TƏ́DA 22
22
Ngán Israel gə̄ ndin̄ ndágə loo gə̄ kə́ Moab tə́
(22—36)
Mban̄g Balak ɓāŕ Balam
1Ngán Israel gə̄ ɔrə̄n̄ dɔɔ́ aw̄ ndin̄ ndágə̄ loo gə̄ kə́ Moab tə́, dɔ gɔ́sə bā Jurdḛ kə́ dām̄ kə́ gír ɓē tə́ ń ra sɔɔ̄n̄ ta naā kə ɓē kə́ Jeriko ní. 2-4Dan ngeé ń noō tə́ ní Balak ngōn̄ Sipor mban̄g kə́ Moab oō kōō yá̰á̰ ń ngán Israel gə̄ rāān̄ kə Amor gə̄ ní. Moab gə̄ a̰a̰n̄ kadə̄ kutə ngán Israel gə̄ i ngá̰ý anī ɓōĺ rāādə́ ngá̰ý, adə̄ ədan̄ kum kɔɔ̄ gə̄ yā Madian gə̄ na:
Kósə de gə̄ ń noō a əsan̄ yá̰a̰ malang kə́ gidəjí tə́ kadə̄ təgā kɔ̄ɔ́ tītə̄ ń man̄g gə̄ a əsanə̄ń mu kə́ bembeé ní.
5Mban̄g əla de gə̄ gō Balam ngōn̄ Beor tə́ ɓē kojən tə́ Petor dɔ gɔ́sə bā tə́ kadə̄ ədanən̄ na:
Kósə de gə̄ kə́ teēn̄ Ejiptə reē ndin̄ laā. Nin̄ taān̄ dɔ nang malang. Ndin̄ i kadə loo yāḿ tə́ ngɔr. 6Ní, m̄-rāāī ɓɔ́, ī-reē ī-ndɔ̄ldə́ ādə̄m̄ tām̄ tɔ́gə́də́ tɔȳ yāḿ. Majanī m-ā m̄-tetədə́ rɔ̄ɔ̄ ō, m-ā m̄-tə̄ɓādə́ kɔ̄ɔ́ dɔ nang ń ndin̄ tū tə́ ní ō. Tɔdɔ̄ m̄-gēr̄ kadə̄ deē ń ā ī-tɔ́r̄ taí dɔn tə́ ní, a ənge tɔ́r̄ ta ō, deē ń ā ī-ndɔ̄lə́n ní, ndɔ̄ĺ a əsō dɔn tə́ ō. 7Kum kɔɔ̄ gə̄ yā Moab gə̄ ō, kum kɔɔ̄ gə̄ yā Madian gə̄ ō, ɔyn̄ yá̰a̰ gə̄ kə́ yā kəndāń nja kɔdə̄ sāā ń i Balam ní jīdə́ tə́ ba aw̄n̄. Dan ń ugə̄n̄ ɓēé looneé anī ədanən̄ kəla yā Balak ń əladə́ ní. 8Anī Balam ədadə́ na:
Ī-ɓīī laā. Bírí anī m-ā m-ə́dásí yá̰á̰ ń Kɔ́ɔ̄ɓē a ədam̄ ní.
Adə̄ de kə́ bo gə̄ kə́ Moab ton̄ ɓē Balam ndɔ̄ ń noō tə́. 9Nə́ɓā reē rɔ̄ Balam tə́ ba dəjen na: De gə̄ ń ə́hɔ́də́ mbā toó i náā gə̄? 10Balam tél əda Nə́ɓā na:
I Balak ngōn̄ Sipor ń i mban̄g kə́ Moab ní n əladə́ kadə̄ reē ədamə̄n̄ na: 11Gír de gə̄ ń teēn̄ kɔ̄ɔ́ kem ɓē kə́ Ejiptə ní na taān̄ dɔ nang malang. Ní, kə m-āw̄ kə m̄-ndɔ̄ĺdə́ m-ādə̄n. Ɓáa majə a na n-tetədə́ rɔ̄ɔ̄ ō, na n-tə̄ɓādə́ kɔ̄ɔ́ ō. 12Nə́ɓā əda Balam na:
Ī-lōō kaw̄ sedə́. Ā ī-ndɔ̄ĺ gír de gə̄ ń noō alé, tɔdɔ̄ tɔ́r̄ ta i dɔdə́ tə́.
13Teē kə ndɔ̄ý anī Balam ḭḭ dɔɔ́ ba əda de kə́ bo gə̄ ń mban̄g Balak əladə́ ní na:
Ī-tél āwī gogə́ ɓēé, tɔdɔ̄ Kɔ́ɔ̄ɓē ɔgə̄m̄ kaw̄ sesí kɔ̄ɔ́.
