O AMSAL 31
31
O nasihati mangale ma koano
1Nënangadoka o demo-demo mahö heto-hetongo o Lemuel ngoi ayo, amingohakika o Masa ma koano,
2”Ahingohaka ahi gate mabelaka, tonihi ngohaka hokä ahininiata mabobaluhu. Okia aha tahetongo ngonaika? 3Kokiani uha nohigogule anibuturungu ekola nohibarihi anikuata o ngohekaika. O koano manga ngöeoka yobodito karana o ngoheka. 4Kokiani nöhohininga, Lemuel! Nokere o angguru deʼ namal̄aokaua o daluku ibiha-biha, ipatutua mangale yokokuaha. 5Hababu, nako ma koano wokere o daluku ibiha-biha, ünanga wawohanga o tita deʼ kowölegaikaua o nyawa yobole-bole manga haku. 6O daluku ibiha-biha ganga mangale önanga yopopanyake deʼ manga hininga ihühuha. 7Onanga yokere la yawohanga toönanga manga mihikini deʼ manga huha.
8Kokiani näriwo önanga yaku-yakunua yöriwo manga diri mahirete. Nöriwo mata-mata o nyawa imagaku-gakunua manga haku, deʼ nodadi o hakimi iadi-adili. Nögoana o nyawa mihikini deʼ o nyawa yätuku-tuku manga haku. 9Niariwo niagou-goungu mangale önanga, deʼ nidadi o hakimi yoadi-adili. Niöriwo o mihikini manyawa manga haku deʼ o nyawa yätuku-tuku.”
O hekata yososawaro
10O hekata mososawaro ihuha hamake;
münanga amiragane iholoi ngaro deo intan deo folori.
11Ami rokata aha okia-kiaua wokuranga,
karana womingaku munangika.
12Münanga komaiwa modiai o dorou amirokatika;
amiumuru magurutu münanga modiai o oa unangika.
13Münanga imimagawe motoomu o dewili deo duba magögo
daha motasibu mokarajanga mouriti.
14Magögurutino münanga moao o inomo,
hokä yadodiai hagala o kapa imahuku-hukunu.
15O ngoru-ngorumino kamahohuhutuohi münanga momomiki masadia amitau madol̄a manga inomo,
deʼ mangale mahikodoku o manarama imïlo leleani ika.
16Münanga molingiri o tonaka oloa moi, daha maija;
ami lilingiri matiwiino münanga mohidailako o angguru madumule o gahumu moi.
17Münanga masadia amidiri
la mokarajanga hokokia amikuata de amibuturungu.
18Münanga mohioriki hagala moi-moi madodiai, imihi utumu;
münanga mokarajanga hiädono hutu madekanuku.
19O lawe mohirugihi
deʼ o ngöere mouriti.
20Münanga mödurüa o nyawa yokura-kurangika;
münanga amihininga yaoa o nyawaika yopöparalu o roriwo.
21Münanga mohawaterua nako o dumamata maöraha iboa,
karana amitau madol̄a manga alo mabaju masadiaka.
22Münanga mahirete modiai amitikara;
amipakeanga o ngöere o lenan maungu mahöhailoa.
23Ami rokata ganga o nyawa iwihöheto-hetongo
o nyawa moi o kota matutuda manga hidogoronaka.
24Münanga modiai o pakeanga deʼ o gorona maninikutu,
daha mahukunu imahuku-hukunika.
25Münanga mokumati deʼ imihoromati;
deʼ mohawaterua mangale o wange maduruino.
26Demabole dei aluhu münanga motemo-temo
amidemo-demo mobarija.
27Münanga salalu imimagawe mokarajanga
deʼ möhininga mohidodiai amitau madol̄a mahidailako.
28Münanga amingoha-ngohaka imihoromati,
deʼ amirokata womihigiriri.
29”Naga manga ngöe o ngoheka maoa,” amirokata wato,
”mä ngona iholoi yaoa ngaro de önanga mata-mata.”
30O rupa ihöhailoa yakunua hangaku, deʼ o rahai aha i hihanga;
mä o ngoheka mohi ngou-ngounu ma Jouika ipatutu mamake o higiriri.
31Nabalahi hagala ami oa-oa;
münanga o ngoheka ipatu-patutu imihoromati kiaka de kiaka dika. 1
