TƏ́DA 23
23
1Balam əda Balak na:
Ī-rāā loo tun̄ yá̰a̰ gə̄ gír sīrí ādə̄m̄ loo ń toō tə́ ō, ī-reē kə man̄g gə̄ sīrí ō, bal batə̄ gə̄ sīrí ō. 2Balak rāā yá̰á̰ ń Balam mērə̄n rāā ní. Gō tə́ anī nin̄ jōó mbak ndējə̄n̄ man̄g kə́ bəra kógə̄ḿ ō, bal batə̄ kógə̄ḿ ō, kə dɔ loo tun̄ yá̰a̰ gēé. 3Balam əda Balak na:
Ī-ra laā kadə dā̰ yāí gə̄ ń ī-róō horoó tə́ toō, ba mā m-ā m-ɔ́tə kɔ̄ɔ́ rɔ̄ tə́ yā kaw̄ dan sa̰y sḛ́ý. Majanī Kɔ́ɔ̄ɓē a tə́nī taḿ. Najə̄ ń a ədam̄ ní ká i najə̄ rí gə̄gē anī, m-ā m-ə́daī. Balam ɔtə aw̄. 4Nə́ɓā tə́nī ta Balam, anī Balam ədan na:
m̄-mēr̄ rāā loo tun̄ yá̰a̰ gə̄ gír sīrí, ba m-ādə̄ ndējə̄n̄ man̄g kə́ bəra kógə̄ḿ ō, bal batə̄ kógə̄ḿ ō, kə dɔ loo tun̄ yá̰a̰ gə̄ ní. 5Anī Kɔ́ɔ̄ɓē əndā najə̄ ta Balam tə́ ədan na:
Ī-tél āw̄ gogə́ rɔ̄ Balak tə́ ba ɔ̄r̄ najə̄ seneé tītə̄ ń noō.
6Balam tél aw̄ anī ənge Balak ra i kə njan kə́ dɔɔ́ kadə dā̰ yān gə̄ ń róō horoó tə́ ní ō, ənge de kə́ bo gə̄ malang kə́ Moab ō. 7Tā anī ni tə́da najə̄ gə̄ ń toō:
Balak əla gōḿ tə́ dɔ nang kə́ Aram tə́ adə̄ m̄-reē.
Mban̄g kə́ Moab əla ɓārə́m̄ tə́ dɔ mbal̄ gə̄ kə́ gír ɓē tə́ tə́ ba ədam̄ na:
Ī-reē, ī-ndɔ̄ĺ de gə̄ kə́ gír kaa yā Jakob tə́ ādə̄m̄.
Ī-reē ə̄nī taí gō ngán Israel gə̄ tə́ ādə̄m̄.
8Deē ń Nə́ɓā ndɔ̄lə́n aĺ ní,
loo kadə̄ m̄-ndɔ̄lə́n i ba̰ý,
deē ń Kɔ́ɔ̄ɓē ənī tan gōn tə́ aĺ ní,
loo kadə̄ m-ə̄nī taḿ gōn tə́ i ba̰ý?
9Ré m̄-ra ta tél mbal̄ gə̄ tə́ ba m-á̰a̰ dɔdə́ anī,
ré m̄-ra dɔ ngán mbal̄ gə̄ tə́ dɔɔ́ ba m-ə̄ndā ma̰ȳdə́ anī,
m-á̰a̰ i gír de gə̄ kə́ ndin̄ tayā
ba əlan̄ rɔ̄də́ dan nápar de kə́ rang gə̄ tə́ alé.
10I náā n asə tə́da dūbə̄ de kə́ gír kaa yā Jakob tə́ ní?
I náā n asə tə́da kutə de kə́ gír kaa yā Israel tə́ ní?
Ādə̄ mə̄kɔ́ kə dɔḿ m-óy yo yā de kə́ súmūú gə̄ n noō ō,
ādə̄ yá̰á̰ ń a rāā kósə Israel gə̄ ní rāām̄ ō.
11Balak əda Balam na:
I rí kə́ beé n ī-rāā seḿ toō? m̄-reē seí i kadə̄ ī-ndɔ̄ĺ madə̄ ba̰ā̰ḿ gə̄ anī ḭ̄ ī-tɔ́r̄ taí dɔdə́ tə́ a? 12Balam tél əda na:
Ré m-ā m-ɔ̄r̄ najə̄ anī, i najə̄ ń Kɔ́ɔ̄ɓē əndā taḿ tə́ ní ngóy n kə m-ɔ̄r̄ aĺ a?
Balam tɔ́r̄ tan dɔ ngán Israel gə̄ tə́ nja kə́ nge ko̰ jōó
13Balak tél əda Balam na:
Ī-reē ādə̄ m-āw̄ seí loo kə́ rang tə́ kadə̄ ī-ra tū tə́ á̰a̰ń gír de gə̄ ní, ba ī-ndɔ̄ĺdə́ ādə̄m̄. Kété ní á̰a̰ i núsə́də́ ngóy, adə̄ i malang alé. 14Balak aw̄ kə Balam bátə́ teē seneé loo ngɔ̄m̄ loo kə́ dɔ mbal̄ Pisga tə́. Ni-rāā loo tun̄ yá̰á̰ gír sīrí, ba tɔ̄l̄ man̄g kógə̄ḿ ō, bal batə̄ kógə̄ḿ ō, ba tun̄ kə dɔ loo tun̄ yá̰a̰ gēé. 15Gō tə́ anī Balam ədan na:
Ī-ra laā kadə dā̰ yāí gə̄ ń ā ī-róō horoó tə́ toō, ba m-ā m-āw̄ yā ra nú ngóō.
