O AMSAL 22
22
1O romanga maoa iholoi maragane ngaro deo arata mangöe-ngöe;
o nyawa inädora iholoi yaoa ngaro de inähidöaka o gurasi deo haaka.
2O nyawa kaya deʼ o nyawa mihikini manga hali moi imaketero;
ma Jou dika wahidadi önanga mata-mata.
3O nyawa wobobarija nako wölega-lega o bodito womahirehene;
o nyawa bodo wotagi gila-gila daha iwitapal̄u o bodito.
4O nyawa wïmodo-modongo ma Jouika deʼ wohitipokouku aidiri,
aha woutumu, okia-kiaua wokuranga deʼ iwihoromati.
5O dadagoko deʼ o modoi yamake o nyawa yorusi-rusi manga ngekomoka;
nomahitingaka nakökurutika mata-mata gënanga nako ngona nöigo nohalamati.
6Nïdotoko aningohaka womatengo o wowango ipatu-patutu madodagi mangale ünanga,
done hiädono iwipereki ünanga wowango hoko gënanga.
7O kaya manyawa yäkuaha o mihikini manyawa;
o nyawa yahiböbau-bau yäkuaha o nyawa yoböbau-bau.
8O nyawa yodödato-datomo o rusi aha yautuku o bodito;
mabaha ai kuaha mangale okianaga wodiai ai hininga mahuka aha ihihanga.
9O nyawa yaoa-oa ai hininga ma Jou wihibarakati,
karana ünanga wohikodoku o rijiki deo nyawa yokura-kuranga.
10Nia duhu o nyawa yöigo-igo yahikauku,
done o ributu, o haturu deʼ imateke hohohedu imatogumu.
11O nyawa wöigo-igo ai hininga itebini deʼ ai demo imutiti,
aha wodadi ma koano ai hobata.
12O nyawa yorusi-rusi manga tengeluku yakilianga,
ma Jou wögoana hupaya o ganako madiai kahirahi yapaliara.
13Wototebeturu wöigo wogögogere o tauoka;
ünanga wotemo, ”Naga o singa maporetoka, ngohi yakunu ihigoli o ngekomo mahidogoronaka.”
14O ngoheka manga röehe yahuku-hukunu manga bobaja marupa o modoi;
o nyawa ma Jou wängamo-ngamo yohodoa magogoronauku.
15Hoko gënanga iböto o ngoha-ngohaka yadiai hagala o hali ibodo-bodo,
mä o gogohara yakunu önanga yädotoko yangali manga kalakuanga.
16O naguna womau wodadi kaya
de wätuku o mihikini manyawa de wahidöaka o ngongike o nyawa dema ena-enangika mabaha aha wohangihara dewo mihikini.
Yamoruange o nyawa yososawaro manga ngaje-ngaje
17Noihene ngohi aha tonïdotoko ngonaika o nyawa yososawaro manga nasihati. Nöhininga nohidodiai ahidodotoko. 18Ngona aha nosanangi nako ahidodotoko gënanga nagogono anihininga magoronaka. Karana de hoko gënanga ngona nomahidiainoka nako ngona nomau napake. 19Ngohi tonihidotoko ngonaika örahanënanga karana ngohi töigo ngona de aningongakuoka ma Jouika. 20Yamoruange o nyawa yososawaro manga ngaje-ngaje tatulihoka mangale ngona – yososawaro manga ngaje-ngaje gënanga naga demaganako deʼ o nasihati maoa-oa; 21deʼ aha inïdotoko ngonaika okianaga igou-goungu itiai. Dahaö, nako ngona inileha, ngona yakunu nohidöaka o bobaluhu yakokorona.
–1–
22Uha nihirugi o mihikini manyawa, duga-duga karana ünanga wobole; deʼ o juruhakimoka uha naora o nyawa okia-kiaua wakunu ai haku. 23Hababu, ma Jou wöriwo toönanga manga perekara deʼ wal̄ë o nyawa yätuku-tuku önanga manga jiwa.
–2–
24Uha nïdodiawo o nyawa wöigo-igo wongamo deʼ itaiti ai awunu idoa. 25Done ngona aha nïduru ünanga, deʼ yakunokaua nahohihanga o biaha gënanga.
–3–
26Uha nojaji mangale natagongo o nyawa mahomoa manga nagimi. 27Done nako ngona nakunua namata nafangu, aningidu-ngidu mangï ma aha yal̄ë.
–4–
28Uha hakali-kali naheloro o tonaka mabatingi ihi totatapuoka ani ete de ani tohora.
–5–
29Ngona nïmakeoka o nyawa wakunu wadiai aikarajanga? O nyawa gënanga aha iwihikarajanga o kokoano manga kadatoka, ko o nyawa biahaua manga tauoka.
