O AMSAL 19
19
1Iholoi yaoa o mihikini manyawa manga wowango iriko-rikoto,
ngaro deo nyawa bodo yöigo-igo yoeluku.
2O magawe koiwa maganako, itorou,
o nyawa imatö tai-taiti aha yodiai o howono.
3O nyawa wohirugi aidiri mahirete mangale aibodo
de ipaha ma Jou wihihowono mangale o hali gënanga.
4O kaya manyawa aidodiawo salalu yodogo;
o mihikini manyawa iholoi iwimalaika aidodiawo.
5O nyawa woelu-eluku o juruhakimoka,
ahai wïrehenua o hukumanga.
6Moi-moi o nyawa ihidailako yol̄ë o hininga duru iparalu;
mata-mata o nyawa yomau imakohobata deo nyawa manga hininga imura-mura.
7O mihikini manyawa iwïlegaikaua ai riadodoto,
okia hongoli ai dodiawo.
Ngaro hokokia ünanga wohidailako,
ünanga wakunua wätauru önanga.
8O naguna wanïki o ganako, wödora aidiri;
deʼ o naguna wöhininga okianaga woma doto-dotoko, aha woutumu.
9O nyawa woelu-eluku o juruhakimoka marai aha iwihukumu deʼ iwibinaha.
10Ipatutua o nyawa bodo wowango dema boboloi,
deʼ ipatutuali o gilaongo wäpareta yokokuaha.
11O nyawa wobobarija wakunu watumungu aidohata.
Unanga iwihigogiriri karana wolegaikaua o nyawa manga howono unangika.
12Ma koano ai dohata hokä o singa ipoaka;
ma koano ai oa hokä o dumunitara yapehaka iwö wango-wangoil̄e.
13O ngohaka wobodo-bodo wakunu wïbodito ai ama.
O hekata möigo-igo mongamo de motetemo hokä o akere i tututu ibobaretiua.
14O tau deo arata yakunu hamake o dimonino,
mä o hekata mobobarija ganga o ngongike ma Jouino.
15Imatotebeturu yadiai o nyawa duru yakioko,
deʼ mabobaha wototebeturu aha iwihahini.
16O nyawa yihingou-ngounu ma Jou Madutu Aipareta aha yohalamati,
o nyawa yahoromatiua aha yohonenge.
17Häriwo o mihikini manyawa hokä hihibau ma Jouika;
dahaö ma Jou aha wabalahi.
18Natatoro nohidodiai aningohaka nako kanagahi o ngonganono;
nako kowali, mamangarati ngona nöigo manga bodito.
19Mal̄aikala o nyawa itaiti wongamo
mahasili mahirete wamao.
Nako ngona nïriwo ünanga
duga-duga ngona nödogo ai dohata.
20Nako ngona nöigo nomädotoko deʼ noihene o nasihati,
aha ngona nodadi o nyawa yobobarija.
21O nyawa mangangöe manga hidailako madatoro,
mä idadi duga-duga ma Jou Aiputuhu.
22O biaha yöngano-nganono o nyawaino genangala aisatia.
Iholoi yaoa homihikini ngaro de hodadi hoelu-eluku.
23Nïhoromati ma Jou, done aningango isanangi;
ngona aha namao nosanangi denobebasi deo bodito.
24Naga o nyawa o goguleua aidebeturu;
yöhugara o inomo aiuruoko maünanga woluku.
25Nako o nyawa yoede-edenge yähukumu, o nyawa koiwa-iwa manga ganako yamake o dodotoko.
Nako o nyawa aiakali maoa-oa iwihidaaere ünanga aha kaidogo wobarija.
26O ngohaka wäaniaya dewäduhu aidimono
ganga o ngohaka wahimal̄e-mal̄eke deʼ itorou.
27Ahingohaka, nako ngona noluku nomä dotokoli,
ngona aha nawohanga okianaga nomä doto-dotokoka.
28Ihidöaka o hakihi ielu-eluku, mamangarati yolegaikaua o hukumu;
yahibodito o nyawa, o nyawa madorou yamao ihemoro.
29O nyawa bodo aihininga ikökurutil̄e
maraioka aha iwigohara.
