O AMSAL 13
13
1O ngohaka wososawaro wohigihene wohidodiai nako ama wihidöaka yososawaro manga nasihati;
o nyawa woma ede-edenge woluku watarima o dodaaere.
2O nyawa maoa manga demo iao o utumu;
o nyawa manga hininga iriko-rikotua yosanangi o gangamoika.
3O nyawa womahidodiai ai demo-demo magoronaka aha ai wowango isanangi;
o nyawa wotemo-temo wosabaranga aha iwitapal̄u o bodito.
4Wototebeturu ai nahihu mangöe mä kamoiö wadaenua;
o nyawa wokarajanga wohauku wamake hagala wonönahihu.
5O nyawa manga hininga iriko-rikoto yödohata o tengeluku,
o nyawa madorou manga kalakuanga yahimal̄eke deyähohedu.
6O hininga marikoto yägoana o nyawa yowango manga hininga irikoto;
o dorou yahibodito o nyawa baradoha.
7Naga ima ede-edenge hokä yokaya enahioko manga arata koiwa;
naga imadiai hokä yomihikini, enahioko yokaya malago-agomo.
8O kaya manyawa kokiani ihihupu o tiwi hupaya manga wowango isanangi;
o mihikini manyawa yädohatua o nyawa.
9O nyawa manga wowango itebini hokä o cahaya itotararono;
o nyawa madorou hokä o hilo yato ihonenge.
10O hininga magurutil̄e mahasili duga-duga o ributu;
o nyawa wobobarija womau watarima o dodotoko.
11O kaya yamake dema gapanga aha itaitoli ikuranga;
mä o arata mahutu-mahutu yatoomu aha iholoi idogo.
12Nako o ngonganono itotomua, nangahininga ihangihara;
nako nanga nahihu hohimoteke nangahininga isanangi.
13O nyawa kowölegaikaua ma Jou Ai dodotoko, wohibodito ai diri;
O nyawa wohingou-ngounu ma Jou Madutu Ai titaika aha wamake ai hewa.
14O nyawa yobobarija manga dodotoko o utumu matiti;
nako naga o nyawa yängamo o dodotoko gënanga yahihalamati.
15O nyawa de ai akali maoa-oa aha iwihigogiriri;
o nyawa iwingakuokaua aha ihuha wowango.
16O nyawa wobobarija okianaga wodiaiuahi womapikiri;
o nyawa bodo wohingahu-ngahu ai bodo.
17O huhuloko wososawaroua woao o bodito;
o huhuloko iwingaku-ngaku maraioka wohasili.
18O nyawa wolu-oluku iwïdotoko idadi womihikini de okiaua iwidaene;
o nyawa watotarima o nasihati aha iwi horomati.
19Hokokia mahailoa wamake okianaga wonönahihu!
O nyawa bodo yoluku imaidulu o dorouino.
20O nyawa wododiawo deo nyawa wobobarija, aha idadi wobarija;
o nyawa wododiawo deo bodo manyawa, aha wobodito.
21O baradoha manyawa salalu iwïgoginïki o bodito
o nyawa maoa salalu watarima o utumu.
22O nyawa maoa yahipuhaka manga kaya manga ngohaka de manga danongika;
o baradoha manyawa manga kaya yagogono mangale o nyawa ai wowango iriko-rikoto.
23O tonaka mahomoa yakunu ihihasili o inomo mangöe mangale mihikini manyawa;
mä koiwa o adili idadi o hababu o tonaka gënanga yakarajangua.
24Wagoharua aingohaka, mamangarati wïhiningaua unangika;
nako wïhininga, kokiani wobarani wïgohara.
25O nyawa maoa salalu okia-kiaua yokuranga,
mä o nyawa madorou salalu yokura-kuranga.
