O AMSAL 18
18
1O nyawa wohi tinga-tingaka ai diri de o nyawa mahomoa mamangarati
wohiakunu ai diri mahiretedika;
moi-moi manga damake o nyawa mahomoa ünanga wöngelo.
2O nyawa bodo wöigoua iwihidöaka o mangarati;
ünanga duga-duga wöigo wohiade-ade aihininga madol̄a.
3O baradoha deo hikauku itagi imanïki;
nako itorouoka, maraioli yahohedu.
4O nyawa manga demo-demo yakunu marupa o barija matiti malukuku hokä o ngöto ilago-agomo,
mamäta hokä o akere ihähahuru.
5Itorou homahiganu o nyawa yososetiaikaua,
deʼ hätuku o nyawa manga howono koiwa-iwa.
6Nako o nyawa bodo wotemo-temo,
ünanga wapuda o ributu deʼ wogahoko iwigohara.
7O nyawa bodo aidemo wawedere aidiri;
ünanga iwiliko aidemo-demo mahirete.
8O fitana gënanga ihemoro majame;
o nyawa yöigo yal̄ahiri.
9O nyawa wolölegaikaua ai manarama
imatero mamodorou deo nyawa yöigo-igo yakilianga.
10Ma Jou gënanga hokä o candi ikökua-kuata;
genangika o nyawa aihininga iriko-rikoto woiki deʼ wamake o ngï isosanangi.
11Mä o kaya manyawa watobote aiarata iwïgoana ünanga
hokä o bebeno o mehele ikökurutil̄e deʼ ikuata yakilolitino o kota.
12O nyawa aihininga ikökurutil̄e aha iwiotaka,
o nyawa aihininga ipöpoluluku aha iwihoromati.
13Woihenowahi dewohaluhu
ganga o nyawa bodo ai manarama deʼ itorou.
14Mangale aimau wowango, wakunu watagongo o huha deo hangihara;
aimau gënanga ihihanga, ihihangö hagala ai ngonganono.
15O nyawa aiakali maoa-oa salalu wökiriti madudungu mangale o ganako;
o nyawa yososawaro salalu wönahihu wamake o dodotoko.
16O ngongike yahelenga o ngekomo
deʼ o nyawa yängotaka o nyawa yolago-agomika.
17Wotö temo-temo madodihiraka o juruhakimi magoronaka salalu yamake hokä itiai,
mä manyonyata imulaenge yauji nako woboa ailawani.
18Deo undi, o ributu yakunu ihibobaha,
maboboloioli o galawani o nyawa yokokuaha manga hidogoronaka mayakunu yatiai.
19O riadodoto ai hininga yahiri-hirioka iholoi ihuha iwïdigika
ngaro deo kota malago-agomo;
o ributu hokä o kota mangorana malago-agomo madadatoko dema bebeno meheloka.
20Mangale o demo-demo yaheto-hetongo
naga mahasili kokiani yamao.
21O akiri dema kuaha mangale ihihalamati o wowango ekola yakilianga;
o nyawa kokiani watagongo aidemo mahasili.
22O nyawa yamömake-make o hekata, yamake o utumu,
o hekata ganga o ngongike ma Jouino.
23O mihikini manyawa wogahoko dema adati;
o kaya manyawa wohaluhu womarohu-rohu.
24Naga o hobata wososetiaua,
nagali iholoi yotigi deo riadodoto.
