O AMSAL 12
12
1O nyawa yöhohininga o ganakoika yosanangi yamake o dodaaere;
mä o nyawa yoigo-igoua yähidaaere ganga o nyawa fuma.
2O nyawa maoa ma Jou wäsanangi,
mä o nyawa ihidödailako o dorou aha yatarima o hukumanga.
3Ka o nyawa moiö makoiwa naga yakunu kahirahi youtumu mangale o dorou;
mä o nyawa manga hininga iriko-rikoto kahirahi yobitumu, koyogiwiua.
4O hekata maoa ganga ami rokata ai hininga ilamoko deʼ ami rokata ai utumu,
o hekata madodiai ami rokata iwi mal̄eke ganga hokä o kobongo mapanyake iwede-wederuku.
5O nyawa manga hininga iriko-rikoto yapikiri hagala o hali maoa-oa;
o nyawa madorou yatatoro o tengeluku.
6O nyawa madorou manga demo-demo yähohonenge;
o nyawa manga hininga iriko-rikoto manga demo-demo yähihalamati.
7O nyawa madorou aha yäotaka deʼ yabinaha manga rio makoiwa;
mä o nyawa maoa aha kahirahi yobitumu yongohaka deyo danongo.
8O nyawa iwihigiriri imamoteke de ai barija;
o nyawa iwihikauku imamoteke de ai fuma.
9Iholoi yaoa yodadi o kawaha biaha de manga karajangoka,
de imadiai o nyawa yolago-agomo enahioko o inomo yahikuranga.
10O nyawa maoa watailako wohidodiai ai aiwani o gigini;
mä o nyawa madorou wahangihara.
11Yototumule yokarajanga ihauku manga inomo iwöe,
mä o nyawa yaumo-umo manga öraha mangale o hali mafaidä koiwa-iwa ganga o bodo manyawa.
12O nyawa madorou yönahihu yamake o utumu o nyawa yososetia inoua;
o nyawa maoa hokä o gota mautu ihohoko.
13O nyawa madorou yätagoko mangale toönanga manga demo-demo itotorou yahö heto-hetongo;
o nyawa maoa yahirehene deo huha deo hangihara.
14Moi-moi o nyawa yamake mabalahi imamoteke de manga demo-demo deʼ manga manarama;
moi-moi yahidöaka o hewa imadae-daene.
15O nyawa fuma womamao ai diri komaiwa wahowono,
mä o nyawa wobobarija wöigo woihene o nasihati.
16Nako o nyawa bodo womal̄e mangale, o öraha gënanga dika wohi nyata ai hininga mahiri;
mä yobobarija yohaduliua nako yohohedu.
17Dede waheto-hetongo o diai wohimatoko o adili;
deo tengeluku o nyawa wohimatoko iadi-adilua.
18O ade-ade isosabaranga yakunu yal̄abo o nyawa manga hininga hokä o oworo ihitopoko;
o barija mademo-demo hokä o houru yahitö togu-togumu.
19O lako dadawi o tengeluku aha ikilianga,
mä o diai mademo-demo aha kahirahi o öraha magurutu.
20O nyawa i hidödailako o dorou yöigo iadi-adilua,
o nyawa ihidödailako o oa aha youtumu.
21O nyawa maoa aha koyamakeua o bodito;
o nyawa madorou aha salalu yäkorona o huha.
22Ma Jou wädohata yototengeluku,
mä Unanga wosanangi deo nyawa manga hininga iriko-rikoto.
23O nyawa wobobarija wohidumu-dumutu ai ganako;
o nyawa bodo wohingahu-ngahu ai bodo.
24O karajanga ihauku yadiai o nyawa yokuaha;
o debeturu yapakisa o nyawa yodadi o gilaongo.
25O mamao o hawatere yatobiki manga nauru,
mä o demo-demo mabole-bole o hininga yalamoko.
26O nyawa maoa iholoi yautumu de imakokadateke;
o nyawa madorou yangohu o ngekomo karana manga dorou.
27De ima totebeturu aha koya makeua yonönahihu;
deo karajanga ihauku o nyawa yamake o kaya.
28O nyawa yanönonu o ngekomo madiai aha yowango yosanangi;
o nyawa yanönonu o ngekomo itotorou yödumutu o honengika.
