Mathiơ 8
8
Yêsu ngă pơhuai mơnuih djơ̆ r̂oh
(Mak 1:40-45; Lŭk 5:12-16)
1Pah Yêsu tr̂ŭn mơ̆ng kŏ čĭ, hmâo mơnuih lô kĕt-keng tui ñu. 2Jr̂ŏng nŭn hmâo mơnuih djơ̆ r̂oh#An Lêwi 13. ha r̂ăng r̂ai bon kơkuh Yêsu, ñu laĭ: «Ơ khua, pha laĭ bŭt ih čiăng, ih thâo mơ̆n ngă pơhuai br̂ơi kâo huai hiam.» 3Jr̂ŏng nŭn Yêsu yo ah ngan pơ mơnuih djơ̆ r̂oh nŭn, ñu laĭ: «Kâo čiăng mơ̆n. Br̂ơi ih huai hiam wŏ.» Klơi djơ̆ r̂oh ñu ki huai hiam tăñ he boih. 4Nŭn Yêsu hiăp hr̂ŏm ñu: «Ep hŏ, ih anăm r̂ă thâo r̂ăng pơkŏn ôh. Br̂ơi ih nao pơƀôh pô ih pơ pô ngă yang, nŭn br̂ơi ih pơyŏl dr̂ăm ngă yang hla ti ơi Môsê pơtă čr̂oh,#An Lêwi 14:1-32. čiăng r̂ăng ƀôh jel laĭ ih hiam boih.»
Khua tơhan ngư̆ Yêsu
(Lŭk 7:1-10)
5Tơl Yêsu mŭt nao pơ plơi Kapơnơ̆m, hmâo khua tơhan sô̆n-sat Rôm ha r̂ăng r̂ai pơ Yêsu, ñu dueh alôm laĭ: 6«Ơ khua, kâo hmâo hlŭn ha r̂ăng, ñu djai le ngan dŏ đih pơ sang, ñu wă-nuă kơtang jat.» 7Nŭn Yêsu hiăp hr̂ŏm ñu: «Kâo ti nao ngă pơhuai ñu mơ̆n.» 8Khua tơhan til glaĭ: «Ơ khua, kâo bĭ khư hăp tô̆ ih mŭt tăm sang kâo ôh, br̂ơi ih hiăp ha bah đơč,#An Doh 107:20. nŭn hlŭn kâo ñu ti huai yơh. 9Kâo mơnuih dŏ gah yô̆ r̂ăng, wŏt kâo hmâo tơhan dŏ gah yô̆ kâo mơ̆n. Kâo pơđơi tơhan ha r̂ăng laĭ “Nao,” ñu nao yơh, ha r̂ăng dŏng kâo laĭ “R̂ai,” ñu r̂ai mơ̆n, gah môt hlŭn kâo laĭ “Ngă ne,” gơñu ngă tui mơ̆n.» 10Tơl Yêsu hmĭ hla nŭn, ñu hr̂ŭk-hr̂ăk mơ̆ng bŭt-tai, nŭn ñu pơhiăp hr̂ŏm môt hyĕn tui ñu, ñu laĭ: «Kâo r̂ă br̂ơi gô-ih dơdi laĭ, tăm Israel kâo bĭ juăt ƀôh ha r̂ăng hmâo klơi ngư̆ hla ne ôh.#An Mat 15:28. 11Kâo r̂ă br̂ơi gô-ih, mơnuih sô̆n-sat pơkŏn lô ti r̂ai mơ̆ng ping gah ngŏ dăp ping gah yô̆,#An Doh 107:2-3. dŏ ben ƀŏng huă hr̂ŏm Abrahăm, Isă, dăp Yakô̆p, tơl Ơi Adai r̂ai wai-lăng dơdơi kăl, 12plai nă plơi lan Israel Ơi Adai iâo hlâo, wŏt gơñu djơ̆ mŭt tăm klơi Ơi Adai wai-lăng, gơñu nŭn Ơi Adai ti glŏm nao gah wang tăm ƀon kơnăm-hyeng, pơ anŭn ti hmâo klơi čŏk hia dăp kĕ gơi.»#An Mat 21:43. 13Nŭn Yêsu hiăp hr̂ŏm khua tơhan, ñu laĭ: «Glaĭ wŏ, ih ngư̆ hiư̆m pă, br̂ơi ih hmâo ha luaĭ nŭn mơ̆n.» Nŭn hlŭn ñu ki huai pah anŭn he boih.
Yêsu ngă pơhuai lô mơnuih
(Mak 1:29-34; Lŭk 4:38-41)
14Tơl Yêsu mŭt nao tăm sang Pêtrôih, nŭn ñu ƀôh khma đahmơi Pêtrôih, duăm dŏ đih mơ̆ng gr̂e. 15Yêsu ah nao ngan khma Pêtrôih, nŭn klơi duăm ñu huai hĕ, jr̂ŏng nŭn ñu gŭ, bơwih br̂ơi Yêsu. 16Jĕ klăm nŭn, r̂ăng ba nao mơnuih lô yang set ngă r̂ai pơ Yêsu, nŭn Yêsu pơpŏl đuĕ yang set, ñu yua klơi pơhiăp ñu, wŏt ngă pơhuai bih mơnuih wă-nuă. 17Buă nŭn čiăng bơjr̂ŏng lôi klơi pơhiăp Êsai, pô ba pơhiăp Ơi Adai, ñu r̂ă čr̂oh hlâo laĭ:
«Ñu tô̆ bih klơi dơdu wăn ta,
Wŏt glăm ba bih klơi wă-nuă ta mơ̆n.»#Klơi ne tô̆ mơ̆ng Êsai 53:4.
