1 Samuel 3
3
Nocon Ifo Diosin Samuel cunani
1Ascano nantianri nan furonanfacu Samuel Elí yononi cuscan huashoni. Nanscahuahuunshon Samuel nocon Ifo Diosi ashomisi. Nantiancai nocon Ifo Diosin ahuun tsain tsoan tapiyonima. Fusti rasiton ahuun tsain nicanifo. Aton namapanhuunshon Diosin ato tapimapaiyai cuscan fusti rasi tapinifo. 2Ascan yamu futsa Elí ahuun racati ano racani. Ahuun furo afanan oinsharaima. 3Elí yafi Samuel Diosin tsainti pushu muran icafoanno aton farocai nocatai inima. Nantian Samuel nocon Ifo Diosi fu tsainti pushu muran racani. Diospan casho a muran ahuun tsain nanuni Samuel chaimashta raca ini. 4Samuel nanno racano nocon Ifo Diosin cunani.
“Samuel,” huaiton.
“Unquian. Unfin nunoquin,” huatan. 5Funinacahuan Elí racano ichoni. —Min ua cuna. ¿Ahua min yopaimun? —ishon yocaiton.
—Ma. Uncai mia cunama. Caashu racatahuun, —ishon yoini. Ascano afanan caashu racani. 6Ascatan afanan nocon Ifon Diosin Samuel cunani, “¡Samuel!” huaino. Afanan funinacahuatan Elí racano cani. Ascatan afanan yoini,
—Min ua cuna. ¿Ahua min yopaimun? —ishon yocaiton.
—Uhuun facushtan, un mia cunama. Caashu afanan racatahuun, —Elí huani.
7Nocon Ifo Diosincai Samuel cunayomisima. Ascano ahuun oiricai nicayamafain aacai onantaima ini. 8Ascatan afanan nocon Ifo Diosin Samuel cunaino funinacahuan Elí racano afanan cani. Ascashon yoini, —¿Mian cunamun? —ishon yocaiton.
Nantian Elí tapirisca huatani nocon Ifo Diosin nan furonanfacu Samuel cunacun. 9Ascashon afanan yoini,
—Afanan caashu racatahuun. Nocon Ifo Diosi mia afanan cunaiton cumaquin isca huahuu, “Unquian, Ifon. Ua yoihuun un mia nicanon,” —ishon yoihuun. Ascano Samuel afanan ahuun racati ano racani. 10Ascano afanan nanscari huaquin nocon Ifo Diosin aqui oshon cunani, —¡Samuel! ¡Samuel! —huaiton, —Unquian min oinmati. Ua yoihuun un mia nicanon, —ishon cumani.
11Ascashon nocon Ifo Diosin Samuel yoini isca huaquin,
—Un samamashta Israel mai ano acai cuscan nicacani fasi ratucoinshquicani. 12Un Elí yoia cuscan un huashquin. Nan non ahuun yorafo fasi omitsiscashcani. 13Munfin yoimisiquin ahuun facu rafutan ua chaca huafiaifoancai ato yoipaimisima. Nanscacufin un ahuun yorafoya ato onaintimacoincain. Nanfocai afanan ato caifohuunoa ua cufinshomisifo ipanacama. 14Un yoimisi cuscacai un fianananpacunacama. Elí non ahuun facu rafutan ua ina rutushotiro ua ahuara futsa inanpaifiaifoancai un aton chaca rau huashopacunacamaran, —ishon nocon Ifo Diosin Samuel yoini.
15Nan nicatan afanan Samuel nanno racani nan shafai chain. Ascashu funamari nocon Ifo Diosi pushu shoi caincaiti ano fupushoni. Nocon Ifo Diosi yoia cuscan Samuel ratuquicai Elí yoipainima. 16Ascatan Elí Samuel cunaquin isca huani,
—Uhuun facushtan, Samuel, —huaiton. —Unquian nuno, —ishon cumaiton.
17—¿Nocon Ifo Diosin mia raquiri yoiamun? Nantifi ahuun tsain ua yoihuun. Mian fomainton nocon Ifo Diosi mia fasi onaintimapainonran, —ishon yoini.
18Nannori Elí huaiton nicaquin nan nocon Ifo Diosin yoia cuscan Samuel nantifi Elí tapimani. Ahuashtacai fomannima. Nan yoiaiton nicaquin Elí yoini isca huaquin, —Naanfin nocon Ifoquin. Nan shinan cuscafin sharaquin. Nantofin nan apaiyai cuscan huatiroquin, —ishon Elí Samuel yoini.
19Nan Samuel yosiatian nocon Ifo Diosin a fu ipaoni. Nocon Ifo Diosin Samuel inonpacoai yoini cuscan nanscaracoin finonni. 20Ascano nantifi Israeli maifoti icafoan yoinifo isca huaquin, —Samuel Dioshuunshon noco yoimisi. Noco yoimisi cuscan huamisiran, —ishon ahuunoa yoinifo. 21Nan Silo pushu rasi ano Diospan ichananti pushu muran nocon Ifo Diosin Samuelqui nocopaoni ahuun tsain tapimashquin. Ascano nocon Ifo Diosin Samuel tapimani cuscan ahuun caifo Israelifori tapimapaoni.
Kasalukuyang Napili:
1 Samuel 3: mcd
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2008, Wycliffe Bible Translators, Inc. All rights reserved.