Génesis 45
45
José ahuun yorafo ato onanmani
1Nan nicatan José afanan ahuun oinmatifo aton ointaifin tunutiroma muuquin ato nichini. —Nantifi umaquinoashu chifi fotacahuun, —ishon José Egipciofo oiashcafini yoini. Ascashon ahuun yorafosi ato onanmani. 2Ato onanmatan fasi uaini. Uaicaiton Egipciofoan nicanifo. Ascano niaifo Faraón pushu murannoafoanri nicacani aqui chaninifo.
3Ascatan José ahuun yorafo yoini isca huaquin,
—Unfin Joséquin. ¿Uhuun upa afin niamun? —ishon ato yocaino ahuun yorafo nicain fasi ratucoincani tsoa puusinima.
4Asca José ato yoini,
—Ua chaima fucahuun, —ato huani. Ato asca huaino a chaima fonifo. Ascano ato yoini,
—Unfin mato ushto Joséquin. Man ua Egipcio fainoashu man ua inanmitsani. Nannoshon ua nuno ihuunifo. 5Man ua asca huafianishaquin ratuquima mafo ranan shinanonainchaca huatananyamacahuun. Man ua chaca huanihuunshon nuno ua rucu Diosin nichini un yorafo numanon. 6Fari rafu finontan yono yamai. Mucu fustiti farin cai ato yono fanafiashon tsoan aton mau anoa ahua chituyonima. 7Ascano Diosin matomaquinoa ua rucu nichini un mato numasharanon man foni nayamacain maton funafo caisharanonfo.
8Ascano man tapitiro man ua nuno nichiyamafia Diosin ua nuno rucu nichini. Ua yonoa un niaifocoinshon Faraón ahuun tapimamisi un inon. Faraón ua catonni nantifi ahuun yorafoan aton niaifo un inon. 9Natian nocon upan mai ari foriscatacahuun isca huaquin ua upa yoishocahuun, “Min facu José mia yoimana isca huaquin, ‘Diosin yononi cusca nantifi Egipciofoan un aton niaifocoin un inon. Ascan uqui oriscahuun un mia cushunon. 10Min non min facufo non min funafori man u fu chaimashta itiro. Nan man icai ano mai ahuun anu Gosen. Min inafo non nantifi min aya cuscan min nuno futiro. 11Mucu fustiti farin yono yamai. Ascafia un Gosén anoshon un mato cushusharai man ahua yopanonma. Man oyamashu nantifi man fasi foni omitsiscairan,’ ” ishon ua upa yoishotacahuun. 12Uhuun ushto Benjamín futan marifi man man oian uficoin un mato yoia. 13Egipciofoan ua niaifo hua cuscan uhuunoa yoisharamisifo upa yoifain nantifi man nuno oian cuscan upa tapimatacahuun. Yoitan upa nuno ua ihuushoriscacahuun, —ishon José ahuun yorafo yoini.
14Nannori ato yoitan ahuun ushto Benjamín icoancufoan uaini. Benjamín arifi ahuun ochi icoanshu uaini. 15José nantifi ahuun yorafo icoancufoan uaiquipacuni. Ascatan ahuun yorafoya tsain shara yoinonannifo.
16Ascan José ahuun pushu ano ahuun yorafo nocoafono futsafo niaifo Faraonqui chaninifo. Nicacanashu Faraón yafi niaifo patasharinoafori unimanifo. 17-18Ascashon Faraón José yoini isca huaquin, —Min yorafo yoihuu min upa ahuun mai anoa ihuitanonfo ahuun yorafoya nuno funonfo. Aton inafo camaqui un ato ahuarafo inain cusca ichapa fotanonfo. Afanan nuno nasoaifoan un ato mai fasi shara un inanshquin. Rato mai futsacai Egipcio nunoa mai shara cuscarama. 19Ascatan nunoa caballo taramutiyafo ato foshotacahuun aton facufo non aton ahuinfo non aton apanya ahuun mai anoashu nuno funonfo. 20Ahuarafo man aya cuscan shinanyamacahuun. Nunoa ahuara fasi shara finacaya matona iishquin. Min yorafo ua yoishohuun, —ishon niaifo Faraón José yoini.
21Faraón yoia cuscan Jacob ahuun facufo nanscacoinnifo. Faraón José yonoa cuscan ahuun yorafo caballo taramutiyafo inanfain tushuri ato inanni. 22Ahuun ochifo sahuutifori ato inanni. José ahuun ushto Benjamín nan ato inan cuscan finonmacaifain paratamacoin inanni. Tres cientos torofo chicoin inanfain sahuutifo mucu fustiti inanni. 23Ascashon apari ahuarafo fomani. Mucu rafuti burro camaqui ahuarafo sharashta ato fomafain mucu rafuti burro ainfo camaqui misi yafi tushu futsa futsatapafo fomani Egipcio mai ano apa nasoaitian pisharanonfo. 24Ascatan José ahuun yorafo nichiquin ato yoini isca huaquin,
—Uhuun ochifoan, upa ari man caitian fochishmanantananyamacahuun, —ishon José ato yoini. 25Ascatan Egipcio anoashu fonifo apa Jacob icano Canaán mai ano noconifo. 26Nococatan apa yoinifo, —Upan, min facu Joséfin niaquin. Natian nanfin Egipciofo anoafoan aton niaifocoinquin, —ishon yoiaiton nicain Jacob fasi mustairini. Ahuun facufoan yoiai cuscan icoinra huayonima. 27Ascafia nantifi José ato yoia cuscan apa tapimafain caballo taramutiyafo furun José nan fuma cuscan oin fasi shinancoin afanan unimani. 28Ascashon Jacob yoini isca huaquin, —Natian mun icoinra huai uhuun facu José man nia. Un nataima un oinyoicairan, —ishon yoini.
Kasalukuyang Napili:
Génesis 45: mcd
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2008, Wycliffe Bible Translators, Inc. All rights reserved.