Josué 23
23
Josué Israelifo yoini cuscan ahuun tsain unutaqui
1Man fari ichapa finoano nocon Ifo Diosin yonoa cuscan nan Israelifo noicasmaifoancai afanan ato fucash huanima. Nantian Israelifo isharacoinnifo. Nantianri Josué anifocoin ini. 2Ascano Josué nantifi Israelifo cunani aqui funonfo. Ato niaifo patasharinoafoya nantifi ato cunashon yoini isca huaquin,
—Unfin natian anifoshtaquin. 3Nocon Ifo Diosi caifo futsafo matohuunshon aca cuscan man man nantifi oinmisi. Maton Ifo Diosin mato noicasmaifo mato rutumaquin cuyoni. 4Mani futsafo man non rutuqui cuyofain mai futsa anoafori man non ato pota. Ascashon nantifi nan mai un mato pashcanan huapashquin. Unu Jordán chaicoin nan ununhuan Mediterráneo fari iquiaiquiri un mato pashcanan huashquin. 5Nan ratoran caifo futsafo man ato mai anoshon potataima nocon Ifo Diosin matohuunshon ato potashquin man ato mai fiinon. Nannori maton Ifo Diosin mato yoiyoni.
6Ascan ahuun curushhuunshon mato amapaiyai cuscan huafafaincahuun. Moisés libro muran mato cunushoni cuscan nantifi nansca huacahuun. Nan cununi cuscan ahuara futsa shinanyamacahuun. Nan fusti tanasharacahuun. 7Mani futsafo matomaquinoashu foataifoma ato fu rafuyamacahuu. Aton diosifo rami huafo aton anuhuunshon ahuara yoiyamacahuun. Aton anufori yoiyamacahuun. Nanfoqui fuopacucahuayamacahuu aton oinmatifori iyamacahuu. 8Ascatamarocon nan man amisi cuscan nocon Ifo Diosi fusti fu rafucahuun.
9Nocon Ifo Diosin matohuunshon caifofo mutsisipacoinfo aton yora ichapafoya aton mai anoshon ato potani. Nantiaricai rato caifofoan mato nitumatiroma. Maton Ifo Diosin matohuunshon ato rutumisi. 10Ascano fustifiashon nan yora futsafo mil nocofunufofiacun man ato ichontiro. Nocon Ifo Diosin matohuunoa caifo futsafo matomaquishon potashquin man aton mai fiinon. Nannori nocon Ifo Diosin mato yoiyoni. 11Ascacun oinfain maton Ifo Diosi noicoincahuun.
12Ascafia man nocon Ifo Diosi cachiquiri huaiton nan caifo futsafo mato muran nituaton aton ainfofoya fianancain ato fu man rafushcaquin. 13Man ascaquifin man tapitiroquin nocon Ifo Diosin afanan nan mani futsafocai matomaquishon potashquima. Ascano nanfoan maton trampa muran pacumani cafisca huatiro. Mato fichiquin tuchiaton maton catu coshai cafisca huafain maton furo mosha chachi cafisca huai. Man afanan nan mai shara nocon Ifo Diosin mato inanniano afanan itamarocon man nai futsushcaquin.
14Natian mun samamashta nai. Man manfin maton nomuran tapicoianquin nocon Ifo Diosin mato yoiyoni cuscan nanscacoin mato huashomisi. Mato yoimisi cuscacai mato huashoyamamisima. Nantifi man mato ashomisi. 15Ascafia mato yoiyoni cuscan man ahuun tsain nicasharaino mato shara huashoshquin. Nanscarifi ai man ahuun tsain cachiquiri huaacun icocoinri mato yoimisi cuscan mato onaintimashquin na mai shara ano mato inanni anoshon mato namaquin cuyoshquin. 16Nocon Ifo Diosin mato yoiyoni cuscan nannorisi man shinanyamaino caifo futsafoan ato diosiran ishon rami huafo man fuoshopacucahuanaiton nocon Ifo Diosin matoqui sinacointaquin nan mai shara ano mato inanni anoshon mato potaquin cuyoshquiran, —ishon Josué ahuun caifo Israelifo yoini.
Kasalukuyang Napili:
Josué 23: mcd
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2008, Wycliffe Bible Translators, Inc. All rights reserved.