Njéga̰g-Rəwtaje 11
11
Jepte tel to mbai dɔ Israɛlje
1Jepte gə́ to dəw gə́ Galaad lé to bao-rɔ. Yeḛ lé to ŋgolə kaiya-dené gə́ yeḛ ojee gə Galaad ya. 2Dené lə Galaad lé oji səa ŋganje gə́ diŋgam ar loo gə́ deḛ tɔg mba̰ ndá deḛ tuba Jepte d’ulá pana: I a kiŋga nénduba mee kəi’g lə bɔ síjeḛje el mbata i to ŋgon mee dené gə́ raŋg.
3Bèe ɓa Jepte aḭ ŋgakea̰je aw əw aw si ɓee gə́ Tɔb. Gaim-dəwje mbo̰ dɔ na̰ rɔ Jepte’g ndá d’aw təd wai səa na̰’d.
4Gée gə́ gogo gə kuree lam ndá Amo̰je ree d’ila rɔ dɔ Israɛlje’g. 5Loo gə́ Amo̰je d’aw rɔ gə Israɛlje ndá ŋgatɔgje gə́ Galaad d’aw saŋg Jepte mee ɓee gə́ Tɔb.
6Deḛ d’ula Jepte pana: Gə́ ree, i a to mbai dɔ sí ndá j’a rɔ ne gə Amo̰je.
7Jepte ila ŋgatɔgje gə́ Galaad’g pana: Kédé lé see seḭ ḛjimje bəḭ-bəḭ ləm, tɔbmje mee kəi’g lə bɔmje ləm tɔ el wa. Ŋga see ban ɓa seḭ reeje rɔm’g ɓasinè loo gə́ seḭ síje dan néurti’g lé wa.
8Ŋgatɔgje gə́ Galaad d’ula Jepte pana: Jeḛ n’tel n’reeje rɔi’g ɓasinè gə mba kari aw sə sí gə mba rɔ gə Amo̰je ləm, gə mba kari to mbai dɔ síjeḛ gə mbai dɔ dəwje lai gə́ Galaad ləm tɔ.
9Jepte ila ŋgatɔgje gə́ Galaad’g pana: Ɓó lé seḭ amje m’tel sə sí gə mba kam m’aw m’rɔ gə Amo̰je ɓa Njesigənea̰ uba dee ya̰ dee jim’g ndá m’a to mbai lə sí ya.
10Ŋgatɔgje gə́ Galaad lé d’ula Jepte pana: Ɓó lé jeḛ n’raje né gə́ i ula sí lé el ndá maji kar Njesigənea̰ oo ləm, maji karee gaŋg rəwta dɔ sí’g ləm tɔ.
11Togə́bè ɓa Jepte ḭ aw gə ŋgatɔgje gə́ Galaad na̰’d. Dəwje d’unee d’undá gə mbai gə́ njekaa dɔ dee ndá taje lai gə́ Jepte pa kédé lé yeḛ tel pa no̰ Njesigənea̰’g loo gə́ Mispa’g tɔ.
Jepte ula gə ta ar Amo̰je
12Jepte ula njékaḭkulaje rɔ mbai’g lə Amo̰je mba kar dee d’aw d’ulá pana: See ta ɗi ɓa to mbuna sí jeḛ səi’g ɓa i ree rɔ ne gə ɓee ləm gə mbəa wa.
13Mbai lə Amo̰je lé ila njékaḭkulaje lə Jepte keneŋ pana: To mbata mee ndəa gə́ Israɛlje d’ḭ ne Ejiptə lé deḛ taa ɓee ləm, un kudee Arno̰ saar teḛ Jabok ləm, saar teḛ Jurdɛ̰ ləm tɔ. Ɓasinè lé ya̰ ɓee ləm ɗégégé ya am.