Mơnuih čiăng tui Yêsu
(Lŭk 9:57-62)
18Tơl Yêsu ƀôh mơnuih bơlô r̂ai dŏ jŭm dăl ñu, nŭn ñu pơđơi r̂ăng ploh duk ba nao ñu hang gah dih. 19Pah ñu ti đĭ duk, hmâo gru pơto klơi juăt Môsê ha r̂ăng r̂ai jĕ Yêsu hiăp laĭ: «Ơ gru! Kâo ti đuĕ tui ih, pơ pă ih nao ơ mơ̆n.» 20Yêsu pơhiăp hr̂ŏm ñu: «Bơja hmâo amăng, čĭm pŏl ngŏ adai hmâo hôh ñu mơ̆n, plai kâo Nă Mơnuih bĭ hmâo ƀon đăl kŏ ôh.» 21Hmâo mơnuih hyĕn tui Yêsu ha r̂ăng dŏng, pơhiăp laĭ: «Ơ khua, kâo dueh mơ̆ng ih br̂ơi kâo glaĭ dŏl lôi ma kâo ƀơĭ.» 22Nŭn Yêsu pơhiăp hr̂ŏm ñu: «Đuĕ tui kâo wŏ, br̂ơi mơnuih djai dŏl duă mơnuih djai gơñu.»
Yêsu khă angĭn lơbŭ
(Mak 4:35-41; Lŭk 8:22-25)
23Pah Yêsu đĭ duk, nŭn môt hyĕn tui ñu nao hr̂ŏm ñu mơ̆n. 24Pah anŭn, plŭt, hmâo angĭn lơbŭ kơtang r̂ai tăm ia gơnao, ia klač iă ti lŏp lôi duk, plai Yêsu, ñu dŏ pĕt. 25Nŭn môt hyĕn tui nao r̂âo Yêsu, gơñu laĭ: «Ơ khua! Dŏng pơklaih mơi he wŏ! Yua ta ti djai boih!» 26Yêsu pơhiăp nao pơ gơñu: «Ơ mơnuih hmâo klơi ngư̆ anĕt! Yua yĕt gô-ih huĭ?» Nŭn ñu gŭ đĭ khă angĭn hr̂ŏm ia gơnao, nŭn ia gơnao dŏ đŏng ngit.#An Doh 107:28-29. 27Bih gơñu hr̂ŭk-hr̂ăk, dăp gơñu laĭ: «Mơnuih hiư̆m pă ne hah! Tơl angĭn hr̂ŏm ia gơnao ngư̆ tui ñu mơ̆n?»
Yêsu pơpŏl đuĕ yang set mơ̆ng đahkơi dua r̂ăng
(Mak 5:1-20; Lŭk 8:26-39)
28Pah Yêsu tơl nao hang gah dih, mơ̆ng ƀon Gadara,#8:28 Mơ̆ng ƀon Gadara hmâo ha boh plơi a iâo Kêrasin. Nŭn yơh Mak 5:1 dăp Lŭk 8:26 iâo ƀon nŭn laĭ «Kêrasin.» nŭn hmâo đahkơi dua r̂ăng yang set ngă, gơñu biă mơ̆ng pơsat tâo r̂ai pơ Yêsu. Dua gơñu nŭn kơtang jat, bĭ hmâo mơnuih lơi khĭn bat găn glan nŭn ôh. 29Pah anŭn gơñu ôl kr̂aih laĭ: «Ơ nă Ơi Adai! Ih hmâo kơđi yĕt hr̂ŏm mơi? Hiư̆m, ih tr̂ŭn r̂ai ngă pơkơnap mơi, hlâo r̂ơi a pơkă ah?» 30Taih mơ̆ng anŭn hmâo bui lô ha phung dŏ ƀŏng mr̂ơ̆k. 31Môt yang set dueh alôm mơ̆ng Yêsu: «Jơ̆ ih pơpŏl đuĕ mơi, br̂ơi mơi mŭt nao tăm phung bui nŭn wŏ.» 32Nŭn Yêsu pơhiăp nao pơ gơñu: «Nao wŏ!» Nŭn môt yang set biă đuĕ mŭt nao tăm phung bui. Nŭn phung bui đuĕ bơbo gŏp ñu, tr̂ŭn mơ̆ng čĭ mŭt nao tăm ia gơnao, djai bih blao tăm ia nŭn. 33Môt čiă phung bui, gơñu đuĕ glaĭ mŭt tăm plơi, r̂ă r̂oi bih buă nŭn, dăp mơ̆ng buă mơnuih yang set ngă nŭn he mơ̆n. 34Pah anŭn bih nă plơi biă nao pơ Yêsu. Tơl gơñu ƀôh Yêsu, nŭn gơñu dueh alôm Yêsu biă đuĕ mơ̆ng ƀon gơñu nŭn.
Kasalukuyang Napili:
Mathiơ 8: JKB
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2024, Wycliffe Bible Translators, Inc.