इब्रानी 10
10
मसीहा हुअ सोभी लै एकी ई बारी बल़ीदान
1किल्हैकि मोसा गूरो बधान थिअ आजू एछणैं आल़ी शोभली गल्ले छ़ैल्ली, सह निं असली रूप आथी, तेऊ बधाने साबै लागा तै हर साल भिई-भिई बल़ीदान करनअ पर तेता करै निं परमेशरे च़ाकरी करनै आल़ेए पाप खतम हई सकदै तै। 2ज़ै च़ाकरी करनै आल़ेए पाप खतम हुऐ हंदै, तै हणीं ती तिन्नां च़ाकरी करनै आल़ेए पाप करने सोर बी शुची, तेखअ निं तिन्नां भिई-भिई बल़ीदान करने ज़रुरत पल़णीं ती।
3-4पर गाभू-छ़ेल्हू अर झ़ोटैओ बल़ीदान करी निं तिन्नें पाप दूर हई सकदै तै। पर तेता करै फिरा ती लोगा हर साल तिन्नें किऐ दै पापे आद।
5तैही बोलअ तधू मसीहा परमेशरा लै ज़धू सह एऊ संसारा लै आअ,
“तूह निं बल़ीदान अर भैंट च़ाहंदअ,
पर तंऐं दैनी मुल्है मेरी देही ज़ेता हुंह भैंट दैई सकूं।
6नां तंऐं हूम बल़ीदान करना लै बोलअ, नां तंऐं पाप-माफी लै पाप बल़ी मांगी।
7तेखअ बोलअ मसीहा इहअ, ‘हे परमेशर,
हुंह आसा इधी भाल़, किल्हैकि
तेरी बधाने कताबा दी आसा मेरै बारै लिखअ द।
मेरी खुशी आसा सह ई कि मुंह करनअ तिहअ ई ज़िहअ तूह च़ाहा।’”
8बधान बोला इहअ कि पाप माफी लै दैणीं भैंट अर हूम अर मेल़-ज़ोल़ो बल़ीदान। पर मसीहा बोला इहअ कि परमेशर निं इना गल्ला च़ाहंदअ!
9तेखअ बोला मसीहा इहअ,
“हे परमेशर, हेर, हुंह गअ एछी,
मुंह करनअ तिहअ ज़िहअ तूह बोले।”
इहअ बोली किई तेऊ पैहली करार पूरी ताकि दुजी करार सिध्द होए। 10किल्हैकि परमेशर च़ाहा त इहअ कि सह हाम्हां ईशू मसीहे देहीओ बल़ीदान करी एकी ई बारी सोभी पबित्र करे।#इब्रा. 10:14
11पराणीं करारे साबै करा तै प्रोहत हर धैल़ै बेदी सम्हनै खल़्हुई करै च़ाकरी। तिंयां करा तै हर धैल़ै बल़ीदान ज़ुंण कधि पाप दूर निं करी सकदै।#लुआ. 29:38-39
12पर म्हारअ माहा प्रोहत मसीहा हुअ आप्पू ई म्हारै पापा पिछ़ू बल़ीदान, सह बल़ीदान आसा सारी सदा लै। ऐबै आसा सह परमेशरे दैहणीं बाखा सोभी का बडी पदबी दी बेठअ द। 13सह रहणअ तेभै तैणीं बणी ज़ेभै तैणीं कि तेऊए दुशमण हारी करै तेऊए खूरा हेठै करी लए।#भज. 110:1
14तेऊए एकी बल़ीदाना करै किऐ मसीहा तिन्नें पाप सदा लै दूर ज़ुंण तेऊ परमेशरा सेटा आणै। 15पबित्र आत्मां बी खोज़ा हाम्हां का एते बारै इहअ बोली कि प्रभू बोला इहअ,#इब्रा. 8:12; जेर. 31:34
16“ज़ेभै सह बगत एछे,
तेभै करनी मुंह तिन्नां संघै नऊंईं करार
मुंह पाणअ आपणअ बधान तिन्नें मन्नैं,
अर सह डाहणअ मुंह तिन्नें दिलै लिखी।
17मुंह करनै तिन्नें पाप माफ अर तेखअ निं मुंह तिन्नें गलती आद डाहणीं।”
18“ऐबै ज़ै तिन्नें सारै पाप माफ गऐ हई, ऐबै निं पाप माफी लै होर बल़ीदान दैणें ज़रुरत आथी।”
परमेशरा नेल़ डेओआ
19मसीहा दी मेरै भाई-बैहणीओ, ईशू मसीहे मौता करै आसा ऐबै हाम्हैं तैहा खास पबित्र ज़ैगा लै डेऊणा लै पूरै आज़ाद। 20आपणअ बल़ीदान करी खोल्ही ईशू हाम्हां लै भितरी परमेशरा सेटा खास पबित्र ज़ैगा डेऊणा लै नऊंईं बात ताकि हाम्हैं सदा ज़िऊंदै रहे। 21तैही आसा म्हारअ इहअ माहा प्रोहत, ज़ुंण परमेशरे घअरे स्वर्गे पबित्र ज़ैगो प्रोहत आसा।
22तै एछा, हाम्हां डेऊणअ परमेशरा नेल़ शुचै मन्न अर पूरै विश्वासा संघै। किल्हैकि म्हारी दोशी सोर शुची करना लै हेरअ मसीहो लोहू छ़ल़िकी अर म्हारी देही हेरी शुचै पाणीं करै धोई।#इफि. 5:26; 1 पत. 3:21; एज. 36:25