16Kɔ́ɔ̄ɓē tə́nī ta Balam, ni-əndā najə̄ kógə̄ḿ tan tə́ ba ədan na:
Ī-tél āw̄ gogə́ rɔ̄ Balak tə́, ba najə̄ ń ā ə́dá ní n toó. 17Balam tél aw̄ anī ənge Balak ra i kə njan kə́ dɔɔ́ kadə dā̰ yān gə̄ ń a róō horoó tə́ ní ō, de kə́ bo gə̄ kə́ Moab ran̄ seneé ō. Balak dəjen najə̄ əda na:
Kɔ́ɔ̄ɓē əda na i rí? 18Anī Balam tə́da najə̄ gə̄ ń toō:
Balak, ḭ́ḭ dɔɔ́, ōō. Ngōn̄ Sipor, ī-nēl̄ mbīí ōoń najə̄ kɔrə̄ḿ.
19Nə́ɓā i deē á a sor̄ alé.
Ni i ngōn̄ kaa Adam á a tūr̄ ndūn alé.
Ni a ɔr̄ najə̄ i karī kanjə̄ rāā yá̰a̰ a?
Yá̰á̰ ń ni-ənī míndən yā rāā ní, a rāā yá̰á̰ ní yā kadə̄ udə gírí.
20m̄-ndigə tɔ́r̄ taḿ dɔ kósə de gə̄ ń toō tə́,
tɔdɔ̄ Kɔ́ɔ̄ɓē adə̄də́ tɔ́r̄ ta, m-ā m̄-tūr̄ yá̰á̰ kógə̄ḿ tū tə́ alé.
21Kɔ́ɔ̄ɓē a̰a̰ yá̰á̰ kə́ majaĺ dan ngán Israel gə̄ tə́ aĺ ō,
ni-a̰a̰ yá̰á̰ kə́ gōtə́ aĺ dɔ dáńdə́ tə́ aĺ ō.
Ni i Nə́ɓā yādə́ ō, ni-ndi i dɔ dáńdə́ tə́ ō.
Nin̄ ɓōkə́n̄ mban̄g yādə́ ń i Kɔ́ɔ̄ɓē ní tɔ̄ȳ ō.
22I ni n teē sedə́ kɔ̄ɔ́ dɔ nang kə́ Ejiptə tə́
kə́ tɔ̄gə́ kə́ tītə̄ tɔ́gə dɔgə ní.
23Kəndā gara gətóo dan ngán Israel gə̄ tə́ ō,
koō ta kɔdə̄ sāā gə̄ gətóo dan ngán Israel gə̄ tə́ ō.
Ré asə dɔ tə́ anī a ədan̄ ngán Jakob gə̄ ō,
ngán Israel gə̄ ō, yá̰á̰ ń Nə́ɓā rāā ní.
24Á̰a̰ī gír de gə̄ kə́ a ḭḭn̄ kə̄ dɔɔ́ tītə̄ dā̰ kə́ do̰,
á̰a̰ī kósə de gə̄ kə́ ḭḭ ran̄ dɔɔ́ tītə̄ ɓɔl.
Ni-əsa dā̰ kəhɔn ō, a̰ȳ mósən ō,
pá tá tél to nang tə́.
25Balak əda na:
Ré ī-ndigə ndɔ̄ĺdə́ aĺ anī, ī-lōō gíŕ tɔ́r̄ taí tə́ dɔdə́ tə́. 26Anī Balam tél ədan na:
m̄-tāāī kété aĺ a? M-ə́da na i yá̰á̰ ń Kɔ́ɔ̄ɓē a ədam̄ ní ngóy n m-ā m-ə́da.
Balam tɔ́r̄ tan dɔ ngán Israel gə̄ tə́ nja kə́ nge ko̰ mətá
27Balak əda Balam na:
Ī-reē ādə̄ m-āw̄ seí loo kə́ rang tə́ ɓáý to̰. Majanī Nə́ɓā a ndigə kadə̄ ī-ndɔ̄ĺ kósə de gə̄ ń toō loo ní tə́ ādə̄m̄. 28Balak aw̄ kə Balam dɔ mbal̄ Peor tə́ ta dəla loo tə́. 29Balam ədan na:
Ī-rāā loo tun̄ yá̰a̰ gə̄ gír sīrí loo ń toō tə́ ādə̄m̄, ba ī-tɔ̄l̄ man̄g kə́ bəra sīrí ō, bal batə̄ sīrí ō, ādə̄m̄. 30Balak rāā yá̰á̰ ń Balam ədan ní. Gō tə́ anī ni tɔ̄l̄ man̄g kógə̄ḿ ō, bal batə̄ kógə̄ḿ ō, ba tun̄ kə dɔ loo tun̄ yá̰a̰ gēé.
Поточний вибір:
TƏ́DA 23: SARDC
Позначайте
Копіювати
Порівняти
Поділитись
Хочете, щоб ваші позначення зберігалися на всіх ваших пристроях? Зареєструйтеся або увійдіть
Bibəl ta Sar̄ © L'Alliance Biblique du Tchad, 2006, 2010.