Njéga̰g-Rəwtaje 12
12
Rɔ to mbuna Jepte gə Eprayimje’g
1Dəwje gə́ Eprayim mbo̰ dɔ na̰ d’aw par gə́ dɔgel ndá deḛ dəji Jepte pana: See mbata ɗi ɓa i aw rɔ gə Amo̰je lal ɓar sí kar sí j’aw səi wa. Jeḛ ndigije rooi gə kəi ləi na̰’d ya.
2Jepte tel ila dee keneŋ pana: Ma jeḛ gə dəwje ləm j’oma̰je gə Amo̰je yaa̰ ndá loo gə́ ma m’ɓar sí lé seḭ ɔrmje ji dee’g ilamje tar el. 3Loo gə́ ma m’oo to gə́ seḭ reeje gə mba laje səm el ndá ma nja m’ila rɔm da m’ɔr ne rɔ m’aw m’rɔ ne gə Amo̰je. Ndá Njesigənea̰ uba dee ya̰ dee jim’g ya. Ŋga see gelee ban ɓa ɓogənè seḭ reeje gə mba rɔje səm ɓəi wa.
4Jepte mbo̰ koso-njérɔje gə́ Galaad lai aw rɔ ne gə Eprayimje. Njé gə́ Galaad ɓa dum dɔ njé gə́ Eprayim mbata Eprayimje pana: Seḭ toje njékɔr rɔ sí mbuna Eprayimje’g kaḭje. Dəwje gə́ Galaad lé d’isi mbuna Eprayimje gə mbuna Manasə’g. 5Njé gə́ Galaad taa loo-kuru-mán gə́ Jurdɛ̰ gə́ to kel loo gə́ Eprayim. Bèe ɓa loo gə́ njekaḭ kára mbuna njékaḭje’d gə́ Eprayim ree dəji dee pana: Ya̰’mje am m’dəs ndá dəwje gə́ Galaad lé dəjee pana: See i to dəw gə́ Eprayim wa.
Ɓó lé yeḛ ila dee’g pana: Wah! 6Ndá deḛ d’ulá tɔɓəi pana: Bèe ndá maji kari pana: Sibolet. Ndá yeḛ pana: Sibolet, mbata ndəa̰ askəm ɓaree gəd el. Togə́bè ɓa njé gə́ Galaad d’ubá ne d’wá d’inja gwɔsee loo-kuru-mán gə́ Jurdɛ̰’g. Mee ndəa gən lé Eprayimje d’udu d’as tɔl-dɔg-loo-rɔ-sɔ-gir-dee joo (42.000) bèe.
7Jepte to njegaŋ-rəwta dɔ Israɛlje’g as ləbee misa̰, tɔɓəi Jepte, dəw gə́ Galaad lé wəi ar dee dubee mee ɓee-boo gə́ Galaad tɔ.
Ibsan, gə Elo̰, gə Abdon, to njegaŋ-rəwta dɔ Israɛlje-je’g
8Goo kwəi’g lə Jepte lé Ibsa̰, gə́ to dəw gə́ Betlehem ɓa to njegaŋ-rəwta dɔ Israɛlje’g. 9Yeḛ lé ŋganeeje gə́ diŋgam rɔ-munda ləm, gə njé gə́ dené rɔ-munda ləm tɔ. Yeḛ ar ŋganeeje gə́ dené gə́ rɔ-munda lé taa ŋgaw ginkoji gə́ raŋg’d ləm, yeḛ taa ŋganje gə́ dené gə́ ginkoji gə́ raŋg’d rɔ-munda ar ŋganeeje gə́ diŋgam ləm tɔ. Yeḛ to njegaŋ-rəwta dɔ Israɛlje’g as ləbee siri. 10Ibsan lé wəi ndá dubee Betlehem.
11Goo kwəi’g lə Ibsan lé Elo̰, dəw gə́ Jabulo̰ ɓa to njegaŋ-rəwta dɔ Israɛlje’g. Yeḛ to njegaŋ-rəwta dɔ Israɛlje’g as ləbee dɔg tɔ. 12Tɔɓəi Elo̰, dəw gə́ Jabulo̰ lé wəi ar dee dubee Ajalo̰, mee ɓee’d gə́ Jabulo̰ tɔ.
13Goo kwəi’g lə Elo̰ lé Abdon, ŋgolə Ilel, dəw gə́ Pirato̰, ɓa to njegaŋ-rəwta dɔ Israɛlje’g. 14Yeḛ aw gə ŋganje gə́ diŋgam rɔ-sɔ ləm, gə ŋgakeaje rɔ-munda ləm tɔ, deḛ lé t’uba ŋgan mulayḛ̀je-je rɔ-siri. Abdon lé to njegaŋ-rəwta dɔ Israɛlje’g as ləbee jinaijoo. 15Gée’g gogo Abdon, ŋgolə Ilel dəw gə́ Pirato̰ lé wəi ndá dubee Pirato̰, mee ɓee gə́ Eprayim gə́ to dɔ mbal’g lə Amalekje.
Поточний вибір:
Njéga̰g-Rəwtaje 12: SBA2015
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Ngambai Bible © Alliance Biblique du Tchad 1989, 2015.