Génesis 49
49
Jacob ahuun tsain unutaqui yoini
1Nantian Jacob ahuun facufo cunani ato yoishquin, —Uqui fucahuun. Ua cutsaomui fucahuun un mato yoinon ahuuscamain man aicai.
2Ascan uhuun facufoan ua cutsaomucahuun ua nicasharashcaquin. Unquian maton upa Israel un mato yoinon.
3Minfin uhuun facu Rubén iyoacaiquin. Un mutsisipano min taui cainni. Min ushtofo min ato finoan. Nantififain mihuunoa shinansharafo. Min curush cuscaran tsoa mia finoanma, 4Ascafia mincai isharacoianma. Min fasi furomacoin. Min uhua futsa fu nan uhuun ahuin fu min ini. Asca min ushtofo min afanan finoinma.
5Simeón yafi Leví nanscara rafu imisifo. Ipaitama futsafo noicasmai. Atocai shara huapaicanima. Futsafohuun ramapaiyamacain. 6Ascano nan rafutan shinanchacamisifo cuscacai un nicapaima. Ipaitama sinacaquin nan icafo anoshon ato rutuafo. Ipaitama moifori mushtunifo afanan niisharanonfoma. 7Fasi sinamisicoin rafu. Nanscacufin Diosin ato onaintimacoinfain aton funafo Israel mai ano ato pashcanan huaiquin.
8Ascano Judá, min yorafoan mihuunoa yoisharashcani. Mia noicasmaifo min ato cuyoshquin. Min yorafoan mia ratoconun mai chachishotiro min ato ifo ishquin. 9Judá min uhuun facushta. Min masharo pushco cuscaran. Masharo pushcopan ahuara rama pita raca tsoa mointiroma. Masharo ahuin nanscarari. 10Min funafo futsan niaifo ipanaca. Futsan nocoataima futsafoan niaifo iishquicani. Nan futsa nocoano niaifo ano nantififain man nicasharashquin. 11Ahuun ina camaqui caashquin. Ahuun ihui tapoqui burro nushashon ahuun sahuutifo vinopan patsafain nan uvapan ahuun unun patsaquin tapitiro nanfin ahuara ichapaya ahuashta yopashquima. 12Ahuun furo fisocoin nan vino unu finonmana. Ahuun piti oshopacoin yoa rama furohua ointsa.
13Zabulónfin ununhuan cusumunri iishquiquin. Nanno fai fotoano shashohuan rutiatirofo ahua chaca finononma. Nan pushu rasi Sidón ano ahuun mai noconan.
14Isacar nan ina mutsisipacoin ahuarafo ihuu fotiro cuscaran. Nan inapan forusa rafu nushmancayan racano tunutiro. 15Nanscarifi ai Isacar ahuun mai shara oinquin nannoshon tunushquin. Ascafia ahuun ifoan yonoa cuscan ahuara ihuu foshoshquin.
16Uhuun facu Dan ahuun funafoan aton niaifo ato yonosharafain aton cayacafi yoishquin. Nanfin Israelifo mani futsa ishquiquin. 17Nan rono paupaton fai cusumun manishon caballonun finonfainaiton ahuun tau chichoco nasatiro. Ascaino nocofunu nan caballocamaquinoashu acachori pacutiro. Danfin nan rono cuscaraquin.
18Uhuun Ifon Diosin, min ua numatiro un mi fu nipanon.
19Yomutsofo uhuun facu Gadqui nocoshquin chaca huashcaquin. Ascahuafiaifoan nantofin ato ichoshquiquin.
20Aser ahuun yonofo foaisharashoshquin. Ahuun tushu fasi sharacapacoin iishquin. Nan cuscara tushufo niaifofoan fuchipaitirofo.
21Neftalí chasho ahuin shara fununun cahuacacaintiro cuscara iishquin. Ahuun facufo fasi sharashtacoin iishcani.
22Joséfin nan ihui unu cusumun nia cuscaraquin. Ihui fimi ichapaya shara cuscaran. Ihui poyanfoan pushu cunu mata shara huatiro cuscaran. Nanscarifi ai Joséhuunoashu yora isharamisi ato cushusharamisi. 23Futsafoan noicasmacaquin chaca huaquin. Rutupaiquin piannifo. Pianfiafocai nanima. Nanfoanfin José omitsisca huanifoquin. 24Nansca huafiaifoan Diosin ahuamamishti huatiro cuscan nanton José mutsismananocai tsoan ahuusca huatiroma. Diosin José cushusharacoinmisi nan noicasmaifoan ahuusca huanonfoma. Nanfin uhuun Diosiquin. Aicho Diosin min ahuamamishti huatiro. Aicho Diosin nonfin Israelifoquin. Min nocon cushumisicoin. 25Min Diosi ahuamamishti huatiro. Nanfin min upa non min shunifoan aton Diosiquin. Nanton mia ahuara ashoshquin. Diosin icanoshon mia shara huafain mai anoshori mia shara huafain min facufori aton ahuafo facu cainmasharafain ato shoma ayamasharashquin. 26Maton fasi ushu shara foaifain mato charofo foaisharano nantifi min mai nan machifo non mai futsari nannoashu min isharatiro. Nanscacun Diosin José shara huafafainshquin. Ahuun ochifoan chaca huafianifo Diosin catoanno aton niaifo ini.
27Uhuun facu Benjamín nan pashnanhuan fasi pofucoin cuscaran. Funanmarishta ahuara rutushon pii. Fari caino ahuara rutushon pashcanan huatiroran,
—ishon Jacob ahuun facufo yoini.
28Nan doce Israel ahuun facufo. Nannori ato yoipacuni. Chipo aton funafo doce mani futsafo icafo ini.
Jacob nani cuscan
29Shafan futsa Jacob ahuun facufo yoini isca huaquin, —Un samamashta nai. Nan nocofunu Hitita ahuun anu Efrón ahuun mai ari mahua quini. Nanno uhuun shunifo mai huanifo. Nan mahua quini anuni Macpela. A muran uarifi mai huacahuun. 30Nan mahua quini Canaán muran. Nan chaimashta pushu rasi ahuun anu Mamre. Nan Efrón ahuun mai yafi mahua quini Macpela uhuun shota Abraham fini ahuun yorafo a muran mai huanonfo. 31Ascan uhuun shota Abraham non ahuun ahuin Sara non uhuun upa Isaac non uhua Rebeca nanno mai huanifo. Nannori uhuun ahuin futsa Lea un nan mahua quini muran mai huani. 32Uhuun shota Abraham nan mai yafi mahua quini Hititafo murannoa fini. Uari nan quini muran un naacun ua mai huacahuun, —ishon Jacob ahuun tsain unutaqui ahuun facufo yoini.
33Nannori ato yoitan racapacucahuatan nan raca anoashu nani.
Kasalukuyang Napili:
Génesis 49: mcd
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2008, Wycliffe Bible Translators, Inc. All rights reserved.