O AMSAL 30
30
O Agur aidemo-demo
1Nënanga doka o demo-demo wahö heto-hetongo o Agur o Yake aingohaka o Masa mabereraino:
”Ngohi tokangela, ya Jou Madutu,
ngohi tokangale!
Koiwaka ahibuturungu!
2Ngohi tobodo hokä o aiwani,
koiwa ahimangarati.
3Komaiwa tomä dotoko o barija,
kama huhutulo de tohiorikua mangale ma Jou Madutu.
4O nyawa okia yauti döaka o horoga?
Mamoi iböto ünanga wahokotino o hidal̄oko aigiama magoronaka,
deʼ wahawoino o akere aibaju magoronaka,
ekola wohitatapu o dunia mabatingi-batingi?
Unanga o naguna, deʼ o naguna aingohaka?
Maraioka ngona nihiöriki!”
5Ma Jou Madutu watotomo Ai jaji moi-moi. Unanga hokä dadatoko mangale mata-mata yaino-ino imahohongo Unangino. 6Nako ngona nödogo okianaga Wahöheto-hetongo, done ünanga aha wonitaaere deʼ wohi nyata igoungu ngona noelu-eluku.
Muruono nagaohi yososawaro manga ngaje-ngaje
7”Ya Jou Madutu, ihira detohonenge ngohi togahoko nohihidöaka, ngohino o hali hinoto nënanga. 8Uha hiädono ngohi tohidemo o rusi deʼ o tengeluku mademo-demo, deʼ uha nohigumal̄a ngohi tomihikini ekola tokaya. Nohihidöaka ngohino duga-duga okianaga topöparalu. 9Hababu, nako ngohi tokaya, yakunu ngohi aha totemo ngohi tonïparalua Ngona. Deʼ nako ngohi tomihikini ngohi aha totohiki hiädono tapeseke Ani romanga.”
10Uha wïfitana womatengo o gilaongo ai tuangika,
done ngona inihilolai deʼ yanako nahowono.
11Naga o nyawa yahilolai manga ama
deʼ yäetongikaua manga ayo.
12Naga o nyawa wanako aidiri itebini
enahioko ünanga duru wopeseke.
13Naga o nyawa womamao ai diri duru yaoa –
o goguleua yaoa!
14Naga o nyawa imälingiri manga ngol̄omo de manga ngokere madodagi koiwa mahayanga;
önanga kayätoha-tohatika deʼ yähokoto o mihikini manyawa deʼ o nyawa yobole-bole.
15O awunu wohïhihihi aingohaka yähinoto;
yahinotö manga romanga ”Mangale Tongohi!”
Naga o hali iata komaiwa yakihounu:
16o nyawa yohone-honenge manga dunia,
o ngoheka komaiwa mongohaka,
o tonaka madüdudungu yokiriti madudungu o awana,
deʼ o uku ial̄e-al̄eme okiaika honanga.
17O nyawa yahohedu manga ama ekola manga ayo yapoperekioka, i patutu yahikaweli maporetika hupaya manga lako o totaleo o wogono yatudili deʼ manga mayeti yaol̄omo o totaleo o rajawali.
18Naga o hali iata duru ihuha ngohino la tomangarati:
19o totaleo o rajawali ihöhoho o gitawaka,
o dodiha imatahe-tahe o helewo o nuha mal̄okuino,
o kapa ihö hide-hidete o ngöto mahidogoronaka,
deʼ o goduru deo moholehe o habimoi magogiria imä mane.
20Nënanga doka ami akali o ngoheka momatengo mososatiaua amirokatika: Mohowono de iböto, münanga mol̄omo dema ehe ami uru, de ipaha motemo, ”Ngohi okia-kiaua todiai!”
21Naga o hali iata ihuha yatarima o dunia yamode-modekika:
22o gilaongo womatengo wodadi o koano,
o bodo manyawa womatengo wamake hagala wonönahihu.
23O ngoheka momatengo mohasili mokawingi enahioko münanga o nyawa imï igoua,
momatengo o gilaongo maora ngomi nyonya amingï.
24O duniaka nënanga naga o rupa iata o aiwani ma alu-aluhu ma duru isawaro, enagënanga:
25O ngango, o aiwani ikua-kuatua, mä yasadia mainomo o ngogoro maörahoka.
26O pelanduk, o aiwani ibö bole-bole, mä imädiai matau o doporono helewoka.
27O kahoho, o aiwani koiwa ma koano, mä ituono imatatoro ihidodiai.
28O sosipohuku, o aiwani yakunu hatagoko de nanga giama, mä yamake ma koano ai kadatoka.
29Naga o hali iata nanga hininga yadaene nako hatötailako madodagi imädagi, enagënanga:
30O singa o aiwani ikökua-kuata hagala o aiwani mahidogoronaka deʼ okia dika makoyömodongua;
31o kabingi manauru,
o kuru-kuru manauru imädagi imatotail̄e,
deʼ ma koano aikawaha manga himangoka.
32Nako karana anibodo ngona de ani edenge nödatoro o perekara-perekara madorou, nomahidodiai! 33Hababu, nako ngona nosapuru nohiruae o huhu namake mahasili o mentega. Nako ngona nagohara o nyawa manga ngunungu, ihupu o awunu. Nako ngona napuda o gangamo, ngona nosapuru o ributu magoronaka.