23आपणीं आशा दी डाहणअ पाक्कअ विश्वास। किल्हैकि ज़ुंणी करार आसा किई दी, सह परमेशर आसा शुचअ। 24ऐहा गल्लो डाहणअ खास धैन कि आप्पू मांझ़ै एकी दुजे किहअ करै सका झ़ूरी अर भलै कामां करना लै मज़त करी। 25आप्पू मांझ़ै कठा हणअ निं छ़ाडी, ज़िहअ कि कई भैस्स आसा, पर एकी-दुजै रहा समझ़ाऊंदै लागी, अर ज़िहअ-ज़िहअ प्रभूए फिरी एछणें धैल़ै तम्हैं नेल़ एछदअ भाल़े, तिहअ-तिहअ रहै होर बी खास्सै मिलदै-ज़ुल़दै लागी।
26किल्हैकि सत्त बछ़ैणनै का बाद बी ज़ै हाम्हैं ज़ाणीं भुझ़ी करै पाप करे, तै निं पाप माफ करना लै होर किछ़ै बल़ीदान आथी। 27हाँ, सज़ा लै एक डरैऊंणै आल़ी धैल़ी अर आगीए कूंडा जैंदरे ज़ल़ण आसा बाकी, ज़ेथ परमेशरे दुशमण भस्सम करनै।
28ज़ुंण मोसा गूरो बधान चोल़ा तै, तिन्नां पाआ तै तेभै झींण किऐ बाझ़ी मारी ज़ेभै तिन्नें खलाफ दूई या चअन मणछ शाजत दैए।#बधा. 17:6; 19:15
29पर ऐहा गल्ला सोठा कि मसीहा आसा परमेशरो पूत। ज़ै कुंण तेऊए करारो बरोध करा अर तेऊए बल़ीदाना निक्कै समझ़ा अर तेऊ लोहू नांईं मंदअ ज़ेता करै परमेशरै तेऊ मणछे पाप माफ किऐ, ज़ै सह मणछ पबित्र आत्मों बरोध करे ज़ुंणी तेऊ लै झींण किई, तेऊ लै दैणीं परमेशरा डरैऊंणी अर घोर सज़ा।#इब्रा. 12:25
30किल्हैकि हाम्हैं ज़ाणा तेऊ, ज़ुंणी इहअ बोलअ,
“बदल़अ लणअ आसा मेरअ काम,
मुंह लणअ आप्पै बदल़अ।”
तेखअ बोलअ इहअ बी,#बधा. 32:35-36; भज. 135:14
“प्रभू करनअ आपणैं लोगो नसाफ।”
31अह हणीं बडी डरैऊंणी गल्ल ज़ै ताह सर्वशक्तिमान ज़िऊंदअ परमेशर कैद करे अर ताल्है सज़ा दैए।
32तिन्नां धैल़ै करा आद ज़धू तम्हां पैहली बारी मसीहे सत्तो थोघ लागअ। तम्हैं केतरअ दाह-दुख ज़िरअ! पर तज़ी बी रहै तम्हैं विश्वासा दी बणी। 33थारी किई कई बारी लोगै खुल्है आम निंदा अर दुख-सांगट ज़िरदी बणै लोगा लै तमास्सै। कई बारी हुऐ तम्हैं तिन्नें विश्वासी भाईए मसीबता दी साझ़ू, ज़सरी एही ई बूरी दशा बिति। 34ज़ुंण मसीहा दी विश्वास करनै पिछ़ू कैद तै किऐ दै, तम्हैं निं सिधै तिन्नां लै झणैल़ू रहै, पर तम्हैं दैनी खुशी-खुशी आपणीं ज़ैदात विश्वास नांईं करनै आल़ै बी निंणै। किल्हैकि तम्हां का थिअ थोघ कि तम्हां लै आसा एता का बधिया सदा रहणैं आल़ी ज़ैदात स्वर्गै डाही दी।
35आपणीं खरी दी निं प्रभू दी भरोस्सै करने आपणीं हैअ छ़ाडा, किल्हैकि तेतो भेटणअ तम्हां बडअ फल। 36किल्हैकि तम्हां लागा सबर करनअ ज़रूरी, ताकि परमेशरे मरज़ी पूरी करी तम्हां करारो फल भेटी सके। 37ज़िहअ पबित्र शास्त्रा दी परमेशर मसीहे बारै बोला,#हब. 2:4; गल. 3:11
“एछणैं आल़अ आसा छ़ेक्कै एछणैं आल़अ,
तेऊ निं खास्सी बल़ैग पाणीं।
38ज़ुंण लोग मंऐं विश्वासा करै धर्मीं बणाऐं तिंयां रहणैं ज़िऊंदै,
हुंह निं तिन्नां का खुश हंदअ ज़ुंण विश्वासा का पिछ़ू हटा।”
39पर हाम्हैं निं तिन्नां मणछा ज़िहै आथी ज़ुंण विश्वासा का पिछ़ू हटा अर बरैबाद हआ। हाम्हैं आसा खिरी तैणीं विश्वास डाहणैं आल़ै ज़सरी आत्मां बच़णीं।
Seçili Olanlar:
इब्रानी 10: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.