O AMSAL 20
20
1O daluku ikua-kuata deihauku yadiai o nyawa yanakoua o adati deʼ yogigoro.
Yobodo o nyawa yoke-okere hiädono yädaluku.
2Ma koano aidohata hokä o singa ipoaka;
o nyawa yamömomiki aidohata mamangarati yabodito manga diri mahirete.
3Duga-duga o nyawa bodo yöigo imateke ributu;
o jako ihöhailoa ganga homahitingaka o ributu.
4Wototumule iwitotebeturu wakarajangua aidumule maörahoka;
mabaha o gugutuku maörahoka aitonaka mahasili okia-kiaua.
5O nyawa manga hininga madol̄a matero-tero o humu maakere ilöluku-luku;
mä o nyawa de manga mangaratioka yakunu yauiti.
6Manga ngöe o nyawa imahetongo ganga nanga dodiawo
mä igou-goungu yosatia ihuha hamake.
7O ngoha-ngohaka youtumu nako manga ama
yaoa de ai wowango irikoto.
8Nako ma koano wogogeruku o juruhakimi makuruhioka,
ünanga wakunu wamake mata-mata itotorou.
9Boteka naga o nyawa wakunu wotemo,
”Ahihininga itebini, ngohi tobebasoka deo baradoha?”
10Ihi tiba-tibanga deʼ o duduga irusi-rusi
ma Jou wasanangiua.
11O ngohaka aimanaramino yakunu yanako
aikalakuanga yaoa deʼ irikoto.
12O ngauku mangale hoihene deʼ o lako mangale hopulono,
hinoto ma Jou wohidadi.
13O nyawa yöigo-igo imaidu aha yomihikini.
O nyawa yämomagawe yokarajanga manga inomo iwöe.
14Woija salalu wotaiana mangale maija mahali.
Mä nako waijaka, ünanga aihininga ilamoko maijaino.
15O demo-demo de maganako
iholoi maragane ngaro deo gurasi deʼ o intan.
16O naguna womau watagongo o nyawa mahomoa manga nagimi,
i patutu yal̄ë aikiahonanga hokä aijaji madodanu.
17O arata o tipu mahasilino, madodihiraka mahemoro,
mä deipaha hamao hokä o helewo o karo.
18O datoro ihidödailako mangale o dibanga;
mangale gënanga, uha nimanarama de niadiaiua o datoro nihi dodiaino.
19O nyawa yosanangi yahiade-ade o nyawa mahomoa, yakunua yagogono o rahasia;
uha nimateke dodiawo deo nyawa yotö temo-temo iwöeholi.
20O nyawa wälololai ai dimono, aha ihihanga ai ngango
hokä o hilo ihone-honengoka o hagahutuoka.
21O arata madodihiraka yamake dema japati;
mabaha inyata o barakatiua.
22Uha niabalahi o dorou deo dorou;
niwingaku ma Jouika, Unanga aha winïriwo.
23Ihi tiba-tibanga deʼ o didibanga mahelewo irusi-rusi
ma Jou wasanangiua.
24Ma Jou wohitantuoka o nyawa nanga wowango mangekomo o duniaka nënanga;
mahababu gënanga o nyawa yakunua homangarati nanga wowango mangekomo mahirete.
25Napikiri nohidodiai ihira de nohijaji o huhuba ma Jouika.
Yakunu idadi aha ngona noma toduba maduruino.
26Ma koano wobobarija wohiöriki o nagona o nyawa madorou;
ünanga aha wähukumu önanga koiwa maapongo.
27O nyawa nanga hininga madararono marupa o dararono ma Jouino.
Yatararono o hininga madol̄a yangodumu.
28Nako ma koano wopareta de aidora, aihininga irikoto, deʼ iadili,
done ünanga aha kahirahi wokuaha.
29O gikiri magö yäheranga karana manga kuata,
deʼ o dimo-dimono yähoromati karana manga dudutu.
30Naga mamoiani yamao-maoka mamali-mali yaehe o dorou,
deʼ yatebini o nyawa manga hininga.
