इब्रानी 9
9
संसारे खिम्भा भितरी च़ाकरी
1पैहली करारा दी दैनी परमेशरै इज़राईली मणछा लै च़ाकरी करने बिधी अर तेऊ बोलअ तिन्नां लै पृथूई दी च़ाकरी करने पबित्र ज़ैगा बणाणां लै। 2मतलब तिन्नैं बणाअं एक खिम्भ अर तेथ ती दूई पांडा, बाघली पांडा त सदीअ अर च़ौकी अर भैंट दैनी दी रोटी, अर तेता लै बोला तै पबित्र ज़ैगा।#लुआ. 25:23-30; 26:1-30
3तेखअ त तिधी एक पल्दअ अर तेथ पिछ़ू ती दुजी पांड ज़ेता लै खास पबित्र ज़ैगा बोला तै।#लुआ. 26:31-33
4तैहा पांडा ती सुन्नैं करै मल़्ही दी बेदी अर धनैरअ, अर च़ऊ बाखा का सुन्नैं करै महल़अ द काठो मणशू ज़हा लै करारो मणशू बोला तै, अर तेथ त खाण करै भरअ द एक सुन्नेंओ पटारू अर हारणे शोठी ज़ेथ नऊंईं टिरा बी थिई निखल़ी दी अर तिंयां करारे तगती।#लुआ. 16:33; 25:10-16; 30:1-6; गण. 17:8-10; बधा. 10:3,5
5तेता प्रैंदै तै प्रतप्पा आल़ै करूब, तिन्नें फैंख तै मणशूए ढक्कणा प्रैंदै फुआरुऐ दै ज़ेता लै प्राश्ते ज़ैगा बोला, इना गल्ला बाढै खोज़णेंओ बगत निं एभै आथी।#लुआ. 25:18-22
6इहअ करै करा तै तिंयां खिम्भा भितरी काम-काज़। तेखअ डेओआ त प्रोहत धैल़ बाघली पांडा लै। तिंयां करा तै तेथ परमेशरे च़ाकरी ज़िहअ तिन्नां लै तेतो बधान आसा त खोज़अ द।#बधा. 27:21
7पर दुजी पांड ज़ेता लै खास पबित्र ज़ैगा बोला तै तिधी डेओआ त माहा प्रोहत सिधअ साला दी एकी बारी अर सह निंयां त आप्पू संघै बल़ीदान करी लोहू, ताकि ज़ुंण तेऊ आप्पू होरी लोगे भलै भूल-च़ूक हुई, तिंयां माफ होए।#लुआ. 30:10; लेब. 16:2
8इना सोभी गल्ला करै करा पबित्र आत्मां ऐहा गल्ला बाखा शारअ कि ज़ेभै तैणीं खिम्भे बाघली पांड आसा तेभै तैणीं निं सोभी आम लोगा लै भितरी खास पबित्र ज़ैगा तैणीं डेऊणे बात प्रगट हुई।
9अह खिम्भ आसा आझ़कै ज़मानैं समझ़णा लै एक कथ्या कि ज़हा दी एही भैंट अर बल़ीदान प्रोहत च़ढाऊआ तै, तेता करै निं च़ाकरी करनै आल़ेए सोर-समझ़ कधि सिध्द हई सकदी ती। 10किल्हैकि तिंयां थिऐ सिधै खाणैं पिणें च़िज़ा अर कई रंगे न्हैऊंण बिधीए साबै देही लै तेभै तैणीं बधान, ज़ेभै तैणीं कि तेतो किज़ै होर राम्बल़अ समाधान निं होए।
मसीहे लोहूए शगती
11पर ज़ांऊं मसीहा म्हारअ माहा प्रोहत बणी आअ, तेऊ आणी ईंयां शोभली गल्ला ज़ुंण एभै हाम्हां का आसा। तेखअ डेऊअ सह परमेशरा सेटा स्वर्गा लै, सह आसा भितरे खास पबित्र ज़ैगा ज़िहअ, पर अह निं एऊ संसारो आथी ज़ुंण परमेशरै बणाअं। अह आसा तेऊ खिम्भा का बधिया ज़ुंण मोसा गूरै ऐहा पृथूई दी बणाअं किल्हैकि सह आसा सिध्द। 12तेऊ निं अह होरी प्रोहता ज़िहअ गाभू-छ़ेल्हूए लोहू करै किअ, पर तेऊ किअ आपणअ ई बल़ीदान करी लोहू क्रूसा दी बहाऊई करै एकी बारी खास पबित्र ज़ैगा लै डेऊई सोभिओ सदा लै छ़ुटकारअ।
13किल्हैकि, ज़ै गाभू छ़ेल्हूओ लोहू अर बाछ़ीओ छ़ार छ़ल़िकी देही शुची पबित्र हआ,#लेब. 16:3,14-16; गण. 19:9,17-19