14Jepte tel ula njékaḭkulaje rɔ mbai’g lə Amo̰je lé ya tɔɓəi 15mba kar dee d’aw d’ulá pana: Jepte pa togə́bè pana: Dəwje gə́ Israɛl taa ɓee gə́ Moab el ləm, əsé ɓee lə Amo̰je el ləm tɔ. 16Mbata loo gə́ Israɛlje d’unda loo mee ɓee gə́ Ejiptə teḛ lé deḛ njaa dɔdilaloo’g saar teḛ ta baa-boo-kad gə́ ria lə Baa-Kas ɓa, teḛ ne Kades. 17Togə́bè Israɛlje d’ula njékaḭkulaje rɔ mbai gə́ Edɔm’g mba kar dee d’ulá pana: Jeḛ n’raje ndòo rɔi’g mba kari ya̰ loo ar sí n’dəsje mee ɓee’g ləi. Nɛ mbai gə́ Edɔm lé ndigi sə dee el. Deḛ tel d’ula kula rɔ mbai gə́ Moab ya tɔɓəi, nɛ yeḛ kara ndigi sə dee el ləm tɔ. Ndá Israɛlje lé nai Kades ya . 18Tɔɓəi deḛ d’un rəw gə́ dɔdilaloo’g ga̰ gir ɓee’d gə́ Edɔm gə ɓee gə́ Moab ɓa ree par gə́ bər lə Moab ɓəi, deḛ d’wa loo-si dee kel tura-baa gə́ Arno̰ gə́ nu ɓó d’andə dɔ naŋg ɓee gə́ Moab’g el mbata baa gə́ Arno̰ ɓa to rəw-nim-ɓee gə́ Moab tɔ . 19Israɛlje d’ula njékaḭkulaje rɔ Siho̰’d gə́ to mbai lə Amɔrje gə́ si Esbon ndá Israɛlje d’ulá pana: Jeḛ n’raje ndòo rɔi’g mba kari ya̰ loo ar sí n’dəsje gə rəw gə́ mee ɓee’g ləi j’aw loo lə sí . 20Nɛ Siho̰ ɔm mée dɔ Israɛlje’g mba kya̰ rəw kar dee dəs dɔ naŋg ɓee’g ləa el, yeḛ mbo̰ koso-dəwje ləa lai aw wa ne loo-si Jahas ɓa rɔ ne gə Israɛlje. 21Njesigənea̰ Ala lə Israɛlje ya̰ Siho̰ gə koso-dəwje ləa lai ji Israɛlje’g ar dee dum dɔ dee. Israɛlje taa ɓee lə Amɔrje lai gə́ deḛ d’isi keneŋ lé. 22Deḛ taa dɔ naŋg lə Amɔrje, un kudee baa gə́ Arno̰ saar teḛ Jabok ləm, un kudee dɔdilaloo’g saar teḛ Jurdɛ̰ ləm tɔ. 23Nɛ ɓasinè gə́ to gə́ Njesigənea̰, Ala lə Israɛlje ɓa tuba Amɔrje no̰ dəwje’g ləa gə́ Israɛl neelé, see to i ŋga ɓa a gə taa dɔ naŋg ɓee lə dee lé wa. 24Né gə́ magə ləi gə́ to Kemos ari mba karee to kaḭ lé see i iŋga el wa. Ŋga néje lai gə́ Ala lə sí gə́ Njesigənea̰ unda no̰ sí’d gə́ ka̰ síjeḛ lé see j’a taaje el wa. 25See i lé maji unda Balak, ŋgolə Sipɔr, mbai gə́ Moab wa. See yeḛ uba mula gə Israɛlje əsé rɔ sə dee wa . 26Aa oo, as ləb tɔl-munda (300) gə́ Israɛlje d’isi Esbon gə ɓee-kogoje gə́ wɔji dəa ləm, gə Aroer gə ɓee-kogoje gə́ wɔji dəa ləma, gə ɓee-booje lai gə́ to ta baa gə́ Arno̰ ləm tɔ lé, see ban ɓa i taa dee mee ndəaje’g neelé el wa. 27Ma lé m’ra səi majel el nɛ i ɓa ra səm majel mbata i rɔ səm. Maji kar Njesigənea̰ gə́ njegaŋ-rəwta lé ɓa gaŋg rəwta mbuna Israɛlje gə Amo̰je’g ɓogənè ya.
28Mbai lə Amo̰je lé taa taje gə́ Jepte ulá lé el.
