इब्रानी 8
8
ईशू आसा म्हारअ माहा प्रोहत
1ऐबै ज़ुंण गल्ला हाम्हैं आसा बोल्दै लागै दै, तिन्नां मांझ़ै आसा सोभी का बडी गल्ल अह कि म्हारअ आसा इहअ माहा प्रोहत ज़ुंण स्वर्गै परमेशरे महान राज़गाद्दी दी दैहणीं बाखा सोभी का बडी पदबी दी आसा बेठअ द।#भज. 110:1; इब्रा. 10:12
2म्हारअ माहा प्रोहत करा स्वर्गै सोभी का खास पबित्र ज़ैगा असली खिम्भा भितरी च़ाकरी, ज़ुंण मणछे हाथै निं आथी बणाअं द। पर सह आसा परमेशरै आप्पै बणाअं द।
3किल्हैकि हरेक प्रोहता हआ लोगे पाप माफी लै भैंट अर बल़ीदान दैणें तैणीं, तैही आसा अह ज़रूरी कि म्हारै माहा प्रोहत ईशू का बी लोल़ी किज़ै भैंट दैणा लै हुअ। 4ज़ै मसीहा पृथूई दी हंदअ तै निं सह कधि माहा प्रोहत हंदअ, किल्हैकि पृथूई दी आसा मोसा गूरे बधाने साबै भैंट दैणैं आल़ै प्रोहत। 5ईंयां प्रोहत ज़ुंण करा सह आसा सिधी नकल अर तेते छ़ैल्ली ज़ुंण स्वर्गै आसा। पर तिहअ निं आथी ज़ुंण स्वर्गै असली दी आसा। ज़िहअ मोसा ज़धू खिम्भ बणाईं लाअ त, तेऊ लै दैनी परमेशरै अह चतैनगी, “भाल़ै, ज़िहअ-ज़िहअ ताखा मंऐं धारा खोज़अ त, तेऊ ई साबै बणाऐं सोभै गल्ला।”#लुआ. 25:20
6पर म्हारै माहा प्रोहत ईशू मसीहा लै ज़ुंण प्रोहतो काम दैनअ सह काम आसा होरी प्रोहते कामां का खास्सअ महान। किल्हैकि सह ज़हा करारो खणोढी आसा सह आसा पराणीं करारा का राम्बल़ी अर तिंयां हआ राम्बल़ी च़िज़े बाहिदै आसरै किई दी।
नऊंईं करार
7किल्हैकि, ज़ै तिंयां पैहली करारा नर्दोश हंदी, तै निं दुजी करार करने ज़रुरत पल़णीं ती। 8पर परमेशर बोला तिन्नां लै दोश लाई करै,
“प्रभू बोला इहअ, ‘आजू एछणैं इहै धैल़ै कि मुंह करनीं इज़राईल अर यहूदा संघै नऊंईं करार।
9करार निं तेता ज़ेही हणीं
ज़ुंण मंऐं तिन्नें दादा-बाबा संघै तधू किई ती
ज़धू मंऐं तिंयां मिसर देशा का काढी आणै।
किल्हैकि तिंयां निं मेरी करारा लै शुचै-पाक्कै रहै
अर मंऐं डाही तिन्नां बाखा लै पिठ फरेऊई।’ प्रभू बोला इहअ ई।”
10तेखअ बोला प्रभू इहअ,
“ज़ुंण नऊंईं करार मुंह तिन्नां धैल़ै बाद
इज़राईली संघै करनी,
सह आसा एही कि मुंह पाणअ आपणअ बधान तिन्नें मन्नैं,
अर सह डाहणअ मुंह तिन्नें दिलै लिखी।
हुंह हणअ तिन्नों परमेशर अर तिंयां हणैं मेरी परज़ा।
11तेखअ निं तिन्नां साथी-संघी अर
भाई बंधा का खोज़णअ पल़णअ कि बिधातो अदर करा।
किल्हैकि तिन्नां सोभी का हणअ मेरअ थोघ
च़ाऐ तिंयां आम मणछ होए या
राज़ करनै आल़ै मशूर मणछ होए।
12मुंह करनै तिन्नें पाप माफ अर
तेखअ निं मुंह तिन्नें गलती आद डाहणीं।
13“नऊंईं करार” दैई किई प्रभू आप्पै पैहली करार पराणीं अर ज़ुंण च़ीज़ पराणीं अर खई आल़ी हआ, तेसो खतम हणअ आसा ज़रूरी।#जेर. 31:31-34
Seçili Olanlar:
इब्रानी 8: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.