14तै मसीहा ज़ुंणी आप्पू ई अमर आत्मां करै परमेशरे सम्हनै आपणअ नर्दोश लोहू बल़ीदान किअ, सह सका थारी सोर मौता बाखा निंणै आल़ै कामां का पबित्र लोहू करै शुची करी ताकि तम्हैं ज़िऊंदै परमेशरे च़ाकरी करी सके।
15तैही आसा मसीहा परमेशरा अर लोगा मांझ़ै नऊंईं करारो खणोढी, ताकि हाम्हैं ज़ुंण परमेशरै आसा शादै दै हाम्हैं तैहा बरासते साझ़ू सदा लै होए ज़ेते तेऊ करार आसा किई दी। किल्हैकि पैहली करारा दी हाम्हैं ज़ुंण पाप किऐ तै तेते सज़ा का बच़ाऊंणा लै दैनी तेऊ म्हारी तैणीं आपणीं ज़ान।
16करार हआ बसीहता ज़ेही, तेता लै हआ ऐहा गल्लो सबूत दैणअ ज़रूरी कि ज़ुंणी बसीहत आसा करी डाही दी सह गअ मरी। 17किल्हैकि बसीहत हआ मरी करै ई पूरी, अर ज़ेभै तैणीं बसीहत करनै आल़अ ज़िऊंदअ आसा, तेभै तैणीं निं सह बसीहत किछ़ू कामें हंदी।
18पैहली करार बी हआ ती पशूए लोहू करै पूरी ज़ेभै प्रोहत तिन्नों बल़ीदान करा तै। 19किल्हैकि ज़ांऊं मोसा सोभी लोगा का बधाने सोभी गल्ला समझ़ाऊई मुक्कअ, तिन्नैं आणअ गाभू-छ़ेल्हू अर मिम्मूंओ लोहू, पाणीं, लाल ऊन, ज़ुफा, संघा छ़ल़िकअ तैहा कताबा दी अर सोभी लोगा दी।#लेब. 14:4; गण. 19:6
20तेखअ बोलअ तिन्नां लै इहअ, “अह लोहू करा परमेशरे तैहा करारा पाक्की ज़ुंण परमेशरै तम्हां लै आसा दैनी दी।”#लुआ. 24:8
21एऊ ई साबै छ़ल़िकअ मोसा खिम्भा भितरी अर परमेशरे च़ाकरी करने सारै समाना दी बी लोहू।#लेब. 8:15,19 22मोसा गूरै खोज़ै दै बधाने साबै करा तै सोभी च़िज़ा लोहू करै शुची अर बाझ़ी लोहू बहाऐ निं पाप माफी हंदी।#लेब. 17:11
मसीहे बल़ीदाना करै पाप-माफी
23तैही ज़ुंण सह खिम्भ आसा, सह आसा स्वर्गे असली पबित्र च़िज़ो एक नकल अर छ़ैल्ली ज़िहअ, तेता बी करा तै पशूए लोहू करै शुचै। पर स्वर्गै असली च़िज़ा लै लोल़ी पशूए लोहू का बी बडअ बल़ीदान ज़ुंण पबित्र होए।
24किल्हैकि मसीहा बी निं तेऊ हाथा करै बणाऐं दै खिम्भा भितरी डेऊअ ज़ुंण स्वर्गे असली पबित्र ज़ैगे नकल अर छ़ैल्ली थिई, पर सह डेऊअ स्वर्गै ताकि सह हाम्हां लै परमेशरे सम्हनै शुझिए।
25इहअ निं कि सह भिई-भिई बल़ीदान करे, ज़िहअ माहा प्रोहत हर साल पशूओ बल़ीदान करी लोहू निंईं खिम्भा भितरी पबित्र ज़ैगा डेओआ। 26ज़ै इहअ ज़रूरी हंदअ, संसार शुरू हणैं ओर्ही लागणअ त मसीहा कई बारी आपणअ बल़ीदान करनअ। पर एभै एऊ जुगे हुअ खिरी सह प्रगट ताकि आपणअ बल़ीदान दैई एकी ई बारी सह सोभिए पाप दूर करी सके।
27ज़िहअ मणछा लै एकी बारी मरनअ अर नसाफ हणअ पैहलै ई का आसा पाक्कअ किअ द,#2 करि. 5:10; ज्ञैन. 12:14
28तिहअ ई हुअ मसीहा बी हरेकी मणछे पाप दूर करना लै बल़ीदान। सह एछणअ एकी बारी भिई तिन्नां बच़ाऊंदअ फिरी ज़ुंण तेऊ न्हैल़ै भाल़ै आसा लागै दै नां कि पापे तैणीं भिई बल़ीदान हणां लै।#1 पत. 2:24; तित. 2:13
Seçili Olanlar:
इब्रानी 9: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.