14De kə́ bo gə̄ kə́ Moab ní tél aw̄ ədan̄ Balak na Balam mbātə́ reē sedə́ kɔ̄ɔ́. 15Banī Balak əla de kə́ bo kə́ rang gə̄ ɓáý to̰, kə́ kutədə́ tɔȳ ngé kə́ kété gə̄ ō, kə́ bo tɔȳn̄də́ gə̄ ō. 16De gə̄ ní reē ugə̄n̄ rɔ̄ Balam tə́ anī ədanən̄ na:
Balak ngōn̄ Sipor ɔr̄ najə̄ tītə̄ toō beé, əda na: m̄-rāāī ɓɔ́, ī-lōō mbātə́ reē ɓē yāḿ tə́. 17Tɔdɔ̄ m-ā m-ɔ́sə gɔnií ngá̰ý ō, m-ā m̄-rāā yá̰a̰ malang ń ā ə́dam̄ ní ō, ba ī-reē ī-ndɔ̄ĺ gír de gə̄ ń toō ādə̄m̄. 18Banī Balam tél əda de gə̄ ń Balak əladə́ ní na:
Ká ré Balak adə̄məń gində̄ arjā̰a̰ ō, lɔ́r ō, kə́ kem kújə yān tə́ malang gə̄gē, m-ā m̄-rāā yá̰á̰ kə́rēý yā mānəń dɔ ndū Kɔ́ɔ̄ɓē Nə́ɓā yāḿ alé. 19Ba tītə̄ ń madə̄sí gə̄ tonə̄ń kété ní, ndɔ̄ɔ́ ɓōólaā ní ā ī-toī rɔ̄ḿ tə́ ō. Ī-to ī-ngóī ādə̄ m-ōō yá̰á̰ ń Kɔ́ɔ̄ɓē a ədam̄ ɓáý to̰ ní. 20Nə́ɓā reē rɔ̄ Balam tə́ ndɔ̄ɔ́ ədan na:
Ré de gə̄ ń toō reēn̄ i ɓāríī tə́ anī āw̄ sedə́. Ba i yá̰á̰ ń m-ā m-ɔ́jiī ní ngóy n ā ī-rāā ní. 21Teē kə ndɔ̄ý anī Balam ənī síŕdí gidə kó̰o̰ kərō yān tə́, ba aw̄ kə de kə́ bo gə̄ kə́ Moab.
Kó̰o̰ kərō yā Balam
22Ba dan ń Nə́ɓā a̰a̰n loo kaw̄ tə́ anī, wōn̄g rāān adə̄ nge kaw̄ kəla yā Kɔ́ɔ̄ɓē aw̄ ra kum róbó non tə́ yā kɔgə̄n mān̄. Balam ndi gidə kó̰o̰ kərō yān tə́ ō, ngé kəla yān kə́ jōó gə̄ a dānə̄nən̄ ō. 23Kó̰o̰ kərō a̰a̰ nge kaw̄ kəla yā Kɔ́ɔ̄ɓē ń ra kum róbó kə njár̄ kəyā kaskaraá jīn tə́ ní anī tīl̄ udə bembeé. Balam ənda kó̰o̰ kərō reē seneé róbó. 24Nge kaw̄ kəla yā Kɔ́ɔ̄ɓē aw̄ ra kété non tə́ kum kə̄lá róbə́ kə́ kem ndɔr̄ kāgə̄ nduú gə̄ tə́. Róbə́ ní ngán ndogə̄ mbal̄ gə̄ i kadə tə́ dām̄ jōó. 25Dan ń kó̰o̰ kərō a̰a̰ nge kaw̄ kəla yā Kɔ́ɔ̄ɓē anī, ɔr kə gō kadə ndogə̄ mbalá, adə̄ mbal̄ usə nja Balam. Anī Balam əndan ɓáý to̰. 26Nge kaw̄ kəla yā Kɔ́ɔ̄ɓē mān̄də́, aw̄ kété nodə́ tə́ ɓáý to̰ kum ngōn̄ róbə́ kə́ dūú ngá̰ý tə́, kə́ loo tɔ̄ɔ̄ tū tə́ geleé aké ko̰ó̰ gətóo. 27Dan ń kó̰o̰ kərō a̰a̰ nge kaw̄ kəla yā Kɔ́ɔ̄ɓē anī, əsō nang tə́ gír Balam tə́. Wōn̄g rāā Balam seneé ngá̰ý, adə̄ tə̄ndān kə kāgāá.
