Iivesi zeBhayibhile ezithandwayo ezisuka Ro 12

Yabelana

Caw man̈x lajnoc tzcutjec qui b'eyb'al yet' eb' yic yolyib'n̈q'uinl tic. Yowlal tzqui chajec jelxc qui nab'en, sec 'oj wach' b'o qui b'eyb'alec 'a jun 'ejmn̈ej. Toto 'ixta tzcutjec qui b'a, 'oj wach' nachjc 'el cujec, tas tznib'j Dios 'ayn̈ec, atn tas wach', caw tzalj Dios yu'uj, may jac spaltail 'a 'a.

Ex wu'tac, ex wanab', caw tz'o'ch sc'ojl Dios 'ayn̈ec. Yuj wal cha, tzin tew 'at 'ayex, to tzeya'ch e b'a 'a yol sc'ab'. 'Icha junc xajmb'al pitzan, tz'ajx yico'oc, 'ixta tzcutjec ca'n qui b'a 'a 'a. Toto 'ixta tzcutjec qui b'a, tzyal 'el'chi, yic on̈n̈ej Dios, tzca'nec servil 'a smasnil qui c'ojol, 'icha wal tznib'ej.

'Ay cab' qui tzaljc'ojlalec 'a smasnil tiempo, yujto tzca'c 'och Dios yipc qui c'ojol. Caw te'n tzcutjec qui b'a cab'n syail. May cab' b'a'n̈ tzcactjec qui leslwi 'a Dios.

Caw matz qui chajec 'ajxc ganar qui b'a yuj junc maysch'olnil tz'ajx 'och 'a quib'n̈ec. Yowlal caw wach' tzcutjec qui b'a, sec an̈ 'oj ca'c ganar 'a yib'n̈ jun tzo'n̈ maysch'olnil cha.

Caw wach' tzlaj cutquec qui chamc'ojlan qui b'a, yujto quit creyentealec qui b'a qui masnil. Yowlal tzquijec 'ejm qui b'a 'ayn̈ junjn on̈, sec wach' 'ay quel'ch junjn on̈c 'a qui sat.

Caw yelc'ojlal tzlaj qui chamc'ojloquec qui b'a. Tzann̈j tas maysch'olnil, qui yajc can 'eli. Ax tastc wach', ca'c 'och qui nab'en 'a 'a.

Ca'c 'ip qui ch'oxn junc'ojlal 'a smasnil 'anma', sec toq'ue tzcan eb' quet' 'a junc'ojlal.

Ex chamc'ojlb'il wu'uj, caw wal matz tac' qui pacnec qui b'a 'a junc mach. Yowlal tzqui tan̈wjec, sec mun a Dios 'oj 'a'nc syailal. Yujto yaljnac can Dios 'ixtc 'a Ch'an̈ U'un̈: An 'ay waln wic wa'n 'och syailal eb', an 'oj wac' spac 'a eb', 'icha smoj schan eb', xchi Cajlilec.

Caw c'asn tzcutjec qui b'a 'a Cajlil. Man̈ 'isjoc tzcutjec qui b'a 'a 'a. Yet' smasnil qui c'ojol, tzca'nec servil Cajlil.

A Dios, 'a'jnac wopiso tic yuj swach'c'ojlal. Yuj cha, tzwaln 'at jun tzo'n̈ tic 'ayx e masnil. Matz tac' qui nan junjn on̈ec, to caw jeln on̈. Yowlal 'emmquilal tzcutjec qui nan qui b'a, a tzyala tas 'opiso tzyac' Dios 'ayn̈ junjn on̈ec, yujto 'aych qui c'ojlec 'a 'a.

Toto 'ay mach maysch'olnil tzyutj sb'a 'ayn̈ec, caw wal matz tac' qui pacnec qui b'a 'a 'a. Caw wach' tzcutjec qui b'eyb'al 'a sat eb' 'anma smasnil.

Junc'ojlal tzlaj cutquec qui b'a qui masnil. Matz tac' qui b'an̈nec qui b'a. Jun tzon̈ 'e'c cab' yet' eb' may yel'ch 'a sat eb' 'anma'. Matz tac' qui nanec, to caw jeln on̈ec.

An̈jtona tzyaln pax 'ixtc 'a Ch'an̈: Toto 'ay swejl eb' 'ajc'ojl yajch 'ayex, 'a'c tas tzc'ux eb', toto 'ay stacn̈til eb', 'a'c tas tzyu'j eb'. 'Ixta 'oj 'aj schacb' 'el sat eb' sq'uixwi, 'icha wal to tze secc q'ue stza c'ac' caw tzn̈ilchj 'a sjolm eb', xchi 'a Ch'an̈.

A mach tu tzlaj yutc sb'a 'ayn̈ec, yowlal tzqui c'an cot swach'c'ojlal Dios 'a yib'an̈. Man̈oc yowl sc'ojl Dios chi tzqui c'anc cot 'a yib'an̈. A mach tzalji, tzalj coyc yet'oc. Ax mach tzcusi, cus coyc pax yet'oc.

Yowlal tzon̈ colwjec 'a eb' quit creyenteal, yic 'ay tas 'ay sc'a'l tz'och yuj eb'. Wach' tzlaj cutquec pax qui b'a 'a eb' tzlaj 'ec' 'ayn̈ec.

A qui niwnal an̈ 'anman̈ec tic, til wal tastc 'ay 'a 'a, 'icha coc yet' qui c'ab', chucchc yopiso jun jun. 'Icha qui niwnalec tic, 'ixta on̈ec. Wach'xam niwn on̈ec, palta 'icha to junn̈j 'anmal cajc 'a yol sc'ab' Cristo. 'Icha jun tzo'n̈ tastc 'ay 'a junc niwnal cha, to junn̈j yaji, 'ixta 'on̈ec, junn̈j cajc pax qui masnil.