O AMSAL 17
17
1Iholoi yaoa o gandum o uru moi demaributu koiwa,
ngaro deo inomo ihemo-hemoro dema boboloi madema ributuoka.
2O gilaongo wososawaro aha wäkuaha o ngohaka wododiai o mal̄eke;
deʼ aha watarima o puhaka kamamoi deo ngohaka gënanga ai roriadodoto.
3O gurasi deʼ o haaka yataili o ukuika,
mä o nyawa manga hininga ma Jou wataili.
4O nyawa madorou wodomoteke o hidumutu itotorou,
wototengeluku wöigo wohigihene o fitana.
5O naguna wahohedu o nyawa huha deo mihikini,
wïhikauku ma Jou Madutu Ai dodadi.
O naguna womorene deo nyawa manga bodito,
maraioka wamake o hukumanga.
6O nyawa yäpoperekioka manga hininga ganga manga ngohaka de manga danongo;
o ngoha-ngohaka yahiamo-amoko genangala manga dimono.
7O nyawa de manga horomati ipatutua wahetongo o tengeluku mademo-demo;
o nyawa bodo ipatutua wahetongo o demo-demo iböbaraguna.
8Naga o nyawa yatobote o tiwi o uru mabobokumu yakunu yadiai ihö hera-heranga;
deo tiwi o uru mabobokumu hagala moi-moi yakunu idadi.
9Nako nönahihu o nyawa inï igo,
nahi maaf manga howono yadodiai onanga.
Natumomiki o howono
duga-duga natoaka nia hobata.
10Moi o dodaare iholoi mamangarati mangale o nyawa yaoa-oa manga akali
ngaroka deo gogohara maratuhu moi o nyawa bodoika.
11O nyawa madorou salalu wapuda o huru-hara,
mä o honenge iboa unangika hokä o huhuloko koiwa aihayanga de aidora.
12Iholoi yaoa homakamake de o beruang ma ayo ihihihangoka mangohaka,
ngaro deo nyawa bodo wototasibu de aibodo.
13O naguna wabalahi o oa deo dorou,
o dorou ma aha koyakunua ihihupu aitauino.
14Yamulaenge o ributu ganga hokä niobelenga o akere mangekomo;
karana gënanga nimadohuku ihira dei mulaenge o ributu.
15Ma Jou wädohata o nyawa yahihowonua o nyawa yososetiaua,
deʼ yahihowono o nyawa yahowo-howonua.
16Parasuma o nyawa bodo wamata-mataka aitiwi walingiri o barija,
hababu ünanga aidibanga koiwa madumuloa.
17Womatengo aihobata salalu wosetia ai dodiawoika,
mä womatengo airiadodoto womahimoteke watagongo aihuha.
18O nyawa wojäjaji womahimoku aidodiawo ainagimi
ganga o nyawa bodo.
19O nyawa wöigo-igo o baradohaika,
wöigo imateke ributu.
O nyawa manga uru ilamo-amoko
yalingiri o gilianga.
20O nyawa womatengo wotipu-tipu aha woutumua,
o nyawa aiakiri ihago aha wamake o bodito.
21Imamake o ngohaka yofuma-fuma mamangarati yamake o hininga mahuha;
yodadi o ngohaka ibodo-bodo manga ama yahidoakua o morene.
22O hininga imore-morene o röehe yatumuloa;
o hininga kaihühuhaika yatobiki o hininga mabuturungu.
23O hakim worusi-rusi, watarima o tiwi o uru mabobokumu warahasia,
deʼ kowohidagiua o adili.
24O nyawa womö mangarati aidumutu ganga mangale wamake o barija,
mä o nyawa bodo aidumutu hohiöriki madiaiua.
25O ngohaka wobodo-bodo wïdiai o huha ai ama,
deʼ ngoi ayo amihininga wahuha.
26Ipatutua niwibobangu o nyawa wahowo-howonua,
deʼ ipatutua niwituku o nyawa aihininga irorahai.
27O nyawa ai dibanga idoto-doto, wotemo iwöeua.
O nyawa wobobarija salalu ai hininga irïdi.
28Womatengo o nyawa bodo aha yatobote wosawaro deʼ wobarija
nako ünanga woma rirïdi de aiuru watamunu.