28Kɔ́ɔ̄ɓē rāā adə̄ kó̰o̰ kərō ɔr̄ najə̄ kə Balam. Kó̰o̰ kərō əda Balam na:
m̄-rāā i rí yāí á ə́ndam̄ nja mətá ní? 29Balam tél əda kərō na:
I tām̄ ī-mbóo seḿ. Ré kaskar i jīḿ tə́ anī m̄-tɔ̄lī ngɔr ń toō tə́. 30Kó̰o̰ kərō tél əda Balam na:
Mā i kó̰o̰ kərō yāí ń ā ālə̄m̄ kə ndɔ̄ gə̄ ní aĺ a? Kété gə̄ ní m̄-rāā yá̰á̰ kə́ beé seí a? Balam əda kərō na:
Kété gə̄ ní ī-rāā beé alé.
31Anī Kɔ́ɔ̄ɓē teē kum Balam adə̄ ni-a̰a̰ nge kaw̄ kəla yā Kɔ́ɔ̄ɓē n ra kum róbó kə njár̄ kəyā kaskaraá jīn tə́ ní. Kə̄ ta jī tə́ noō Balam ɔsə non nang tə́ non tə́. 32Anī nge kaw̄ kəla yā Kɔ́ɔ̄ɓē ədan na:
Ə́ndá kó̰o̰ kərō yāí nja mətá i tām̄ rí tə́? I mā n m̄-reē m̄-ra róbó m-ɔ̄gī mān̄, tām̄ mbā ń ā āw̄ toó i mbā kə́ ī-gír̄ yá̰á̰ ngá̰ý dɔ tə́ alé. 33Kó̰o̰ kərō ni a̰a̰m̄, adə̄ tīlə̄m̄ nja mətá. Nə́ngē tə́ tīlə̄m̄ aĺ anī m̄-tɔ̄lī kɔ̄ɔ́ ba m-ə́ya̰n ni. 34Balam əda nge kaw̄ kəla yā Kɔ́ɔ̄ɓē na:
m̄-rāā i yá̰á̰ kə́ gōtə́ alé, tɔdɔ̄ m̄-ger̄ kadə̄ i ḭ̄ n ī-ra noḿ tə́ kum róbó ní alé. Ba ń toō ní ré mbā ní nelī aĺ ɓáa m-ā m̄-tél yā kaw̄ gogə́ ɓēé. 35Anī nge kaw̄ kəla yā Kɔ́ɔ̄ɓē tél ədan na:
Āw̄ kə de gə̄ ń noō, banī i najə̄ ń m-ā m-ə̄ndā taí tə́ ní ngóy n ā ə́dá ní. Tā anī Balam aw̄ kə de kə́ bo gə̄ yā Balak tá.
Balam nin̄ kə Balak əngen̄ naā
36Dan ń Balak oō kadə̄ Balam a reē ɓēé looneé anī, teē tə́nī tan bátə́ ugə̄ Ir Moab. Ir Moab i ɓē kə́ dɔ gɔ́sə bā Arnon ń i dɔ nin̄ dɔ nang yā mban̄g Balak tə́ ní. 37Balak dəje Balam na: De gə̄ ń m-ə́ládə́ ɓāríī tə́ ní asə aĺ i mbée a? Ī-reē aĺ i tām̄ rí tə́? Ī-gír̄ kadə̄ m-ásə kɔsə gɔnií aĺ a? 38Balam tél əda Balak na:
Mā n toó tā. Ba kum najə̄ ń kə m-ə́daī ní na i rí? I najə̄ ń Nə́ɓā a əndā taḿ tə́ ní ngóy n m-ā m-ə́daī ní. 39Balam nin̄ kə Balak aw̄ ugə̄n̄ Kiryat Husot. 40Balak tɔ̄l̄ man̄g gə̄ ō, batə̄ gə̄ ō, ba tun̄də́. Ni-gān̄g sḛ́ý əlań adə̄ Balam ō, de kə́ bo gə̄ ń dānə̄nən̄ ní ō.
Balam tɔ́r̄ tan dɔ ngán Israel gə̄ tə́
41Teē kə ndɔ̄ý anī, Balak aw̄ kə Balam Bamot Baal ń i loo kə́ kḭḭ kə̄ dɔɔ́ tə́ ní. Ré deē ra loo ní tə́ anī, a a̰a̰ dɔ núsə ngán Israel gə̄.
Поточний вибір:
TƏ́DA 22: SARDC
Позначайте
Копіювати
Порівняти
Поділитись
Хочете, щоб ваші позначення зберігалися на всіх ваших пристроях? Зареєструйтеся або увійдіть
Bibəl ta Sar̄ © L'Alliance Biblique du Tchad, 2006, 2010.