O AMSAL 28
28
1O nyawa madorou yopiringana moiua yaginïki,
mä o nyawa manga hininga iriko-rikoto, yobarani hokä o singa.
2Nako o hoana deo berera yobaradoha, yokokuaha imateke totagali;
nako o tutuda wobarija, o hoana deo berera aha yotongohono deʼ kahirahi youtumu.
3Yokokuaha yatuku-tuku o mihikini manyawa
hokä o awana mariki-rikimi yabodito yautu-utukino.
4O naguna wahaduliua o tita, wahiriwo o nyawa madorou;
o naguna wohingounu o tita wälawani o nyawa manga kalakuanga itotorou.
5O adili yomangaratiua o nyawa yososatiaua,
mä o nyawa iwihuba-huba ma Jou, igou-goungu yomangarati.
6Iholoi yaoa o mihikini manyawa manga hininga itebi-tebini
ngaro deo nyawa kaya yorörusi-rusi.
7O goduru wohingou-ngounu o tita ganga o nyawa yobobarija.
Mä o nyawa yododiawo de o nyawa ihigogogule manga arata wihimal̄eke aiama.
8O naguna wodadi wokaya wo l̄ë o tiwimabunga deʼ wotoomu o utumu duru wawöe-wöe,
aikaya aha yäditifa o nyawaika de manga dora de manga haya-hayangoka o mihikini manyawaika.
9Nako ngona nohingounua ma Jou Madutu Aitita,
ma Jou Madutu ma aha waemono anininiatika.
10O naguna wïbaja o nyawa aihininga iriko-rikoto hupaya wodiai o dorou,
ünanga mahirete iwiotaka o dadagoko magoronauku.
O nyawa aihininga madebi-debini aha iwihibarakati hiädono woutumu.
11O nyawa kaya salalu wamao aidiri wobarija,
mä o nyawa mihikini aihininga yaoa-oa wohiöriki demadiai ünanga o naguna.
12Nako o nyawa maoa wokuaha, mata-mata o nyawa yosanangi,
nako o nyawa madorou wopareta o kawaha imangiunu.
13O naguna wagogono ai baradoha aka kowoutumua.
O naguna womangaku deʼ waumo aha ma Jou wïdora.
14Nihoromati ma Jou salalu, done ngona aha noutumu.
Nako ngona nïlawani Unanga ngona namake o bodito.
15O nyawa madorou yäkokuaha o nyawa yokö kura-kuranga,
hokä o singa ipoaka ekola o beruang yaino yägoli.
16Wokokuaha wätuku-tuku o nyawa mahomoa, koiwa aiakali maoa;
wokokuaha wödoha-dohata o rusi aha wopareta dema tao-taongo.
17Womatengo wotoma-toma aha wamao iwiginïki kahokogenangika hiädono aiajali;
kaimatengo mayakunua ünanga iwitumungu.
18O nyawa yowö wango-wango koiwa mahowono aha yohalamati.
O nyawa itiko-tiko manga ngango, aha yäotaka.
19Wototumule wokarajanga ihauku aha ai inomo iwiwedono;
o nyawa yaumo-umo o oraha aha yahikuranga.
20O nyawa manga hininga iröriko-rikoto aha ma Jou wahibarakati,
mä o nyawa yonahihu itaiti yokaya yo otanua deo hukumanga.
21Itorou hoiriki dehotingaka o nyawa;
mä nagaö o hakimi yomau
yoadilua duga-duga mangale yamake o tiwi mahuhutulua.
22O nyawa wokokalilu wönahihu itaiti wokaya;
ünanga kowamaoua igoungu o mihikini itaiti yatapal̄u aidiri.
23O nyawa wohidoa-doaka o hidaaere mabaha iholoi iwihoromati
ngaro de o nyawa wöigo wahigogiriri.
24O naguna wädohiki aidimono deʼ watobote gënanga o baradohaua,
kaimaketero deyo tohi-tohiki mahomoa.
25Hohikauku nanga diri mahirete yapuda o ributu;
ngona iholoi noutumu nako nongaku ma Jouika.
26O naguna wangaku aidamake mahirete, aiakali madumuloa koiwa.
O naguna wanïki o nyawa yobobarija aidodotoko aha wohalamati.
27O nagona yahidöaka o mihikini manyawaika aha koyo kura-kurangua.
O nagona manga lako yatamunu o mihikini manyawaika okianaga yopöparalu, aha yädaene o lolai.
28Nako o nyawa madorou yokuaha,
o kawaha imangiunu;
nako o nyawa madorou yobinaha,
o adili manyawa aha watuda de aihininga mahuka.
