O AMSAL 27
27
1 #
Yak. 4:13-16
Uha noma edenge notemo-temo mangale yarehe mawange,
karana ngona nohiorikua okianaga dahao aha idadi.
2Uha nohigiriri ani diri mahirete;
mal̄aikala o nyawa mahomoa yadiai o hali gënanga, maboboloi o nyawa nänako-nakoua.
3O helewo deʼ o dowongi gënanga kaiuwinohi
nako hohitero deo hininga mahiri yadodiai o nyawa bodo.
4O gangamo gënanga koiwa mahayangi deʼ yakilianga,
mä hohimanga o hininga mahiri o nagona yataana?
5I holoi yaoa o hidaaere ihi totararonika
ngaro deo dora yaiu-iunu.
6O dodiawo wogohara deo hayangi,
mä o haturu wokololo deo biha.
7Nako inapunuhuku, o madu mahaoluku;
nako inähahini, mamali-mali mahamao ihemoro.
8O nyawa wamal̄a-mal̄aika aitau,
hokä o totaleo yamal̄aika maigutu.
9Hokä sarakia o minya mabounu ihemo-hemoro deʼ iböbou-bounu yasanangi o hininga,
hoko genangö o dodiawo manga oa o jiwa yatumuloa.
10Uha nïwohanga anidodiawo ekola ani ama aidodiawo.
O huha magoronaka uha nogahoko aniriadodoto manga bobatumu;
nima kokukere itigi-tigino iholoi yobaraguna ngaro de aniriadodoto manga gögurutika.
11Ahingohaka, kokiani ngona nosawaro,
hupaya ngohi tosanangi deʼ yakunu tohaluhu nako ihihohedu.
12O nyawa yososawaro imahirehene nako yamake o bodito;
o nyawa bodo wotagi wogila-gila deo bodito iwibanga.
13O naguna womau watagongo o nyawa mahomoa manga nagimi,
i patutu yal̄ë to ünanga ai kianaga hokä aijaji madodanu.
14O naguna o ngoru-ngorumino de wïhoromati aidodiawo de aiilingi makuatil̄e,
yapulono hokä wohi demo o lolai.
15O hekata möigo-igo o ributu
hokä o awana mailingi o wange moi yatuhutu.
16Idadiua münanga imihuloko momarïdi,
hokä o hidal̄oko yakunua hatumungu
deʼ o igono magohaka yakunua hahokoto.
17Hokä sarakia o waja hohigihoro o waja
hoko genangoli o nyawa imadotoko o nyawaika.
18O naguna wapaliara o gota mautu, aha waol̄omo mahohoko.
Wolöleleani aha iwihoromati nako wïhayangi aituanga.
19Hokä sarakia o akeroka ihidumutu ani rupa,
hoko genangoli ani hininga ihidumutu anidiri.
20O nyawa hohone-honenge maduniaka, salalu naga o ngï;
hoko genangoli o nyawa nanga nahihu koiwa mabatingi.
21O haaka deʼ o gurasi yauji o uku mangï magoronaka;
iwinako o nyawa imoteke aijojobo o higiriri mahimangoka.
22O nyawa bodo ngaroko iwigohara genangö makuata,
ma aha koihihangua aibodo.
23Napaliara aniaiwani o gigini nohidodiai, 24karana o kaya aha koikakaliua, maboboloi o kuaha mangale yopareta ma aha hirahi kahiado-adonikaua. 25O momo o dumuleoka deʼ o l̄okuoka yapoporo deʼ yatoomu mangale aniaiwani o gigini gënanga, mä itai-taitino gënanga iwango o momo mahungi. 26Hagala aniduba-duba magogo ngona namake o pakeanga, deʼ o hidoku moi hagala anikabingi mabubukunu maijaino ngona yakunu noija o tonaka mahungi. 27Hagala anikabingi mahomoaino ngona namake o huhu mangale anidiri deʼ anitau manyawa inoli hagala inïloleleani.