Ndukun lə Jepte
29Togə́bè ɓa Ndil Njesigənea̰ ɔm dɔ Jepte’g. Yeḛ unda Galaad gə Manasə dana gaŋg, dəs aw Mispé gə́ to dɔ naŋg gə́ Galaad, tɔɓəi yeḛ ḭ Mispé gə́ to dɔ naŋg gə́ Galaad lé ɔr rɔ aw iŋga Amo̰je. 30Jepte un ndia gə ndu manrɔ ar Njesigənea̰ pana: Ɓó lé i ɔm Amo̰je jim’g ndá 31loo gə́ m’ḭ ɓee lə Amo̰je m’tel gə rɔlel ndá nana ɓa gə́ a kunda loo teḛ tarəwkəi’g ləm tila kəm ndá yeḛ neelé a to gə kəmee kar Njesigənea̰, tɔɓəi m’a kḭjá gə nékinjaməs gə́ ka̰ roo kari ya.
32Jepte ɔr rɔ aw iŋga Amo̰je rɔ sə dee ndá Njesigənea̰ ɔm dee jia’g ya tɔ. 33Yeḛ dum dɔ dee un kudee Aroer saar teḛ ne mbɔr Minit’g, loo gə́ ɓee-booje rɔ-joo to keneŋ ləm, saar teḛ ne Abel-Keramim ləm tɔ. Yee ɓa Amo̰je d’ula ne dɔ dee no̰ Israɛlje’g ya.
34Loo gə́ Jepte aw tel ree gə́ kəi ləa gə́ Mispa ndá aa oo, ŋgonee gə́ dené unda loo teḛ tila kəmee gə dalè gə ndamje. To ŋgonee gə́ kára ba kiao ya, yeḛ aw gə ŋgon gə́ diŋgam əsé ŋgon gə́ dené gə́ raŋg el. 35Loo gə́ yeḛ ée bèe ndá yeḛ wa kubuje rəa’g hao̰-hao̰ til pana: Wai ŋgonəm, i ar kaarm sɔlé solé-solé ya, i to gə́ mbuna deḛ gə́ d’am m’ndəb pəd-pəd lé. Ma m’un ndum gə ndu manrɔ m’ar Njesigənea̰ mba̰ ɓó m’askəm rəm gə ndum dɔ’g el .
36Ŋgoma̰də lé ilá’g pana: Bɔm, ɓó lé i un ndui gə ndu manrɔ ar Njesigənea̰ ndá maji kari ra səm gə goo ta né gə́ teḛ tai’g to gə́ Njesigənea̰ ari dum ne dɔ njéba̰je ləi gə́ to Amo̰je lé ya. 37Tɔɓəi ŋgoma̰də lé tel ula bɔbeeje pana: Maji kari ndigi səm dɔ ta’g nee: Ya̰’m as naḭ joo mba kam m’aw dɔ mbal’g m’aw m’no̰ ndòo kaw ma̰də ləm gə njéboama̰dje ləm ɓa.
38Yeḛ tel ilá keneŋ pana: Aw ya ndá yeḛ yá̰ aree aw mba ra naḭ joo lé tɔ. Yeḛ ɔd aw gə njéboama̰dje ləa. Yeḛ aw no̰ ndòo kaw ma̰də ləa lé dɔ mbalje’g lé tɔ. 39Loo gə́ rudu naḭ gə́ joo lé un ɗiao mba̰ ndá yeḛ ree rɔ bɔbeeje’g tɔɓəi yeḛ ar ndukun lé aw lée’g béréré dəa’g ya. Yeḛ gər diŋgam el. Un kudee mee ndəa gən lé ndá yee neelé tel to néjiɓee lə Israɛlje ya, 40gə ləbje kára-kára lai lé ŋgama̰dje gə́ Israɛl d’aw d’wa ndòo ŋgolə Jepte gə́ dené gə́ to dəw gə́ Galaad lé as ndɔ sɔ mee ləbje kára-kára lai tɔ.
Поточний вибір:
Njéga̰g-Rəwtaje 11: SBA2015
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Ngambai Bible © Alliance Biblique du Tchad 1989, 2015.