O AMSAL 29
29
1O naguna kahokogenangika woluku wamoteke nako iwinasihati,
o öraha mamoiuku aha wobinaha deʼ yakunokaua iwihitiaioli.
2Nako o nyawa yoadi-adili yopareta, o kawaha yomorene.
Mä nako o nyawa madorou yokuaha, o kawaha yamao yohangihara.
3O naguna wöigo o barijaika, wasanangi aiama aihininga.
O naguna wädodiawo manga röehe yahöhuku-hukunu aha wohigogule aitiwi.
4Nako wokokuaha wöhininga wohidodiai o adili, aiberera ibitumu.
Mä nako ünanga wohi amoko o tiwi, aiberera aha ikilianga.
5O naguna wägora-goraka aidodiawo o nyawa,
o modoi wohiakana mangale aidiri.
6O nyawa madorou iwililiko ai baradoha,
o nyawa aihininga iriko-rikoto wamao wosanangi deʼ woutumu.
7O nyawa maoa ihioriki o nyawa yobole-bole manga haku,
mä o nyawa madorou yomangaratiua.
8O nyawa yöigo-igo yohohedu yakunu yaburakati o kota,
mä o nyawa yobobarija yarïdi okianaga idadadi.
9Nako o nyawa wobobarija deʼ o nyawa bodo imaperekara,
o nyawa bodo gënanga duga-duga wongamo wakaika wakaino dewoiete hiadono ipuda o gigoro.
10O nyawa yaoke-okere o awunu yadohata o nyawa manga hininga itebi-tebinika,
mä o nyawa maoa yägoana.
11O nyawa bodo yongamo ihi totararonuku
mä o nyawa yobobarija yosabari deʼ yatumungu manga gangamo.
12Nako wokokuaha wöhohininga o tengeluku ma abari,
ai pegawe aha idadi yatorou mata-mata.
13O mihikini manyawa womatengo deʼ witö tuku-tuku kaimatero;
yahinoto ma Jou wahidöaka o lako la yamake o ngango macahaya.
14Nako ma koano wöriwo o nyawa yobole-bole manga haku,
dema tao-taongo aha ünanga wopareta.
15O dodotoko mahasili deʼ o hidaaere yahidadi o nyawa yobarija.
O ngohaka salalu yödomoteke aimau aha womihimal̄eke ngoi ayo.
16Nako o nyawa madorou yokuaha, o dodilakuru idogo-dogo.
Mä o nyawa manga hininga iriko-rikoto aha yakunu yamake o nyawa madorou manga bodito.
17Nïdotoko aningohaka,
done ünanga wohidöaka o hininga marïdi ngonaika,
deʼ idadi o lolaru ngonaika.
18O hoana deo berera yamö make-makeua o tutuda ma Jouino
idadi o hoana deo berera iomanga deo huru-hara.
Youtumu o nyawa
ihi ngou-ngounu ma Jou Aititaika.
19O gilaongo womatengo yakunua iwïdotoko duga-duga deo demo-demo.
Unanga womangarati, mä aha kowö hiningaua.
20Iholoi iwöe o nganono o nyawa yofuma-fumaika,
Ngaroka deo nyawa yotemo-temo de yapikirua ihira.
21O gilaongo iwihi mote-moteke kawoma gö ikahi,
mabaha aha idadi itogowini aihäeke.
22O nyawa itötai-taiti yongamo
yadiai manga ngöe o nyawa imateke ributu deʼ yobaradoha.
23O nyawa manga hininga ikökurutil̄e aha yahitipokouku;
o nyawa manga hininga itotipokouku aha yahigiriri.
24O nyawa imateke rimoi yokarajanga de yotohi-tohiki,
mamangarati yodohata manga dirimahirete.
Nako ünanga wohi totararonuku o juruhakimoka,
ünanga aha iwïgelenga o hukumanga.
Mä nako ünanga woma rirïdoka dika,
ünanga aha iwikorona ma Jou Madutu Ailolai.
25Nömodongo o nyawa manga damake mabahaika o huha.
Nïngaku ma Jouika, done ngona aha nosanangi.
26Manga ngöe o nyawa yöigo o higiriri imälingiri yokokuahaika,
mä wohidoa-döaka o adili, duga-duga ma Jouika.
27O nyawa maoa yosanangiua de o nyawa madorou;
o nyawa madorou yädohata o nyawa maoaika.
