O AMSAL 14
14
1O rumah tangga ihigoko mangale o ngoheka ami barija,
mä ikilianga mangale ami bodo.
2O nyawa aihininga iriko-rikoto wimodongo de wïhoromati ma Jou o Jou Madutuika;
o nyawa ai wowango ai hininga irikotua wïhikauku Unanga.
3Karana aiedenge, o nyawa bodo wöigo aidiri wohilamoko;
o nyawa wobobarija aha iwïgoana ai demo-demo mahirete.
4O hapi koiwa, o dumule mahasili koiwa;
de o hapi makuata, yautu-utukino aha dema boboloi.
5O hakihi ai hininga iriko-rikoto salalu wahetongo okianaga madiai,
o hakihi iwingaku-ngakua salalu woeluku.
6O nyawa yoede-edenge koidadiua yobarija,
mä o nyawa wososawaro dema gapanga womä dotoko.
7Uha nododiawo deo nyawa fuma;
okiaua yakunu wonïdotoko ngonaika.
8O nyawa wobobarija wohiöriki sarakia kokiani okianaga wodiai,
o nyawa bodo iwitipu ai bodo mahirete.
9O nyawa bodo wohaduliua ai baradoha iwihiapongo ekola kowali;
o nyawa maoa wöigo ihiapongo aibaradoha
10O morene ekola o duka igogono o hininga magoronaka;
o nyawa mahomoa yakunua yamao.
11O nyawa maoa manga tau kahirahi ikekete;
o nyawa madorou manga tau aha iruba.
12 #
Ams. 16:25
Naga o ngekomo hölega-lega irikoto,
Mä mabaha o ngekomo gënanga yödumutu o honenge.
13O giete maporetino yakunu idadi naga o gari;
o morene yakunu ihibobaha deo duka.
14O nyawa madorou aha wautuku ai dorou mahohoko,
o nyawa maoa aha wautuku ai oa-oa mahohoko.
15O nyawa bodo wongaku o demo-demo moi-moi,
o nyawa wobobarija wohidodiai okianaga wodiai.
16O nyawa wobobarija salalu womahitiari deʼ womahitingaka i kurutika deo dorou,
o nyawa bodo ai dohata idoa daha wamao wosanangi.
17O nyawa wöigo wongamo wobodo okianaga wodiai;
o nyawa yobobarija manga jako yosabari.
18O nyawa kokia-kiaua wanako aha idadi wobodo;
o nyawa wobobarija aha idogo ai ganako.
19O nyawa madorou aha womaponu o nyawa manga hininga iriko-rikotika,
mangale wogahoko hupaya iwïdora.
20O nyawa mihikini koyäsanangiua maboboloi manga dodiawo;
mä o kaya manyawa yowöe manga hobata.
21O naguna wähikauku o nyawa mahomoa, wodiai o baradoha;
o naguna aihininga yaoa o mihikini manyawaika aha woutumu.
22O naguna wohidailako yaoa-oa, aha iwingaku deʼ wamake o horomati;
o naguna wohi ade-ade wohidailako itotorou naga o ngekomo irehe-rehenoka.
23O hidailako moi-moi mahidogoronaka naga o utumu;
o demo-demo ihohomoa yadiai o nyawa idadi yomihikini.
24O nyawa wobobarija iwihigiriri karana aibarija;
o nyawa wobodo-bodo iwinako karana aibodo.
25Nako o hakihi womatengo wotemo itiai ünanga wohihalamati aijiwa;
nako ünanga woeluku ünanga wahianati aidodiawo o nyawa.
26O nyawa wïmodo-modongo ma Jouika aihininga irïdi,
deʼ ai tau madol̄a aha de manga gogoana.
27O modongo ma Jouika ganga o utumu matiti;
deʼ o ngekomo mangale womahirehene o honenge.
28Ma koano ai utumu igogere aikawahaka manga ngöe;
o kawaha moiua ünanga wakunua wokuaha.
29O nyawa yobobarija itaitua yongamo;
o nyawa bodo yakunua manga diri yatumungu.
30O hininga irörirïdi yatumuloa o röehe;
o hininga mahiri hokä o panyake ihihöhone-honenge.
31O naguna wodiai o oa o mihikini manyawaika, wïhoromati ma Jou Madutuika;
o naguna wätuku o nyawa imagaku-gakunua, wihikauku ai Dodadi.
32O nyawa madorou wobinaha karana o dorou,
o nyawa maoa iwïgoana aihininga marikoto.
33O barija salalu naga o nyawa aiakali yaoa-oa aidibanga magoronaka;
mä ihidukuku o nyawa bodo ai dibanga magoronaka.
34O adili deʼ o oa-oa yagoraka o hoana deo berera makaramata,
mä o baradoha yadiai o hoana deo berera idadi yahikauku.
35Ma koano wosanangi aipegawe yososawaroika;
mä ünanga wädohata aipegawe yaku-akunua ihidagi manga manarama.
