O AMSAL 25
25
1De ipaha nënanganaga muruono naga o Salomo wososawaro aingaje-ngaje mahomoa yatötuli-tulihi yopopegawe o Hizkia, o Yehuda manga koano aikadatoka.
2Ma Jou Madutu iwihimulia karana okianaga Warörahasia;
ma koano iwihoromati karana okianaga waku-akunu wohitararono.
3Hokä o ngöto malago-agomo ilöluku-luku deʼ o dihanga magögurutil̄e,
hokogenangoli ma koano aidibanga hakunua hödumunu.
4Kokiani yatebini ihira o haaka mapeseke,
dahao ihöhailoa yakunu yadiai yogögao-gao manga giama.
5O kadatoino yononasihati madorou niatingaka niakökurutika,
dahao o popareta ibitumu mangale o adili.
6 #
Luk. 14:8-10
Nako nïhimanga ma koano kokiani ani hininga itipokouku,
uha nomaedenge hokä o nyawa manga pangkati magögurutil̄e.
7Inihuloko nahidöaka aningï manga pangkati ihoholoika
Iholoi yaoa inihuloko nodoa o ngï ihoholoil̄e mahoromati.
8Uha nomataiti nao aniperekara o juruhaikimika;
hababu, nako ipahaika ngona
igoungu nahowono okiali ngona nakunu nadiai?
9O mangarati nimahowono de anidodiawo, niatiai duga-duga dede ünanga,
mä o nyawa mahomoa manga rahasia uha nohi ade-ade.
10Hababu, done ngona ininonako hokä o nyawa manga uru ipida-pidaha
deʼ ani romanga ipeseke ho ani ngango maumuru.
11O gamake ihi höhupu-hupu maöraha duru yakokorona
hokä o hohoko o gurasi o dodai o haaka magoronaka.
12O nyawa yososawaro manga hidaaere o nyawa yomau yoihe-ihenika,
hokä o ali-ali o gurasi ekola ihipoporomu o gurasi.
13O huhuloko wososatia, yadiai wihö hulo-huloko wosanangi,
hokä o akere mamata mangale woutu-utuku ai dumuleoka.
14Hagala o jaji ihi nyata-nyataua,
hokä o lobi deʼ o hidal̄oko koiwa-iwa ma awana.
15O sabari ihidomoteke o demo-demo
yaböbole-bole o nyawa yokokuaha yakunu ihi goungu,
deʼ yawedere mata-mata o manarama ilawa-lawani.
16Uha nol̄omo o madu na amo-amoko;
done idadi yatoka nowunanga.
17Uha kalioli naika-ika nima kokadateke aitauika
done ünanga wonïgihounu deʼ wonï dohata.
18O galaki ielu-eluku yakunu yähohonenge,
hokä o oworo, o boboha ekola o toimi madoto idödoto-doto.
19Nïngaku wososatiaua o huha maorahoka
ganga hokä niatedama de ani ingiri igiwi-giwioka
ekola nomädagi de ani l̄ou isuga-suga.
20Honyanyi mangale o nyawa yoduka-duka
hokä homahekonoka o dumamata magoronaka
hokä o suka hohituagi manga naboika.
21 #
Rm. 12:20
Nako ani haturu iwihahini, nihidöaka o inomo wol̄omo;
deʼ nako ünanga aikiriti madudungu, nihidöaka ünanga o akere wokere.
22De hoko gënanga ngona nodiai ünanga iwimal̄eke
deʼ ma Jou aha wonihibarakati.
23O koremie maraioka iao o awana;
hoko genangoli o nyawa kahiade-ade madorou maraioka yapuda o gangamo.
24Hogogere o lotenge malibukuoka iholoi hosanangi
ngaro de hogogere o tau moi de o hekata moigo-igo o ributu.
25Hodahongo o abari ma oa-oa o berera magögurutino
hokä haokere o akere mamata maöraha nanga kiriti madüdudungoka.
26O nyawa maoa imahimoteke o nyawa yososatiaikaua
hokä o akere malako igawa-gawa ekola hokä o humu ipese-peseke.
27Itorou nol̄omo o madu iholoi,
hoko genangö itorou hahetongo o higiriri iwöe.
28O nyawa yaku-akunua yakuaha manga diri
hokä o kota irubaka mabebeno o mehele yatö tumu-tumungu.
