O AMSAL 23
23
–6–
1Nako ngona nogogeruku nol̄omo deo nyawa womatengo yolago-agomo, kokiani nomähininga ünanga o naguna. 2Nako ngona de aninahihu nol̄omo ilamoko, natumungu aninahihu gënanga. 3Uha nohorodo o inomo ihöhemo-hemoro ihidodiaiuku, mudukua ünanga womau wonï budi ngona.
–7–
4Uha nomahuha de nomakangela mangale idadi nokaya. Kokiani namal̄a anidungutu gënanga. 5Hababu o lakodadawi dika aniarata yakunu ihihanga, ënanga hokä demagahuhuoka deʼ ihoho o gitawail̄e hokä o totaleo o rajawali.
–8–
6Uha nol̄omo deo nyawa yototalaa. Uhali nönahihu aiinomo mahemo-hemoro. 7Hababu, ünanga aha wonitemo, ”Naino hol̄omo; ika tanu nomä dogoli,” enahioko aidungutu hoko genangua. Unanga aiuru dema mutiti, mä aihininga haramoioli. 8Done okianaga nalahi-lahiroka ngona nohingunangoli, deʼ mata-mata anidemo imuti-mutiti unangika koiwa mafaida.
–9–
9Uha nänasihati o nyawa bodo; ünanga aha wölegaikaua aninasihati gënanga.
–10–
10Uha hakali-kali naheloro o tonaka o puhaka mabatingi ekola nal̄ë o ngohaka o gohihi manga tonaka. 11Hababu, ma Jou ganga manga roriwo wokua-kuata Unanga dika aha wäriwo wonilawani ngona.
–11–
12Nöhininga nohidodiai aniguru aidodotoko deʼ nomädotoko duru nawöe-wöe.
–12–
13Uha nodododato nïdotoko aningohaka. Nako ngona nïgohara ünanga deo gogohara, ünanga aha kowohonengua, 14aha iholoi wohalamati.
–13–
15Ahingohaka, ngohi duru tosanangi nako ngona nobarija. 16Ngohi ahihininga ilamoko nako toihene nohi demo o demo-demo duru yakokorona.
–14–
17Uha ani hininga isanangiua o nyawa baradohaika. 18Nihingounu salalu ma Jou Madutuika hupaya anihimangika namake yaoa, deʼ ani ngonganono koihihangua.
–15–
19Noihene, ahingohaka! Kokiani idadi nobarija. Natailako nagou-goungu aniwowango madodagi. 20Kokiani uha nododiawo deo nyawa yädalu-daluku ekola o nyawa yokokal̄il̄u, 21hababu önanga aha idadi yomihikini. Nako ngona kanomä idu-idu dika, done itedekanokaua ngona aha nomahi pakeanga makäkakihi.
–16–
22Nihingounu aniama; hababu, nako unangua ngona koiniwa. Nako ngoni ayo imiperekioka, kokiani nohidumutu ngona nomihoromati münanga.
23O dodotoko madiai, o barija, o dodotoko mahasili, deʼ o mangarati – mata-mata gënanga ipatutu haija, mä duru demaraganeoka holi mangale hahukunu.
24O ama womatengo aha womorene, nako aingohaka de aikalakuanga maoa-oa; ünanga aha aihininga ilamoko nako aingohaka wobarija.
25Tanu aniama de ngoni ayo manga hininga ihi amoko ngonaika; tanu mosanangi o ngoheka moni hingoha-ngohaka ngona.
–17–
26Natailako nohidodiai deʼ nomäduru ahiwowango, ahingohaka! 27O ngoheka yonaka-nakali manga röehe yahuku-hukunu ganga o dadagoko dema bö boditoka. 28Onanga inïdamaoka hokä yoora-ora deʼ yadiai manga ngöe o nau-nauru yohowono.
–18–
29-30Ngona nohiöriki okianaga idädadi o nyawaika yoke-okere o angguru ilamokoholi, deʼ haramangöe yatai-taili o daluku ibiha-biha? O nyawa geünanga wohangihara deʼ wamao mahuha. Unanga salalu imateke ributu deʼ wotaiana wohuha. Ai lako itokara deʼ ai röehe yal̄abo-l̄abo, enahioko mata-mata gënanga wakunu wahohihanga. 31Uha nohigumal̄a o angguru inibobaja, ngaroko maangguru mamodokara anihininga yadaene deʼ napulono ileletongo o galahi magoronaka de namao majame iwohama aningomahuku. 32Yarehe mangorumino ngona namao hokä ini golioka o dodiha ibiha-biha. 33Ani lako hokä o murumu ipohuku, anidibanga iburakiti deʼ aniuru ihoreto. 34Ngona namao hokä naga o kapa maliaro matubuoka o ngöto mahidogoronaka; anihäeke iloliti deʼ ngona kano lebo-leboto. 35De ngona aha notemo, ”Marupahi ngohi ihigohara deʼ ihipoka o nyawa, mä ngohi takunua tomä hininga okianaga idädadioka. Uwee, ngohi duru ihikioko! Ngohi iparalu tokeroli!”
