2 Atasaloniyi 3
3
Wyegyi ntu n aduwazhni ɓo
1Ntu n aɓoaje ɓo, əmi azaje azanugbai n anyikwozai, fye zhniaduwa ga yi nabai n Dagayi ɓədatnu ɓa gnamyi n pyeepye jesnu a ga kwo mwamwa ngye shi kwo ɓə ɓwasnu n əfye aba nyi. 2Njesnu fya zhniaduwa nge n a ɓa gnyi yi ya n akpizhniyi akwnu n aza nukwoii, ntuge zahozahoyi nu to n gaiciyaganunuii lo m. 3Ama Dagayi zhni gbenui nu, wo ɓa fyi fye akalá jesnu wa kna fye n əzanukwoyi. 4Yi n agwumyii lo dna n Dagayi, nge fye zhni aɓo lo n yi ɓə tu fye əgbe nyi, jesnu fye ɓə ye gwodu fya zhni ɓa. 5Fa Dagayi wa ga fye awyega n əfya adu dna n Shekwoyi yeye n Kirisiti əmìfyi.
Ɓəkwnukwnù ntu ɓwato ɓo
6Dna n Dagayi Yeisu Kirisiti əye, əyi azaje azanugbai n anyikwozai, yi tu fye ɓəgbe, fye la kpmiya n vyiyi dəhodəhoi n wo wo ɓwato lo, to woi ye wa zhni tnutnu m, jesnu n wo ta gyianyì lo n vyi nyawu n fye ɓə gwo n yi nyi m. 7Ntuge əfyehni fye kpəlo shi fye gwo fya vyi əyi əfye. Yi to ɓə zhni yii wo ɓwato, əsa n yi ɓə kwnusnu n fyei nyi m, 8kwo ya gyi əzaho nyagyi, to ya gba kwo əta m. N əkwoɓwi, yi ɓə zhni tnutnu n əyi aɓwai nu, nyipyei n sukwoi n əyihnii kwukwui, to yii snu m, nabai n yi taa kwu zè akaya tu əzaho n əfye m. 9Yi ɓə zhni lonu, toge yi to ɓə kwnuce nu ya gwo bmazhni m, ama ya kwu zè əfye n fye ɓa vyi. 10Kwo əsa n yi ɓə kwnusnu n fyei nyi, yi ɓə la ɓəgbetu ye ga fye: “Əza n wo taa ye wa zhni tnutnu m, wo taa gyi nyagyi m.”
11Yi wo lo nge azaho lo n əfye n ɓa zhni aɓwatoyi nu, ɓai wnu azaje tnutnuzhni ya. Ɓa ta zhni tnutnu ho lo m, ɓa zhni aɓəshnayi nu. 12Aza yi pya nu n yi tu ɓa əgbe jesnu yi tnaɓwa nu dna n Dagayi Yeisu Kirisiti, nge ɓa kwu wnazhi jesnu ɓa ɓwa nyagyi n kwo gbmi n əɓa tnutnu ɓa gyi. 13Ama əfyeeda, əyi azaje azanugbai n anyikwozai, a to kwu fye ɓe n aɓo manaizhnii m.
14Fye la əwyewna n zahozahoyii n wo ta vyi əyi gbega lo n kwo fyi n paka ye nyi m. Fye to dna əɓwado n woi m, nabai vnyinkwo kwa wo wo. 15Dudulonu fye to kwu ɓa zè anuwnuyi m, ama fye gnaknyi ɓa shi fye ɓa gnaknyi vyiyi ədo nyi.
Gnaɓyi kpmasnui
16Nsaiye, fa Dagayi bwugbafu nya n əwohni tukwoi wa ga fye bwugbafu nsahosahoi jesnu dna n zokwo dəhodəhoi. Dagayi wo kwnusnu n fyei vnyanya.
17Əmi Bwulus nu na ka gnaɓyi ye n əmihni aɓwai, n əkwo nu wu əznù kakai n əmi apaka vnyanya. Mi kanya n wu nlai nu.
18Shebmyashi əyi Dagayi Yeisu Kirisiti nya kwo kwnusnu n fyei vnyanya.
Kasalukuyang Napili:
2 Atasaloniyi 3: GNB
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.