O AMSAL 16
16
1O nyawa yakunu yodiai o manarama madatoro,
mä ma Jou Madutu wohidöaka maputuhu.
2O nyawa moi-moi ai manarama yakunu idadi yaoa aibobulonoka mahirete,
mä ma Jou watakihiri aihininga madungutu.
3Ani manarama madatoro mata-mata nohidöaka ma Jouika,
done ngona aha nohasili nadiai.
4Hagala moi-moi ma Jou wadodiai naga dema dumutu;
deʼ madumutu mangale o nyawa madorou ganga o binaha.
5O nyawa yoede-edenge mata-mata ma Jou wädohata;
Unanga wohigumal̄aua önanga yörehene o hukumanga.
6O nyawa wososetia ma Jou Madutuika aha wamake o apongo;
o nyawa wïmodo-modongo aha iwihirehene de hagala o dorou.
7Nako ngona nasanangi ma Jou Ai hininga,
hagala anihaturu wadiai anidodiawo.
8Iholoi yaoa mahasili mahuhutulu deo hininga iriko-rikoto,
ngaro deo hasili mangöe makoiadilua.
9O nyawa yakunu wadiai o manarama madatoro,
mä ma Jou Madutu wohitantu aiwowango mangekomo.
10Ma koano watarima o kuaha ma Jou Madutuino,
hoʼ, ünanga wahowonua ai putuhu magoronaka.
11Ma Jou womau o nyawa idadi manga hininga irikoto o bubukunu magoronaka,
ikali wapake o duduga deʼ wohitiba-tibanga.
12Wokokuaha, wodiai o dorou ganga o peseke,
hababu aipareta ibitumu karana o adili.
13O hitararono ma ade-ade madiai yasanangi wokokuaha,
ünanga wädora o nyawa yotemo-temo de manga hininga iriko-rikoto.
14Ma koano ai dohata ganga hokä yähukumu yähohonenge ma abari;
o nyawa wobobarija aha wohidailako warïdi!
15Ma koano aihininga maoa iao o wowango isosanangi,
hokä o lobi ihiguti o awana o ngogoro maörahoka.
16Hamake o barija iholoi yaoa ngaro de hamake o gurasi;
hamake o ganako iholoi iragane ngaro deo haaka.
17O nyawa maoa imatingaka magurutika deo dorou;
o nyawa watötailako ai wowango madodagi, wögoana ai diri.
18O edenge mahasili o gilianga;
o hininga magurutil̄e mahasili o bodito.
19Iholoi yaoa o hininga itotipokouku deʼ o arata makoiwa,
ngaro de yänïki o nyawa yoede-edenge deʼ yajame toönanga manga arata yaora-oraino.
20Nohininga nohidodiai okianaga inïdoto-dotoko ngonaika, done ngona aha namake okianaga yaoa-oa.
Nïngaku ma Jouika, done ngona aha noutumu.
21O nyawa wobobarija iwinako ai dibangoka idoto;
madodagi wotemo nanga hininga yadaene, yadiai ai demo-demo idogo hangaku.
22O dibanga idoto-doto genangala o nyawa manga hininga ihöhailoa manga wowango mautumu matiti;
o nyawa bodo ai bodo mahirete iwihangihara.
23O nyawa aiakali maoa-oa yadiai ai demo-demo wobarija,
deʼ aidodotoko kaidogo yangaku.
24O demo ibole-bole marupa o madu;
hamao mamutiti deʼ nanga röehe yatumuloa.
25 #
Ams. 14:12
Naga o ngekomo hölega-lega irikoto,
mä mabaha o ngekomo gënanga yödumutu o honenge.
26O nahihu mangale o ngol̄omo yahititila o nyawa mangale womahidailako;
karana aimamata, pakisa ünanga wokarajanga.
27O nyawa madorou wohidailako wahibodito aidodiawo o nyawa;
ai demo-demo itorou, hokä o uku ingaboho.
28O nyawa yorusi-rusi yapuda o ributu;
woföfitana wakilianga o hobata madutu.
29O nyawa aidora de aihayanga koiwa wätipu aidodiawo,
deʼ wä ao önanga o bodito magoronaika.
30Nomahitiari o nyawa imahöhumuiete deʼ inihilölako bikini,
ünanga magogiria watatoro itotorou aihininga magoronaka.
31O nyawa ai hininga iriko-rikoto aha iwihidöaka ikurutu aiumuru;
aidudutu hokä o makota ileto-letongo.
32Itaitua hongamo iholoi yaoa ngaro de nanga kuahaoka;
hakuaha nanga diri iholoi yaoa ngaro deo kota hautumu.
33Mangale hanako nanga nasib, o nyawa youndi;
mä ihitö tantu mabobaluhu duga-duga ma Jou mahirete.
