Números 32
32
Rubén trïbu y Gad trïbu runakuna posisionta chaskishqan
Deuteronomio 3.12-22
1Rubén trïbu y Gad trïbu runakunapami uywankuna atska karqan. Tsaymi Jazer partikuna y Galaad partikuna uywankunata mitsikunanpaq ali kaptin munapakarkärirqan. 2Tsaymi Moisés, Eleazar y wakin mandaqkuna karkaykashqanman aywaykur Gad trïbu y Rubén trïbu runakuna kayno nipäkurqan: 3<<Atarot, Dibón, Jazer, Nimra, Hesbón, Eleale, Sebam, Nebo y Beón partikuna 4uywäkunata mitsikunäpaq alimi kaykan. Uywäkuna atska kaptinmi kay partikunata Tayta Dios noqakunapaq shuntashqa. 5Tsaymi ruwakärï kay partikunata aypuykamänaykipaq. Jordán mayutaqa amana pasatsimaynatsu>>.
6Tsaymi Moisés kayno nirqan: <<Israel mayintsikuna guërraman aywarkaykaptin ¿imanirtaq qamkuna quëdakuyta munarkaykanki? 7¿Imanirtaq Israel mayintsikunata qelanaykätsinki Tayta Dios promitishqan nacionman aywananta? 8Cades-barneapita Canaánta rikapakuq kachaptï qamnökunami Israel mayintsikunata desanimatsirqan. 9Paykunami rikapakur chayarqan Escol pampayaq. Kutiykamurmi Israel mayintsikunata shimita jatipar desanimatsirqan Tayta Dios qoykushqan partiman mana yaykapäkunanpaq.#Núm. 13.17-33. 10Tsay achäquimi Tayta Dios fiyupa rabyakushpan kayno nirqan: 11<Egiptupita yarqamuq runakuna ishkay chunka (20) watayuqpita janaman kaqqa mana wiyakushqanpita manami yaykapäkunqatsu Abrahamta, Isaacta y Jacobta promitishqä nacionman. 12Cenezeo runa Jefonipa tsurin Caleb y Nunpa tsurin Josuélami noqaman yärakamashqanpita tsay nacionman yaykapäkunqa>.
13<<Tsayno nirmi Tayta Dios fiyupa rabyakushpan lapan tsay runakuna ushakashqanyaq chunyaq jirkapa chusku chunka (40) wata puritsirqan.#Núm. 14.26-35. 14Kanan ¿qamkunapis Diosta rabyanätsiq unay Israel mayikikunanölaku desanimatsiyta munarkaykanki? Tsayno desanimatsiptikiqa yapaymi Tayta Dios rabyar contrantsi rikakunqapaq. 15Tayta Diosta mana cäsukur kaycho quëdaptikiqa yapaymi chunyaq jirkapa puritsimäshunpaq. Tsaynöpami qamkuna jutsayuq kapäkunkipaq Israel runakuna ushakänanpaq>>.
16Moisés tsayno niptinmi paykunaqa kayno nirqan: <<Uywäkunapaq kaychömi corralta rurayta munarkaykä. Tsaynöpis tsurïkunata imapis mana pasananpaqmi markakunata sharkatsiyta munarkaykä. 17Kay kinraycho taq runakuna mana fastidiananpaqmi markäkunata sigurarkatsir tsurïkunata y uywäkunata kaycho kachaykärishaq. Nirkurnami kamarikurkur Israel mayintsikuna tänanpaq kaq partiman chayatsipäkunäyaq puntanta aywapäkushaq. 18Lapan Israel mayintsikuna posisionta chaskirkuptinraqmi noqakunaqa kutipäkamushaq. 19Kay tsimpacho posisionta chaskiykarnaqa Jordán mayu tsimpacho mananami posisionta chaskinäpaq manakärishaqnatsu>>.
