŋée, unil kaa ŋūǹ kí gbìl̄ taapu#11.33 Dūú ŋmàntī nì Yees 55.8, Ilan 139.6,17-18., 34kun puee, kii Unimbɔti gbɔŋku poon nín lī puee yii:
«Ŋma di ŋūǹ kí béé ti-Dindaan landɔkɔŋu?
Ŋma di ŋūǹ kí sāŋkì-u mun?
35Ŋma di péé ki tīī-u tiba ní an sá yii ú fàtīí téeǹ udaan#11.35 B. 34: Yees 40.13. - B. 35: kpèè Yoob 41.3.?»
36Úǹ di náań tikɔkɔ, úǹ di ŋúb́ tikɔkɔ, ní an kɔkɔ bí ki tīī-u. Unimbɔti gbanti ń ká tinyool kí nīn cá jaanjaan! Ameeni.
Àwon tá yàn lọ́wọ́lọ́wọ́ báyìí:
Romains 11: BASSARDC
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
BIBLE EN N'TCHAM (Bassar) © Alliance Biblique du Togo, 2013.