O AMSAL 24
24
–19–
1Uha anihininga isanangiua o nyawa madorouika, deʼ uha nönahihu nimateke dodiawo dede önanga. 2Onanga duga-duga yapikiri itotorou deʼ duga-duga ihiade-ade okianaga yahibobodito.
–20–
3O giahekata manga tau ihigoko deo barija deʼ o mangarati. 4Deʼ nako naga o ganako, done makamari aha ihidol̄a deo bara-baranga dema roraganeoka deʼ ihöhailoa.
–21–
5O nyawa yobobarija iholoi yokumati ngaro de o nyawa yokua-kuata; o ganako iholoi iparalu ngaro deo röehe makuata. 6Karana o parangi uwahi kokiani naga ihira o hidailako madatoro ioha-ohakoka, deʼ iholoi iwöe yononasihati, iholoi i lamoko madodagi aha youtumu.
–22–
7O bodo manyawa wakunua wodumunu o barija. Unanga okia-kiaua yakunu wotemo nako o nyawa magogiriaka ihiade-ade o hali-hali ipöparalu.
–23–
8O nyawa salalu wohidailako watatoro o dorou, aha iwihetongo wororuae. 9Moi-moi o nyawa bodo manga akali ganga o baradoha. O nyawa salalu yähohedu o nyawa mahomoa, o nagona dika mayä sanangiua.
–24–
10Nako ngona aninganono itoaka o huha magoronaka, ganga ngona o nyawa yobole-bole.
–25–
11Uha notaka-taka nahibebasi o nyawa iwigelengaka o hukumanga iwihohonenge; nahihalamati o nyawa magogiriaka iwi ngotaka o hukumanga iwinune iwihohonenge mangïika. 12Kayakunu dika ngona notemo, ”Genanga ngohiua ahihidailako.” Mä ma Jou Madutu kawoni tötailako ngona. Unanga wohiöriki deʼ ani dibanga wögelenga o adili. Unanga wabalahi o nyawaika imoteke ai manarama.
–26–
13Ahingohaka, kokiani nol̄omo o madu, hababu gënanga yaoa. Hokä sarakia o madu o ohungu maigutino, imutiti mangale haol̄omo, 14hoko genangoli o barija yaoa mangale ani jiwa. Nako ngona nobarija, itararono anihimangika.
–27–
15Uha hokä o nyawa madorou imateke fakati iwiora demapakisa o nyawa aihininga iriko-rikoto deʼ yaora ai tau. 16Hababu ngaroka o nyawa aihininga iriko-rikoto woruba wohigali-gali, salalu ünanga aha kawomomikoli. Mä i idulu yaino, o nyawa madorou aha yowede-wederuku mangale o bodito.
–28–
17Uha nosanangi nako anihaturu yobodito, deʼ uha nomorene nako ünanga iwiotaka. 18Hababu, maraioka ma Jou aha wamake animanarama gënanga deʼ wapulono itorou, dewähukumokaua anihaturu gënanga.
–29–
19Uha namao initohata ekola nosanangiua o nyawa madorouika. 20O nyawa madorou koiwa o öraha manga himangika deʼ koiwa manga ngonganono.
–30–
21Ahingohaka nïmodongo ma Jouika, deʼ nïhoromati ma koano. Uha nomahi mote-moteke de o nyawa yälawa-lawani önanga. 22O nyawa marupa hokogënanga yakunu yohihanga o lako dadawiua, karana o bodito wädupuda ma Jou Madutu ekola ma koano o perekara mahohumujurua.
Muruono nagali yososawaro manga ngaje-ngaje
23O nyawa yososawaro yotemoka hoko nënanga:
O hakimi yakunua wotubuho mahonongauku. 24Nako o nyawa yahowonowahi nyata yahowonua, done o hakimi gënanga aha iwilolai deʼ iwidoa-doana o nyawa mata-mata. 25Mä o hakimi wähukumu o nyawa yahowo-howono aha wosanangi deʼ iwihoromati.
26Ai bobaluhu duru wakokorona ganga manonako imakohobata madutu.
27Uha nadiai o giahekata nako anidumule noma diaiowahi deʼ koiwahi anililingiri.
28Uha nodadi o nyawa mahomoa manga hakihi nako matiti madiai koiwa; uhaoli noeluku iwikorona unangika. 29Uha notemo, ”Ngohi aha tabalahi unangika okianaga wadodiaioka ngohino!”
30Mamoi iböto ngohi takaino o nyawa iwitotebeturu wobodo-bodo aiinomo madumule deʼ aiangguru madumuleino. 31Tamake genangoka duga-duga o dadatomo mahohihika deʼ o nguhumu. Mapagari o mehele mairubaka. 32Tatötailakoka detatibanga taluku-lukuku o hali gënanga, tamake o dodotoko nënanga: 33#Ams. 6:10-11 Deo gioko deʼ o ngidu hokokiaua madekana, de yogogeruku imälugoino deʼ imahibatongo ihijai-jai, 34o kuranga deʼ o mihikini iboa itodokanino hokä yoora-ora de manga daeoka.