20Tsaymi Moisés kayno nirqan: <<Nishqaykita cumpliptikiqa alimi kanqa. Tsaymi guërraman aywanaykipaq kamarikurkur 21Jordán mayu tsimpancho Tayta Diospa contrankunata ushakätsishqaykiyaq pelyapäkunki. 22Intëru nacioncho kamakarkuptinraq kutipäkamunki. Tsayno cumplirqa Tayta Diospa nawpancho y Israel mayintsikunapa nawpancho manami jutsayuqtsu kankipaq. Tsaynöpami kay chakrakuna qamkunapaqna kanqa. 23Mana cumplirmi itsanqa Tayta Diospa nawpancho jutsayuq kar paypa makinpita imanöpapis mana qeshpipäkunkipaqtsu. 24Tsawraqa kutimushqaykiyaq tsurikikuna kaycho taykänanpaq markakunata sharkatsipäkuy. Tsaynöpis uywaykikunapaq corralkunata rurapäkuy. Nirkur kikikikuna promitishqaykinöla aywapäkunki>>.
25Tsawraqa Gad trïbu y Rubén trïbu runakuna kayno nipäkurqan: <<Nimashqaykita lapantami cumplipäkushaq, tayta. 26Warmïkunata, pishi wamräkunata y uywäkunataqa kay Galaad parti markakunalachömi kachaykärishaq. 27Noqakunami itsanqa nimashqaykino shumaq kamarikurkur Tayta Dios munashqanno guërraman aywapäkushaq>>.
28Tsayno niptin cüra Eleazarta, Nunpa tsurin Josuéta y cada trïbupa mandaqninkunata 29Moisés kayno nirqan: <<Gad trïbu y Rubén trïbu runakuna Jordán mayuta tsimparir tsaycho taq runakunata vincipäkunaykipaq yanapashunki. Tsaypitaraqmi Galaad particho kaykaq chakrakunata posisionnin kananpaq aypupäkunki. 30Yanapashunaykipaq Jordán mayuta mana pasaptinqa kay tsimpacho posisionta ama aypupäkunkitsu, sinöqa Israel mayinkunawan iwal Canaánchöraq posisionta aypupäkunki>>.
31Tsayno niptinmi Gad trïbu y Rubén trïbu runakuna kayno nipäkurqan: <<Noqakunaqa Tayta Dios nishqanno lapantami cumplipäkushaq, tayta. 32Tsaymi guërracho yanapanäpaq Jordán mayuta tsimpar Canaánman yaykapäkushaq. Imano kaptinpis noqakunapa posisionnïkunaqa Jordán mayupa kay tsimpanchömi kanqa>>.#Jos. 1.12-15.
33Tsayno niptinmi posisionninkunata Moisés entregarqan Gad trïbu, Rubén trïbu y pulan Manasés trïbu runakunata. Manasés trïbu runakunaqa karqan Josépa tsurin Manaséspita miraqkunami. Manaraq vinciptinmi tsay posisionkuna karqan amorreo runakunapa mandaqnin rey Sehónpa y Basán nacionpa mandaqnin rey Ogpa. Tsaycho kaq lapan markakunata chakrantinta Moisés entregarqan. 34Tsaymi Gad trïbu runakuna kikinkunapaq altsapäkurqan Dibón markata, Atarot markata, Aroer markata, 35Atarot-sofán markata, Jazer markata, Jogbeha markata, 36Bet-nimra markata y Bet-arán markata. Lapan tsay markakunata tumariq murallapäkurqan. Tsaynölami cabrankunapaq y uyshankunapaq corralkunata rurapäkurqan.
37Rubén trïbu runakunanami kikinkunapaq altsapäkurqan Hesbón markata, Eleale markata, Quiriataim markata, 38Nebo markata, Baal-meón markata y Sibma markata. Tsay markakunapata jutinkunatapis trukatsipäkurqanmi.
39Manaséspa tsurin Maquirpita miraqkunana Galaad partiman yaykapäkurqan. Paykunaqa tsaycho taq amorreo runakunata qarqurkurmi chakrankunata tsarikarkärinqa. 40Tsay Galaad partitami Moisés entregarqan Manaséspa tsurin Maquirpita miraq runakunata. Paykunami tsaycho tarqan. 41Tsaynölami Manaséspa tsurin Jairpita miraq runakuna amorreo runakunapa wakin taksha markankunata qechurqan. Tsay partipa jutintami churapäkurqan Havot-jair jutin kananpaq.#32.41 Havot-jair ninanqa Jairpa markankuna ninanmi. 42Noba aylu runakunanami qechurqan Kenat partita y lapan markankunata. Nirkurmi tsay partipa jutinta churaparqan Noba jutin kananpaq.
Kasalukuyang Napili:
Números 32: qvmB
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2003, Wycliffe Bible Translators, Inc. All rights reserved.